ރަމަޟާން މަހު އުމްރާއަށް މީހުން ގެންދިއުމަށް ހަމަޖެއްސި ދަތުރުތައް އެންމެ ފަހު ވަގުތު ކެންސަލްކުރުމާ ގުޅިގެން، އަލްއަބްރާރު ހައްޖު އެންޑް އުމްރާ ކުންފުންޏަށް ދީފައިވާ އުމްރާ ހުއްދަ އިސްލާމިކް މިނިސްޓްރީން ވަގުތީ ގޮތުން ހިފަހައްޓައިފިއެވެ.
މިނިސްޓްރީން ނެރުނު ނޫސްބަޔާނެއްގައި ބުނީ، އަލްއަބްރާރު ކުންފުނިން މިމަހު 3 އިން 26 އަށް ކުރަން އޮތް ރަމަޟާން އުމްރާ ދަތުރު ކެންސަލްކޮށްފައިވަނީ މަގުބޫލު އެއްވެސް ސަބަބެއް ނެތި ކަމަށެވެ. އަދި މި އަމަލަކީ ރާއްޖެއިން އުމްރާއަށް މީހުން ގެންދިޔުމާބެހޭ އުސޫލާ ހިލާފު ކަމެއް ކަމަށްވެސް މިނިސްޓްރީން ފާހަގަކުރިއެވެ.
މި މައްސަލަ ފެންމަތިވީ، އުމްރާއަށް ދިއުމަށް ފައިސާ ދެއްކި 100 އަށްވުރެ ގިނަ މީހުން ފުރުމަށް އެންމެ ފަހުގެ ތައްޔާރީތައް ވަމުންދަނިކޮށް، ދަތުރު ކެންސަލްވިކަން އަންގާރަ ދުވަހު ކުންފުނިން އެންގުމާ ގުޅިގެންނެވެ. އުމްރާވެރިން ބުނާ ގޮތުގައި، އަންގާރަ ދުވަހު ހެނދުނުވެސް ފުރޭނެ ކަމުގެ ޔަގީންކަން ކުންފުނިން ދީފައިވެއެވެ. ނަމަވެސް، ކުއްލި ގޮތަކަށް ދަތުރު ކެންސަލް ކުރުމުން އަންގާރަ ދުވަހުގެ ރޭ ގިނަ ބަޔަކު ވަނީ އެ ކުންފުނީގެ އޮފީސް ދޮށަށް އެއްވެ ނުރުހުން ފާޅުކޮށްފައެވެ.
ކުންފުނިން ދަތުރު ކެންސަލް ކުރި ސަބަބެއް ކަމަށް ބުނެފައިވަނީ މެދުއިރުމަތީގެ މަސްރަހު ގޯސްވުމެވެ. މި ކުންފުނިން ވިސާ އާއި ހޮޓެލް ބުކިންގްސްގެ ކަންކަންވެސް ފުރިހަމަކޮށްފައި ނުވާކަމުގެ ޝަކުވާ އުމްރާވެރިން ވަނީ ކޮށްފައެވެ. ކޮންމެ މީހެއްގެ އަތުން ގާތްގަނޑަކަށް 45,000 ރުފިޔާ ނަގާފައިވާއިރު، މިހާރު ކުންފުނިން ދަނީ ޓިކެޓް ފައިސާގެ ގޮތުގައި 15,000 ރުފިޔާ އުނިކުރުމަށްފަހު ރިފަންޑް ދެމުންނެވެ.
އިސްލާމިކް މިނިސްޓްރީން ވިދާޅުވީ، ހުއްދަ ހިފެހެއްޓުމުގެ އިތުރުން، މި މައްސަލާގައި ބަލަންޖެހޭ ކަންކަން ބެލުމަށްފަހު އުސޫލުގެ ތެރެއިން އެޅެންހުރި އެންމެހައި ފިޔަވަޅުތައް އެ ކުންފުންޏާ މެދު އަޅާނެ ކަމަށެވެ. އަދި މިހާތަނަށް ނުފުރި ތިބި އުމްރާވެރިންނަށް އެހީތެރިކަން ފޯރުކޮށްދެވޭނެ ގޮތްތައް ބަލަމުންދާ ކަމަށްވެސް މިނިސްޓްރީން ވިދާޅުވިއެވެ.
އުމްރާގެ އަޅުކަމަށް ނުފުރިފައި ތިބި ދިވެހިން ފުރުވާލުމުގެ މަސައްކަތް ސަރުކާރުން ފަށާފައިވާކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވަނީ ވިދާޅުވެފައެވެ. މިގޮތުން އެކި ގައުމުތައް މެދުވެރިކޮށް ޓްރާންސިޓްކޮށް ދަތުރުކުރަން އުޅުނު 150 އެއްހާ ދިވެހިންނަށް މި މައްސަލަ ވަނީ ކުރިމަތިވެފައެވެ.
އިސްލާމިކް މިނިސްޓްރީ އާއި ހައްޖު ކޯޕަރޭޝަން އަދި މޯލްޑިވިއަން ގުޅިގެން މިކަމަށް އަވަސް ހައްލެއް ހޯދުމަށް ދަނީ މަސައްކަތް ކުރަމުންނެވެ. މިނިސްޓަރު ވިދާޅުވި ގޮތުގައި ފްލައިޓެއް ޗާޓަރު ކުރެވިއްޖެ ނަމަ، މިހާރު ނުފުރި ތިބި މީހުންގެ އިތުރުން އިތުރު މީހުންނަށް ވެސް ޖާގަ އޮތް މިންވަރަކުން ފުރުސަތު ދިނުމަށް ވަނީ ހަމަޖެހިފައެވެ.
މި މައްސަލަ މިހާރު މޯލްޑިވްސް ޕޮލިސް ސާވިސްއިންވެސް ދަނީ ސީރިއަސް މައްސަލައެއްގެ ގޮތުގައި ތަހުގީގު ކުރަމުންނެވެ.
