އާދަޔާ ޚިލާފު ސިފަތަކެއް ލިބިފައިވާ ބޯވަ

.

އަބްދުލް ވާހިދު ޙަސަން

ބޯވައަކީ ކަނޑުގައި ލެއްވި ވަރަށް އާދަޔާ ހިލާފު ދިރުމެކެވެ. ބޯވައަކީ މޯލަސްކާ ގުރޫޕަށް ނިސްބަތްވާ ކަނޑުގެ ދިރުމެކެވެ. ބޯވައިގެ 289 ވައްތަރު ދުނިޔޭގައި އުޅެއެވެ. ބޮޑު ބޮލަކާއި 8 ފަޔާއި އަދި ދެލޮލާއެކު ގުރާގެ އަނގަޔާ ވައްތަރު ގެ އަނގައެއް ބޯވައަށް ލިބިފައިވެ އެވެ. ބޯވައިގެ އާންމު ކާނާއަކީ ކުދި ކަކުންޏާއި ކުދި މަހެވެ. ކަނޑުގެ ހުރިހާ ހިސާބަކުން ވެސް ބޯވަ ފެނިފައި އެބަހުއްޓެވެ. އެގޮތުން ކަނޑުގެ އެންމެ ފުނުން ފެށިގެން އެންމެ ތިލަ ތަންތަނުން ވެސް ބޯވަ ފެނިފައި އެބަހުއްޓެވެ. ބޯވައިގެ ހަށިގަނޑުގައި އެއްވެސް ކަށްޓެއް ނުހުރެއެވެ. އޭގެ ސަބަބުން އެއްވެސް އުނދަގުލާއި ނުލައި ވަރަށް ހަނި ދޭތެރެ ތަކުން ބޯވައަށް ދަތުރު ކުރެވެއެވެ.

އެހެން ކަނޑުގެ ދިރުންތަކާ ހިލާފަށް ބޯވައިގެ ލޭގެ ކުލައަކީ ނޫކުލައެވެ. ބޯވައަކީ ވަރަށް ވިސްނުން ތޫނު މަޙުލޫގެކެވެ. ތަފާތު ކުލަ އާއި ޑިޒައިންތައް ވަރަށް ފަސޭހަ ކަމާއި އޭތި ދެނެގަނެ އެވެ. އަދި، އެއްފަހަރު ފެންނަ އެއްޗެށް ދެ އަހަރު ވަންދެން ހަނދާނުގައި ހުރުމުގެ ގާބިލުކަން ބޯވައިގެ ހުރެއެވެ. ބޯވައިގެ ފައިތައް ބޭނުން ކޮށްގެން ފަސޭހަކަމާއެކު ފުޅި ފަދަ އެއްޗެހީގެ މަތިގަނޑު ނަގައެވެ.

ބޯވަ އަކީ ކެމަފުލާޖްގެ ރަސްގެފާނެވެ. ބޭނުން ވެއްޖެ ކޮންމެ ވަގުތަކު ބޯވައިގެ ކުލަ މާހައުލާ އެއްކުލައަކަށް ބަދަލު ކޮށްލައެވެ. އެހެން ވުމުގެ ސަބަބުން ދުޝްމަނުންގެ ކިބައިން ސަލާމަތްވުމަށް ފަސޭހަވެ އެވެ. އެކި ފަހަރު ބޯވަ ދުޝްމަނުންގެ ކިބަައިން ސަލާމަތްވުމަށް ބޭނުން ކުރަނީ ތަފާތު އުކުޅު ތަކެވެ. އެގޮތުން ބައެއްފަހަރު ގަދަ އަޅި ކުލައިގެ ކުލަގަނޑެއް ދޫކޮށްލައެވެ. މީގެ ސަބަބުން ބޯވައަށް ސަލާމަތްވުމަށް ފަސޭހަ ވެއެވެ.

ބޯވައިގެ އެންމެ ދިގު އުމުރަކީ، 5 އަހަރެވެ. އެއީ ވެސް ދަރިމައި ނުވާ ބޯވައިގެ އެންމެ ދިގު އުމުރެވެ. ފިރިހެން ބޯވަ ބިސް ދޭތާ ކުޑަ ވަގުތު ކޮޅެއް ފަހުން މަރުވެއެވެ. އެއަށްފަހު އަންހެން ބޯވަ ދަރިމައި ވުމުން ރައްކާތެރި ތަނެއް ގައި ބިސް އަޅައެވެ. ބޯވަ ބިސް އަޅާ ކޮންމެ ފަހަރަކު 20000 އާއި 100000 އާ ދެމެދުގެ އަދަދަކަށް ބިސް އަޅައެވެ. އަދި ބިސްތަކަށް ނުރައްކަލެއް އާދޭތޯ ފާރަލާ ބަލަން އޮވެއެވެ. މައި ބޯވަ ބިސްތައް ބެލެހެއްޓުމުގައި ހޭދަކުރާ ދުވަސްތަކުގައި ބިސްތައް ނުފެންނަ ހިސާބަކަށް އެންމެ ހިނދު ކޮޅަކަށް ވެސް ނުދާނެއެވެ. އެސޮރަށް އެދުވަސް ތަކުގައި ކާނާ ބޭނުމެއް ނުވެއެވެ. ބިސް އަޅާތާ 150 ދުވަހާއި 250 ދުވަސް ތެރޭގައި ބިސްތަކުން ކުދި ބޯވަތައް ނިކުމެއެވެ. ކުދި ބޯވަތައް ނިކުންނަތާ ހަފްތާއެއްގެ ތެރޭގައި މައިބޯވަ މަަރުވެއެވެ.

އެންމެ ބޮޑެތި ބޯވަ ދިރިއުޅެނީ ޕެސިޕިކް ކަނޑުގަ އެވެ. ޕެސިފިކް ކަނޑުގައި އުޅޭ ބައެއް ބޯވާގެ ބަރުދަނުގައި 15 ކިލޯ ހުރެއެވެ. އަދި ކޮންމެ ފަޔެއްގެ ދިގުމިނުގައި 14 ފޫޓް ހުރެއެވެ. މިހާތަނަން ފެނިފައިވާކަމަށް ރިކޯޑް ކުރެވުނު އެންމެ ބޮޑު ބޯވައިގެ ބަރުދަނު ގައި 272 ކިލޯ ހުރިއިރު ކޮންމެ ފަޔެއްގެ ދިގުމިނުގައި 30 ފޫޓް ހުއްޓެވެ.