ކުރީގެ ރައީސް މުޙައްމަދު ނަޝީދު މޯލްޑިވިއަން ޑިމޮކްރެޓިކް ޕާޓީ(އެމްޑީޕީ)ގެ ހިންގުމުގައި ބައިވެރިކުރުމަށް އެއްބަސްވެ، ޕާޓީގެ ވަގުތީ ޗެއާޕާސަން އަބްދުލްޣަފޫރު މޫސާ މަގާމުން ދުރުކުރުމަށް ހުށަހަޅާފައިވާ މައްސަލަ ރޭ ބޭއްވި ގައުމީ މަޖިލީހުގެ ސިއްރު ބައްދަލުވުމެއްގައި އަނބުރާ ގެންގޮސްފިއެވެ.
ގައުމީ މަޖިލީހުގެ ސިއްރު ބައްދަލުވުމަށްފަހު، އެ މަޖިލީހުގެ ވަޓްސްއެޕް ގްރޫޕުގައި ކުރީގެ ޗެއާޕާސަން ފައްޔާޒް އިސްމާއީލް ވަނީ ޣަފޫރާ ދެކޮޅަށް އޮތް މައްސަލަ ނެގިކަން ކަށަވަރުކޮށްދެއްވާފައެވެ. ހަމައެއާ އެކު، ޕާޓީގެ ޑެޕިއުޓީ ޗެއާޕާސަން އިބްރާހީމް ވަހީދު މަގާމުން ވަކިކުރުމަށް ޣަފޫރު ފޮނުއްވި ސިޓީ ވެސް މިހާރު ބާތިލުކުރައްވާފައިވާ ކަމަށް އޭނާ ވަނީ ވިދާޅުވެފައެވެ.
މި ބަދަލުތައް އައިސްފައި ވަނީ، ޕާޓީގެ އިސް ސަފުގައި ހުރި ހިޔާލުތަފާތުވުންތައް ނައްތާލައި، ކުރީގެ ރައީސް ނަޝީދުގެ ހިއްސާ ޕާޓީގެ ނިންމުންތަކުގައި ހިމެނުމަށް އިސްވެރިންގެ މެދުގައި ފުޅާ ދާއިރާއެއްގައި މަޝްވަރާކުރެވުމަށް ފަހުގައެވެ. ރޭގެ ނިންމުންތަކާ އެކު، އެމްޑީޕީގެ އިދާރީ ހިންގުމަށް އެޅިފައިވާ ހުރަސްތައް ނައްތާލެވި، ޕާޓީގެ މަސައްކަތްތައް އަލުން ހަލުވިކަމާ އެކު ކުރިއަށްދާނެ ކަމަށް އާންމު މެންބަރުން ދެކެއެވެ.
