ބަނޑަށް ދަރިފުޅު މަރުވުމުގެ ގިނަ މައްސަލަތަކެއް

ކޭއާރުއެޗްގައި ކަރިކައިރީގައި ބަނޑަށް ދަރިފުޅު މަރުވުމުގެ ގިނަ މައްސަލަތަކެއް ފާހަގަވެ އާންމު ކަންބޮޑުވުންފާޅުކުރަމުން އެބަދެ އެވެ. ކުޅުދުއްފުށީގައި ހިންގާ ކަށުނަމާދު ޕޭޖުން އާންމުކޮށްފައިވާ މައުލޫމާތަށް ބަލާއިރު މިއަހަރުގެ މިހާތަނަށް 7 ކުއްޖަކު ވަނީ މަރުވެފަ އެވެ.

މީގެ ތެރެއިން 6 ކުދިން ބަނޑަށް މަރުވެފައިވާއިރު އެއް ކުއްޖަކު މަރުވެފައިވަނީ ވިހެއުމަށްފަހު 18 ދުވަސްފަހުންނެވެ. މަރުވި 7 ކުދިންގެ ތެރޭގައި އެއްމާބަނޑު ދެ ކުދިންގެވެސް ހިމެނެ އެވެ. އެ ދެ ކުދިންގެ ތެރެއިން އެއްކުއްޖަކީ އުފެދުމުގެ މައްސަލައެއް ހުރި ކުއްޖަކަށްވުމުން އެ ކުއްޖާ ދުނިޔޭގައި ނުހުންނެކަން ޑޮކްޓަރުން ވަނީ ކުރިންވެސް ވިދާޅުވެ އެވެ.

އެކަމަކު ހާލު ދެރަވެ ފަސް މަހުގައި ދެ ކުދިން ނަގަން ޖެހުނެވެ. އެ ކުދިންވެސް އޮތީ މަރުވެފަ އެވެ.

އަތޮޅުތެރޭގެ އެންމެ ގިނަ ބަޔަކު ހިދުމަތް ހޯދަމުންދާ ކުޅުދުއްފުށީ ރީޖަނަލް ހޮސްޕިޓަލް (ކޭއާރުއެޗް) ގައި އެންމެ ފަހުން ބަނޑަށް ކުއްޖަކު މަރުވެފައިވަނީ ރޭގަ އެވެ. ކޭއޯއަށް އެނގިފައިވާ ގޮތުގައި އެ ކުއްޖާއަކީ ބަނޑަށް 36 ހަފުތާވެފައިވާ ކުއްޖެކެވެ.

މީސް މީޑިއާގައި މިކަމުގެ ކަންބޮޑުވުންފާޅުކޮށް މީހަކު ކުރި ޕޯސްޓެއްގައި ބުނީ، މިއީ އިއްތިފާގެއްކަމަށް ގަބޫލު ނުކުރެވޭ ކަމަށާއި ސިލްސިލާކޮށް ޅަފަތުގައި ކުދިން މައިމީހާގެ ބަނޑަށް މަރުވުމުގައި ސަބަބުތަކެއްވާނެ ކަމަށެވެ. އަދި އެކަން ސީރިއަސް މައްސަލައެއްގެ ގޮތުގައި ބަލައިދިނުމަށް ކަމާ ގުޅުން ހުރި އިދާރާތަކުގައި އޭނާ އެދުނެވެ.

ހުސްވި 2024 ވަނަ އަހަރު ފަހުކޮޅުވެސް ބަނޑަށް ކުދިން މަރުވުމާއި ވިހެއުމުގެ ތެރޭގައި އާއި ވިހެއުމަށް ފަހު ކުދިން މަރުވުމުގެ މައްސަލަތައް ހިނގި އެވެ. އެގޮތުން އެފަދަ ހަތަރު މައްސަލައެއް ފާހަގަވެފައިވެ އެވެ. އޭގެ ތެރެއިން އެ ކުއްޖަކު މަރުވީ ވިހެއިތާ 6 ދުވަސްފަހުންނެވެ. އެހެން ކުއްޖަކު އެއްދުވަސް ފަހުން މަރުވިއިރު ދުވަސްފުރާ ވިހެއި ކުއްޖަކުވެސް މަރުވެފައިވެ އެވެ.

ކުޅުދުއްފުށީ ރީޖަނަލް ހޮސްޕިޓަލް މިހާރުން ހިންގަމުންދަނީ ހެލްތް މިނިސްޓްރީގެ ދަށުންނެވެ. އެހެންވެ މިކަމުގައި ހެލްތް މިނިސްޓްރީގެ ބަހެއް ހޯދަން އެ މިނިސްޓްރީއަށް ގުޅާލުމުން ބުނީ، އެކަން މިނިސްޓްރީގެ ސަމާލުކަމަށް އައިސްފައިވާ ކަމަށާއި ބަނޑަށް މަރުވި ގިނަ ކުދިންގެ ތެރޭގައި ހިމެނެނީ 28 ހަފުތާގެ ކުދިން ކަމަށެވެ.

އަދި އެ މައްސަލަތައް މިނިސްޓްރީން މޮނިޓަރކޮށް ބަލަމުންދާ ކަމަށް މިނިސްޓްރީން މައުލޫމާތުދިނެވެ.

އަހަރެއްހާ ދުވަހުގެ ތެރޭގައި ކޭއާރުއެޗްގެ ހިދުމަތް ދަށަށް ދިޔަކަމުގެ ޝަކުވާ!

އަތޮޅުތެރޭގެ އެންމެ ގިނަ ބަޔަކު ބޭސް ފަރުވާގެ ހިދުމަތް ހޯދަނީ ކޭއާރުއެޗުންނެވެ. މާލެ ސަރަހައްދު ފިޔަވާ އެންމެ ގިނަ ބަޔަކު ވިހަނީވެސް ކޭއާރުއެޗުގަ އެވެ. އެކަމަކު ފާއިތުވި އަހަރެއްހާ ދުވަސްތެރޭގައި ހޮސްޕިޓަލްގެ ހާލަތު ވަރަށް ބޮޑަށް ދަށަށް ގޮސްފައިވާކަމުގައި ޝަކުވާ ސޯޝަލް މީޑިއާގައި އާންމުން އަންނަނީ ކުރަމުންނެވެ.



ހޮސްޕިޓަލްގެ ހިދުމަތްތައް ރަނގަޅުކުރުމުގެ ގޮތުން 2021 ވަނަ އަހަރު ކުޅުދުއްފުށީ ރީޖަނަލް ހޮސްޕިޓަލް މިނިސްޓްރީގެ ދަށުން ވަކިކުރުމަށްފަހު އެހޮސްޕިޓާ ވަކި ގަވާނިންގ ބޯޑެއްގެ ދަށުން ހިންގުމަށް އޭރުގެ ސަރުކާރުން ނިންމި އެވެ.

ބޯޑަށް 6 މެންބަރުން އައްޔަނުކޮށް ހޮސްޕިޓާ ލާމަރުކަޒީކޮށް ހިންގުމަށް ފެށުމުން ބޮޑުތަނުން ހޮސްޕިޓަލްގެ ހިދުމަތް ރަނގަޅުވި އެވެ. އެހެންނަމަވެސް ސަރުކާރު ބަދަލުވުމުން ބޯޑު އުވާލައި އަލުން މިނިސްޓްރީގެ ދަށަށް ހޮސްޕިޓާގެ ބަދަލުކޮށް ސިއްހީ ދާއިރާ މަރުކަޒީކުރި އެވެ.