އަމިއްލައަށް މަރުވާން އުޅުނު މީހާގެ ހާލު ވަރަށް ދެރަ

ކުޅުދުއްފުށީ ޕޮލިސް ކަސްޓޯޑިއަލްގައި ބަންދުގައި ހުއްޓައި އަމިއްލައަށް މަރުވާން މަސައްކަތް ކުރި މީހާގެ ހާލު ވަރަށް ދެރަކަމަށް ކުޅުދުއްފުށީ ރީޖަނަލް ހޮސްޕިޓަލް ބުނެފި އެވެ.

ރޭ މީޑިއާތަކާ ހިއްސާކުރި މެސެޖެއްގައި ފުލުހުން ބުނެފައިވަނީ، އެ މީހާ އަމިއްލައަށް މަރުވާން މަސައްކަތްކުރީ 21:12 ގަ ކަމަށެވެ. އެހެންވުމުން ކުޅުދުއްފުށީ ރީޖަނަލް ހޮސްޕިޓަލްގައި ފަރުވާދެމުންދާ ކަމަށެވެ.

ކޭއާރުއެޗުގެ އޮފިޝަލަކު މިރޭ ކޭއޯއަށް ވިދާޅުވީ، އޭނާގެ ހާލު ވަރަށް ދެރަ ކަމަށާއި އަދިވެސް ފަރުވާދެމުންދަނީ ވެންޓިލޭޓަރުގައި ބާއްވައިގެން ކަމަށެވެ.

އެ މީހާއަކީ މަސްތުގެ ހާލަތުގައި ހުރެ ގޭގެ މުދަލަށް ގެއްލުންދީ ހަމަނުޖެހުން ހިންގި މައްސަލައަކާ ގުޅިގެން މިދިޔަ ބުދަ ދުވަހު ފުލުހުންގެ ބެލުމުގެ ދަށަށް ގެނައި 34 އަހަރުގެ ދިވެހި ފިރިހެނެކެވެ.

ފުލުހުން ބުނީ، މި ހާދިސާއާ ގުޅިގެން އަޅަން ޖެހޭ ފިޔަވަޅުތައް އަޅަމުން އަންނަ ކަމަށާއި ހާދިސާއާ ގުޅޭ މައުލޫމާތު ހިއުމަން ރައިޓްސް ކޮމިޝަން (އެޗްއާރުސީއެމް)އަށާއި ނޭޝަނަލް އިންޓެގްރިޓީ ކޮމިޝަން (އެންއައިސީ)އަށް ދީފައިވާ ކަމަށެވެ.

ހާދިސާގެ ތަހުގީގަށް މޭޖާ ކްރައިމް، އިންވެސްޓިގޭޝަން ޓީމެއް އެ ރަށަށް ފޮނުވުމަށް ފުލުހުން ވަނީ ނިންމާފައެވެ. އަދި، ހާދިސާ ހިނގާފައިވާ ގޮތުގެ މައްޗަށް، އެތެރޭގެ ތަހުގީގެއް ޕްރޮފެޝަނަލް ކޮމާންޑުން ހާއްސަ އިސްކަމެއް ދީގެން ކުރިއަށްގެންދަމުން އަންނަކަމަށް ވެސް ފުލުހުން ވަނީ ބުނެފައެވެ.

މީގެ ކުރިންވެސް ކުޅުދުއްފުށީ ކަސްޓޯޑިއަލް ހުރި މީހަކު ވަނީ ދަން ޖެހިގެން މަރުވެފައެވެ. އަދި އެކި ފަހަރުމަތިން އެތަނުގައި ބަންދުގައި ތިބޭ މީހުން އަމިއްލައަށް މަރުވާން މަސައްކަތްކޮށްފައި އެބަހުއްޓެވެ.