އެންމެ އިސްކަންދެނީ ހުއްޓިފައިވާ މަޝްރޫއުތައް އަލުން ފެށުމަށް: ރައީސް

ސަރުކާރުން އެންމެ އިސްކަންދެނީ ރާއްޖޭގެ އެކި ސަރަހައްދުތަކުގައި ހުއްޓިފައިވާ މަޝްރޫއުތައް އަލުން ފަށައި، ސަރުކާރުގެ ކުންފުނިތައް މޮބިލައިޒްކޮށް، އެ މަޝްރޫއުތައް ނިންމުމަށްކަމުގައި ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވެއްޖެއެވެ.

ހއ އަށް ރައީސް ކުރައްވަމުންގެންދަވާ ދަތުރުފުޅުގެ އެންމެފަހު މަންޒިލެއްގެ ގޮތުގައި އުލިގަމަށް ވަޑައިގެން އެރަށު ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުން ވިދާޅުވީ، އުލިގަމާއި ރާއްޖޭގެ އެކި ސަރަހައްދުތަކުގައި މަސައްކަތް ހަވާލުކުރުމަށްފަހު، އެކި ހާލަތްތަކުގެ ސަބަބުން އެއްވެސް މަސައްކަތެއް ކުރިއަށް ނުގެންދެވިފައިވާ ގިނަ މަޝްރޫއުތަކެއް އެބަ ހުރިކަމަށެވެ.

އެފަދަ މަޝްރޫއުތަކުގެ ތެރޭގައި ގައުމީ ތަރައްގީ އާއި ރައްޔިތުންގެ ދުޅަހެޔޮކަމާއި ގުޅިފައިވާ އެތައް މަޝްރޫއެއް ހިމެނޭކަން ފާހަގަކުރައްވައި ރައީސް ވިދާޅުވީ، އެހެންވުމުން އެންމެ މުހިންމުކަމަކީ މިފަދަ މަޝްރޫއުތައް ފަށައި، އޭގެ ނަފާ ރައްޔިތުންނަށް ލިބުން ކަމަށާއި އެފަދަ މަޝްރޫއުތައް ކުރިއަށް ގެންދިޔުމަށްޓަކާ ސަރުކާރުގެ ކުންފުނިތައް މޮބިލައިޒްކޮށް، މަޝްރޫއުތައް ހިންގުމަކީ ސަރުކާރުގެ އަމާޒުކަމަށެވެ.

ހުއްޓިފައިވާ މަޝްރޫއުތައް އަލުން ފަށަން އިދާރީ ގިނަ މަސައްކަތްތަކެއް ކުރިއަށްދާކަމަށާއި، މިހާރު ކުރިއަށްދަނީ ކުރީގެ އެއްބަސްވުންތައް ބާތިލުކުރުންފަދަ ކަންކަންކަމަށް ރައީސް ވިދާޅުވި އެވެ. އެހެންކަމުން ކުރިއަށް އޮތް ފެބުރުއަރީމަހު އެ މަޝްރޫއުތައް ވަރަށް ބާރަށް ހިނގައިގަންނާނެކަމަށް ރައީސް ވިދާޅުވި އެވެ.

އަދި، އެކަމަށް ދައުލަތުން ކުރަންޖެހޭ މަސައްކަތްތައް ކުރައްވާނެކަމުގެ ޔަގީންކަން ރައީސް ދެއްވި އެވެ.

އުލިގަމު ރައްޔިތުންނާ މުހާތަބުކޮށް ވާހަކަދައްވަމުން ރައީސް ވިދާޅުވީ، އުލިގަމު ތަރައްގީއަށް، ޔޮޓް މެރީނާއެއް ތަރައްގީކުރުމުގެ މަސައްކަތް ފެބްރުއަރީ މަހު ފެށިގެންދާނެ ކަމަށާ، އަދި، ސްޕޯޓްސް ފިޝިންގއަށް ބޭނުންވާ ބޮއި، ފެބްރުއަރީމަހު ހަރުކުރެވި، އޭގެ ފައިދާ އުލިގަމު ރައްޔިތުންނަށް ލިބިގެންދާނޭ ކަމަށްވެސް ރައީސް ވިދާޅުވި އެވެ.