ހިޒްބުއްލާ ޖަމާއަތުގެ ހަރަކާތްތައް މަނާކޮށްފައިވާކަމަށް ލުބުނާނުގެ ބޮޑުވަޒީރު ބުނެފި
އިރާނާ ގުޅިފައިވާ ހިޒްބުއްލާ ޖަމާއަތުން އިސްރޭލަށް ދިން ރޮކެޓް އަދި ޑްރޯން ހަމަލާތަކަށް ރައްދުދިނުމުގެ ގޮތުން ދެކުނު ބެއިރޫތަށް ވައިގެ ހަމަލާތަކެއް އިސްރޭލުން ދިންތާ ގަޑިއިރުތަކެއް ފަހުން ހިޒްބުއްލާ ޖަމާއަތުގެ މިލިޓަރީ އަދި ސެކިއުރިޓީ ހަރަކާތްތައް ބޭންކޮށްފައިވާ ކަމަށް ބުނެ ލުބުނާންގެ ބޮޑުވަޒީރު ނަވާފް ސަލާމް ބަޔާނެއް ނެރެފި އެވެ.
"އަހަރެމެން ހިޒްބުއްލާ ޖަމާއަތުގެ މިލިޓަރީ ހަރަކާތްތައް ބޭން ކުރިކަން އިއުލާނުކުރަން އަދި ސިޔާސީ މައިދާނަށް އެމީހުން ކުރާ ބާރު ހުއްޓުވަން." ނަވާފް ބުނެފައިވެ އެވެ.
ހުއްދަ ދެވިފައިވާ ފަރާތްތަކުގެ ބޭރުން ލުބުނާނުގެ ތެރެއިން ދީފައިވާ ހަމަލާއެއް ނުވަތަ އެއްވެސް މިލިޓަރީ އަދި ސެކިއުރިޓީ އޮޕަރޭޝަން ތަކަށް އެމީހުން އިންކާރު ކުރާކަމަށް އެމީހުން ބުނެފައިވެ އެވެ.
ބޮޑު ވަޒީރު އިތުރަށް ބުނީ ހިޒްބުއްލާގެ ހުރިހާ ހަރަކާތްތަކަކީ ގަވާއިދާ ހިލާފު ހަރަކާތްތަކެއް ކަމަށާއި އަދި ލުބުނާނުގެ ތެރެއިން އެހަމަލާ ފެށިގެން ދެވޭ ދެވުން ހުއްޓުވުމަށް އެގައުމުގެ ދިފާއީ ބާރަށް ގޮވާލާފަ އެވެ.
އަނިޔާވެރިކަން ހުއްޓުވުމަށް އަދި ނެގޯޝިއޭޝަންސްތައް އަލުން ފެށުމާއި އެއްކޮޅުގައި ތައްޔާރަށް ތިބި ކަން ބޮޑުވަޒީރު ވަނީ އިތުރަށް ފާހަގަކޮށްފަ އެވެ. އިރާނާ ގުޅިފައިވާ ލުބުނާނުގެ ހަތިޔާރުލީ ގްރޫޕުން ހޯމަ ދުވަހު ބުނެފައިވަނީ އެމީހުން ދިން ހަމަލާއަކީ އިރާނުގެ ސްޕްރީމް ލީޑަރު އާޔަތުﷲ އަލީ ހާމަނާއި މަރާލުމާ ގުޅިގެން އެކަމަށް އަދި ލުބުނާނާއި ލުބުނާނުގެ ރައްޔިތުންގެ ސަލާމަތަށް އެޅި ފިޔަވަޅެއްގެ ގޮތުން ދިން ރައްދު ހަމަލާއެއް ކަމަށެވެ. އަދި ތަކުރާރުކޮށް އިސްރާއިލުން ކުރަމުން އަންނަ އުދަނގޫތަކާ ހަމަލާތަކާ ވެސް ދެކޮޅަށް ކަމަށް އެޖަމާއަތުން ބުނެފައިވެ އެވެ.
