ފޭދޫ ކައިރީގައި ސްޕޯޓްސް ފިޝިންގ ކަނދުފައްޗެއް އެޅުމަށް މަޝްވަރާކޮށްފި

ށ. ފޭދޫ ކައިރީގައި ސްޕޯޓްސް ފިޝިންގ ކަނދުފައްޗެއް ގާއިމުކުރުމާއި ގުޅޭގޮތުން މަސްވެރިކަމާއި ކަނޑުގެ ވަސީލަތްތަކާބެހޭ ވުޒާރާއާއި ފޭދޫ ކައުންސިލާއި ދެމެދު މަޝްވަރާކުރައްވައިފިއެވެ. މި މަޝްވަރާތައް ކުރައްވާފައިވަނީ އެ ރަށު ކައުންސިލުން މިނިސްޓަރު ޝިޔާމްއާއިއެކު ބޭއްވި ބައްދަލުވުމުގައެވެ.

ރާއްޖޭގައި 2 ބާވަތެއްގެ ކަނދުފަތި ވަނީ އަޅާފައެވެ. އެއީ ކަޅުބިލަމަހުގެ މަސްވެރިކަމަށް ހާއްސަކޮށް އަޅާފައިވާ ދޮށީ ކަނދުފައްޗާއި، ސްޕޯޓްސް ފިޝިންއަށް އަޅާފައިވާ ވަދު ކަނދުފަައްޗެވެ. ސްޕޯޓްސް ފިޝިން ކަނދުފަތިތަކަކީ މިހާރު ވަރަށް ޑިމާންޑު ބޮޑު ކަނދުފަތިތަކެއްކަމަށް މަސްވެރިކަމާބެހޭ ވުޒާރާއިން ވަނީ ބުނެފަ އެވެ.

ވަޒީރު އަޙްމަދު ޝިޔާމް ށ.ފޭދޫ ކައުންސިލާ ބައްދަލުކުރެއްވުން.

މި ބައްދަލުކުރެއްވުމުގައި ށ.ފޭދޫ ކައިރީގައި ސްޕޯޓްސް ފިޝިންގ ކަނދުފައްޗެއް ޤާއިމުކުރުމާއި ށ.ފޭދޫއިން އައިސް ލިބޭނެ އިންތިޒާމް ހަމަޖެއްސުމަށް މަޝްވަރާކޮށްފައިވޭ. pic.twitter.com/TAoYuuZt9O

— Ministry of Fisheries and Ocean Resources (@MFORmv) February 18, 2025

ފިސަރީސް މިނިސްޓަރު އަހުމަދު ޝިޔާމް ފޭދޫ ކައުންސިލާއެކު ބޭއްވި ބައްދަލުކުރެއްވުމުގައި ވަނީ ފޭދޫ ކައިރީގައި ސްޕޯޓްސް ފިޝިންގ ކަނދުފައްޗެއް ގާއިމުކުރުމާއި ބެހޭގޮތުން މަޝްވަރާކުރައްވާފައެވެ. އަދި މީގެއިތުރުން ފޭދޫއިން އައިސް ލިބޭނެ އިންތިޒާމް ހަމަޖެއްސުމަށްވެސް މި ބައްދަލުވުމުގައި މަޝްވަރާކޮށްފައިވާކަމަށް އެ މިނިސްޓްރީން ވަނީ ބުނެފަ އެވެ.

ރާއްޖޭގައި މިވަގުތު ހުރީ ކަނދުފަތި ޤާއިމްކުރާ އެންމެ ސެންޓަރެކެވެ. އެއީ ހުޅުމާލޭގައި ހުންނަ ސެންޓަރެވެ. މަސްވެރިކަމާބެހޭ ވުޒާރާއިން ވިދާޅުވީ ސްޕޯރޓްސް ކަނދުފައްޗަށް ގިނަ އަދަދެއްގެ ރިކުއެސްޓް އައި ނަމަވެސް އެންމެ ސެންޓަރެއް ހުރުމުގެ ސަބަބުން ގިނަ ދަތިތަކާއި ކުރިމަތިވަމުން އަންނަކަމަށެވެ.

ސަރުކާރުން މިހާރު ވަނީ ރާއްޖޭގެ އުތުރާއި ދެކުނުގައި ކަނދުފަތި ގާއިމްކުރާގެ ދެ ސެންޓަރު އަޅާނެކަން އިއުލާންކުރައްވާފައެވެ. އެއީ ފުނަދޫއާއި ގދ. ވާދޫއެވެ. ފުނަދޫގައި އަޅާ ކަނދުފަތި ސެންޓަރު މިއަހަރުގެ ތެރޭގައި ނިމޭނެކަމަށް މިނިސްޓަރު ޝިޔާމް ވަނީ ވިދާޅުވެފައެވެ.