އެންމެ އުތުރުގެ ތިން އަތޮޅުން އެލްޖީއޭގެ ބޯޑަށް ކުރިމަތިލުމަށް ހުޅުވާލި ފުރުޞަތުގައި ހދ އަތޮޅު ކައުންސިލުގެ ދެމެމްބަރަކު އެމަގާމަށް ކުރިމަތިލައިފި

އިބްރާހިމް ހަމީދު

ލޯކަލް ގަވާރމަންޓް އޮތޯރިޓީ (އެލްޖީއޭ)ގެ ބޯޑަށް އެންމެ އުތުރުގެ ތިން އަތޮޅުން މެމްބަރަކު ހޮވުމަށް ބާއްވާ އިންތިހާބަށް ހދ އަތޮޅު ކައުންސިލުގެ ދެމެމްބަރަކު ކުރިމަތިލައިފިއެވެ.

ހދ އަތޮޅު ކައުންސިލުގެ ނައިބު ރައީސް ވިދާޅުވީ އެލްޖީއޭގެ ބޯޑަށް މެމްބަރަކު ހޮވުމަށްޓަކައި އެންމެ އުތުރުގެ ތިން އަތޮޅަށް ހުޅުވާލި ފުރުޞަތުގައި އެކައުންސިލުގައި ހިމެނިވަޑައިގަންނަވާ އެމްޑީޕީއަށް ނިސްބަތްވާ ދެމެމްބަރަކު ކުރިމަތިލާފައިވާކަމަށެވެ. އެދެބޭފުޅުންނަކީ ހދ އަތޮޅު ކައުންސިލުގެ ކުޅުދުއްފުށީ ދެކުނު ދާއިރާ ތަމްސީލު ކުރައްވާ މެމްބަރު އަދި އެކައުންސިލުގެ ރައީސް  އާދަމް ވަހީދު އާއި ވައިކަރަދޫ ދާއިރާގެ އަތޮޅު ކައުންސިލު މެމްބަރު ހުސެއިން ރަޝީދު އެވެ.

ލޯކަލް ގަވަރމަންޓް އޮތޯރިޓީއަށް ހދ. އަތޮޅުން އެމްޑީޕީގެ ދެ ކައުންސިލަރުން ވާދަކުރައްވާއިރު ހއ. އަތޮޅުން އެމްޑީޕީގެ އެއް ކައުންސިލަރަކާއި ށ. އަތޮޅުން ޑީއާރުޕީގެ އެއް ކައުންސިލަރަކު ބައިވެރިވާ ކަމަށް އަހްމަދު ހަލީލު މައުލޫމާތު ދެއެވެ.

އެލްޖީއޭގެ އެންމެ އުތުރުގެ ތިން އަތޮޅު ހިމެނޭ ދާއިރާގެ އިންތިހާބު ބާއްވަން ހަމަޖެހިފައިވަނީ މިމަހުގެ 26 ވަނަ ދުވަހުގެ ހެނދުނު 11:00 އިން 11:30 އަށެވެ. ވޯޓުލުން އޮންނާނީ އެއަތޮޅެއްގެ އަތޮޅު ކައުންސިލުގެ އިދާރާގައެވެ.

ލޯކަލް ގަވަރމެންޓް އޮތޯރިޓީގައި ނުވަ މެމްބަރުން ތިއްބަވާއިރު އޭގެ ތެރެއިން ހަތަރު މެމްބަރުންނަކީ އަތޮޅު ކައުންސިލަރުންގެ ތެރެއިން އިންތިހާބުކުރާ ހަތަރު މެމްބަރުންނެވެ.