ސައިފް ރަސްގެފާނު ވާހަކަ (4)

.

އޮކްޓޯބަރ 27 ވަނަ ދުވަހުގެ ބަޔާ ގުޅޭ

ބައުލަބަކް ރަސްގެފާނަކީ ހިތްވަރުފުޅުގަދަ ހިފުމުގެ އުކުޅުތަކަށް ލޯފުޅުހުޅުވޭ، ކުޅަދާނަ، އަލިފާނުގެ ބާރުގަދަ ގަދަފަދަ ބާރަކުން ނޫނީ ބަލިކޮށްނުލެވޭވަރުގެ ގަދަފަދަ ބަޠަލެކެވެ. އެކަން އެހެންހުރުމާއިއެކުވެސް އެބޭފުޅުން އެގޮތުގެމައްޗަށް އެއްބަސްވެވަޑައިގެން އެދުވަހުން ދެންއޮތްހާއިރެއް އުފާފާޅުކުރެއްވުމާއި ހިނިފުޅު ވެޑުވުމުގައި ވޭތުކުރައްވައިފިއެވެ. ރޭގަނޑުގެ އަނދިރިކަން އައިސް ކުރިމަތިލީހިނދު ކޮންމެބައެއްވެސް އެބައެއްގެ މަކާނަށް އެނބުރި ރުޖޫޢު ވެއްޖެއެވެ. ޖެހިގެންއައިދުވަހު ދެލަޝްކަރު ހަނގުރާމައަށް ސަފުހަދައި ހަނގުރާމައިގެ ބެރުތައް ތަޅައިގަތުމާއެކީ އެންމެފުރަތަމަ ސަވާރުވެގެން ހަނގުރާމައިގެ މައިދާނަށް ނުކުމެވެޑައިގަތީ ބައުލަބަކު ރަސްގެފާނެވެ.

މިރަސްގެފާނު މައިދާނުގައި އަސްކޮޅު ދެއަތަކަށް ސޮއްސައިލައްވައި މުބާރިޒާ ކުރުމަށް ގޮވައިލެއްވުމާއެކީ ޒީޔަޒަން ރަސްގެފާނު ނުކުމެވަޑައި ގެންފިއެވެ. އޭރު ބައުލަބަކުގެ އަތްޕުޅުގައިވާ ލޮންސި އަލިފާނުގެ ހުޅުގަނޑެއް ފަދައެވެ. ޒީޔަޒަން ރަސްގެފާނު ހަމަލާދެއްވީ ދިގުވެގެންވާ ދަގަނޑު ތަނބަކުންނެވެ. އަދި ވިދާޅުވިއެވެ. އަޅުގަނޑު މިހުރީ ހަނގުރާމައަށް އައިހެވެ. ދެން ކޮންމެ ރަސްކަލަކުވެސް އެރަސްކަލެއްގެ އަތްޕުޅުގައިވާ ހަތިޔާރަކުން ބޭނުންކުރައްވާން ފައްޓަވައިފިއެވެ. ކޮންމެ ފަރާތަކުންވެސް އެބަޠަލެއްގެ ހުރި ހިތްވަރަކާއި ފެންވަރެއްނެރެ ދައްކަވަނީއެވެ. ބަލާ އަޖާއިބުވެ ހައިރާންވެއްޖެއެވެ. އަނގައިގެ ކުޅުހިކި ކުރަކިވެއްޖެއެވެ. އެއްބޭފުޅަކު އަނެއްބޭފުޅަކާ ޖެހިގަންނައިރު ދެފަރުބަދަ އައިސް ޖެހެނީހެން ހީވެއެވެ. ނަގާ ހިރަފުހުން އެތައްއިރެއްވާނދެން ބަލަންތިބޭ މީހުންގެ ލޯތަކަށްވަނީ ޣައިބުވެ ފޮރުވިފައެވެ. މިފަދަ މީހުންގެހިތްތައް ސިއްސުވާފަދަ ހަނގުރާމައެއް ހަވީރުވެއްޖައުމަށް ދާނދެންވެވުމަށްފަހު، ރޭވެ އަނދިރިވުމުން ދެބޭފުޅުން ވަކިވެވަޑައިގެން ސަލާމަތްކަމާއެކީ އެބޭފުޅެއްގެ ފޭލިގެއަކަށް އެބޭފުޅަކު އެނބުރި ވަޑައިގެންފިއެވެ. އަދި އަމާންކަމާއެކީ އަވަހާރަފުޅު ލެއްޕެވުމަށްފަހު ފަތިސްވުމުން ތެދުވެވަޑައިގެންފިއެވެ. އެހާރު ދެފަރާތުގެ ލަސްކަރު ތައްޔާރުވެ ސަފުތައް ރުކުރުވައި ލައްވަފިއެވެ. ދެން ބައުލަބަކް މައިދާނަށް ނުކުމެވަޑައިގެން ދެފަރާތަކަށް އަސްދުއްވާލުމަށްފަހު މުބާރިޒާ ކުރުމަށް އެދިވަޑައިގެންފިއެވެ. އެވަޤުތު ޒީޔަޒަން ރަސްގެފާނު ސަވާރުވެގެން މައިދާނަށް ނުކުމެވެޑައިގަންނަވާ ހަމަލާ ދެއްވައިފިއެވެ. ދެން ތަޅާފޮޅުމާއި އޮޅުލުމާއި ބެއްދުމުގައި ދުވާލުގެ ގިނަވަޤުތުތައް ހޭދަކުރައްވައިފިއެވެ. މިގޮތުގައި ހަވީރު ވެއްޖައުމަށް ދާންދެން މީސްތަކުންގެ ބުއްދިތައް ހައިރާން ކުރާފަދަ ހަނގުރާމައެއް ދެފަރާތުން ހިންގުމަށްފަހު ދެބޭފުޅުން ވަކިވެވަޑައިގެންފިއެވެ. އެއްބޭފުޅަކަށްވެސް އެބޭފުޅެއްގެ “ދެކޮޅުވެރިޔާ” އަތުލައި ގަނެވޭގޮތެއް ނުވިއެވެ.

ތިންވަނައަށްވީދުވަހު ދެބަޠަލުން ހަނގުރާމައިގެ ބިމުން ބައްދަލުކުރެއްވީ ކުރީދުވަސްދުވަހާއި ޚިލާފް ބާރަކާއި ޖޯޝަކާ އެކުގައެވެ. ދެފަރާތުން ދެފަރާތަށް ބަދަލުވަމުންދާ އެތިފަހަރުތައް ހޫނުވެފައި ބާރުގަދައެވެ. ހަމަލާތައް ވަރުގަދަވެފައި ބިރުވެރިކަން ބޮޑެވެ. ކޮންމެ ބަޔަކަށްވެސް ހީވެފައި އޮންނަނީ ގަދަވާނީ އެބައެއްގެ ސާހިބާކަމަށެވެ. މިގޮތުގައި ދަމަކަށް އިރުއެރިތަނާ ބައުލަބަކުގެ ހަށިކޮޅަށް ލޮޑުކަން ލިބޭން ފަށައިފިއެވެ. އަތްފައިންޕުޅުން ކަންނެތްކަންލިބި ހިތްވަރުފުޅު ބަލިވާން ފަށައިފިއެވެ. ދެން ޖަންގައްޔާވީފަރާތައް އަސް އަނބުރާލައްވާ، ފިލައިވަޑައިގަތުމަށް ދުއްވާލެއްވީއެވެ. އެމަނިކުފާނު މިފަހަރު ސަލާމަތްވެ ވަޑައިގަންނަވާނޭ ކަމަކަށްވެސް އެއްގޮތަކަށްވެސް ނުހިއްތަވައެވެ.

މިގޮތުގައި ބައުލަބަކް ދަތުރުކުރައްވާތާ ދެވަނައަށްވީދުވަހު ކުރިމަތީން ވަރަށް ވަރުގަދަ ހިރަފުހެއް ދައްކާލައިފިއެވެ. ދެން ހިރަފުސްގަނޑު މައްޗައް އަރައިގެންގޮސް އޮބާލިތާ ސާއަތެއްގެފަހުން އެދިމާއިން ހައިބަބޮޑު ސިންގާއެއް ފާޅުވެއްޖެއެވެ. އެސޮރުހިނގާ ކުރިއަށް އަންނައިރު އޭތީގެ ދެލޯ އަނގުރު އަލިފާންގަޑެއްކަހަލައެވެ. އަދި އޭގެ ދަތްތަކާއި ވަކިތައް ނެރެގެން ވައްވައް ޖަހަމުން ކުރިޔަށް އައިއިރު ހީވަނީ ވިދުވަރެއް ހެންނެވެ. ބައުލަބަކު ރަސްގެފާނު މިސިންގާ ދެކެވަޑައިގަތްހިނދު އެސޮރު އަންނަނީ އެމަނިކުފާނަށް ކުރިމަތިލައިގެންނެވެ. އަދި ހަމަ އިސާހިތަކު އެމަނިކުފާނުގެ ވަރަށް އަރިހަށްއައިސް ކުރިމަތީ ދެއަތްދަމާލައި ފުންމައިގެންގޮސް ބައުލަބަކުގެ ގައިކޮޅަށް އަރައިގެންފިއެވެ. އަދި އެސޮރު ވަކިތަކުން އެމަނިކުފާނު އަރިކަށި ނޮޅާލައި މަސްތައް ލުދައިގެންފިއެވެ. ހަމައެވަޤުތު ބައުލަބަކް އަބަދައްޓަކައި މިދުނިޔެއިން ވަކިވެ ނިމިހިނގައްޖެއެވެ.

ދެން ޒީޔަޒަން ރަސްގެފާނު ކަންތައްކުރެއްވިގޮތަކީ ބައުލަބަކް ފިލައިގެން ދިއުމަށްފަހު އޭނާގެ ހުރިހާމުދައު އަތުލައްވައި ލަޝްކަރު ޤަތުލުކުރައްވައި ރަސްކަމާއި ޚަޒާނާ މިލްކު ކުރައްވައިގެން އެރަށުގައި ދުވަސްގަނޑެއް ވާންދެން ރަސްކަން ކުރައްވާން ހުންނެވީއެވެ. އޭގެފަހުގައި އެރަށަށް ވެރިއަކު ލައްވައި އެތާނގައިހުރި މުދަލުގެ ވިހިބައިކުޅަ އެއްބައި ހިއްޕަވައިގެން ދަތުރަށް ނުކުމެވެޑައިގަތީއެވެ. އަދި އަމާންކަމާއެކީ އެކަށީގެންވާ މުއްދަތެއްގައި ޙަބުޝްކަރަޔަށް ވާސިލްވެއްޖެއެވެ. އަދި އެތަނުން ކޯރުތައް ހިނގާފައިވާ ފެހިކަންގަދަ ތަނަވަސްބިމަކަށް އެބައިމީހުންނަށް ދެވިއްޖެއެވެ. ދެން ޒީޔަޒަން ރަސްގެފާނު މި މާތްވެގެންވީ ބިންގަނޑު ދެކެވަޑައިގެން ޙައިރާންފުޅުވެ އަޖާއިބުފުޅުވެގެން އެތާނގައި ޤާފިލާ މަޑުކޮށް ހީމާތައްޖަހާން އަމުރުފުޅު ކުރައްވައިފިއެވެ. އަދި އެތާގައި ނާޗަރަންގީގެ ކުޅިވަރުތައްކުޅެ އުފާވެރިކަން ފާޅުކުރެއްވިއެވެ. އަދި ޣައިބުގެ ކަންތައް ދެކެވޮޑިގެންވާ ހުސް ޠާހިރުވަންތަ މާތްރަސްކަލާނގެ ކުޅަދުންވަންތަ ކަމާއިމެދު އެކަލާނގެ ކިބަފުޅަށް ހަމްދާއި ޝުކުރު އަދާކުރެއްވިއެވެ. ދެން ޔަސްރިބު ވަޒީރަށް ބައްލަވައި ވިދާޅުވިއެވެ. އޭ ވަޒީރުއެވެ. އަބަދުވެސް ކަލެއަކީ ބުއްދިވެރި ކަންތައްތަކުގެ ޚަބަރުތައް ރަނގަޅަށްދަންނަ މީހެއްކަން ތިމަންމަނިކުފާނު ދެކެވަޑައިގަންނަވަމެވެ. މިހެންވެ ތިމަންމަނިކުފާނު މިވިދާޅުވާ ވާހަކަފުޅާއިމެދު ފެންނަގޮތެއް ސާފުކޮށް ބުނާށެވެ. އެހެނީ އަހަރެން ޤަސްދުކުރަނީ މިހިތްފަސޭހަ ބިންގަނޑުގައި ބިނާތައްހަދައި އެތާނގައި އަހަރެން ގަނޑުވަރެއް ތައްޔާރުކޮށް ދިރިއުޅެން ފަށައިގަތުމަށެވެ. އަދި އަހަރެންގެ ޤައުމުގެމީހުން އަހަރެންގެ ފަހަށްވެސް އުޅޭނޭ ތަނެއްކަމުގައި އެތަން ހެދުމަށެވެ.

ދެން ވަޒީރު ދެންނެވިއެވެ. މަނިކުފާނު އެދިވަޑައިގަންނަވާ ފަދަޔަކުން ކަންތައް ކުރައްވާށެވެ. އަޅުގަނޑަކީ މަނިކުފާނުގެ އަޅުންގެތެރެއިން ވާމީހަކީމެވެ. ދެންހަމަ އިސާހިތަކު މަސައްކަތްތެރިންނާއި މޭސްތިރން ހާޒިރުކުރައްވައި ރަސްގެފާނު އެބައިމީހުންނަށް އަމުރުކުރެއްވީ ރަށެއްބިނާކުރުމަށެވެ. ދެންފަހެ އެބައިމީހުން އާދޭހޭ ދަންނަވާފައިގޮސް އެމަސައްކަތް ވަރަށް އަވަހަށް ފަށައިގެންފޫއެވެ. ހިލަކޮށާމީހުން ހިލަކޮށައި ގާތަޅާމީހުން ގާތަޅާ، ވާކޮށާމީހުން ވާކޮށައި، އެބައެއްގެ މަސައްކަތުގައި އެބަޔަކު ހޯބޯނާރައި މަސައްކަތް ކުރެއެވެ. ވަރަށް އަވަހަށް ފާރުތައްރޭނި އިމާރާތްތަކުގެ ބިންގާއެޅި ސަހަރުތެރޭގައި ފެންކޯރުތައް ދުވާންފަށައިފިއެވެ. އަދި އެފެންކޯރުތަކުގެ އައްސޭރީގައި ގަސްތައްފަޅައި ބޮޑެތިވެ ވަރަށް ކުޑަކުޑަ މުއްދަތެއްގެތެރޭގައި ޚާރުބާރު ބޮޑުވެގެންވާ މަތިވެރި ރަށެއްކަމުގައި އެތަންވެއްޖެއެވެ.

ދެން މިރަށް ތައްޔާރުކުރެވި ނިމިއްޖެހިނދު ޒީޔަޒަން ރަސްގެފާނު ވަރަށްމަތިވެރި ދަރަޖައަކަށް އުފާފޅުކުރައްވައި އެމަނިކުފާނު އަޙުލުވެރިންނާއި އަސްކަރާއި ލަޝްކަރުގެ އެންމެހާ އަހުލުވެރީން އެރަށަށް ނަޤުލު ކުރުމަށް އަމުރުފުޅު ކުރައްވައިފިއެވެ. ދެން އެންމެހައި މީސްތަކުން، ވިދާޅުވިގޮތުގެމަތީން މިކަންތައްތައްކޮށް އެބަޔަކުގެ އަނބިދަރީންނާއި އަހުލުވެރިންނާއިގެން އެބަޔަކުއައިސް މިތާނގައި ވަޒަންވެރިވެ ނިމިއްޖެއެވެ. ދެން ޒީޔަޒަން ރަސްގެފާނު މިރަށަށް މަދީނަތުލް ހަމްރާއޭ ވިދާޅުވެ ނަންދެއްވައި އެކަމުގެ އުފަލުގައި ޖާފަތް ތައްޔާރުކުރައްވައި އެޖާފަތުގައި މާތްވެގެންވާ ފަރިއްކޮޅުތަކާއި، ސަރުބަތުތައް ހާޒިރުކުރެވި ދައުލަތުގެ ބޮޑުންނާއިއެކު ރަސްގެފާނު ފަރިއްކުޅުއްވާ، ހާއުފާވެރިކަން އިތުރުކުރެއްވިއެވެ. އަދި އެމަނިކުފާނުގެ އުމުރުފުޅުން ދެންއޮތްތަނެއްގައި މިރަށުގައި ވޭތިކޮށްލެއްވުމަށް ޤަސްދުކުރެއްވިއެވެ.

ދެން ޒީޔަޒަން ރަސްގެފާނު މިތާނގައި ރަސްކަން ކުރައްވަން ހުންނެވި ދުވަސްތަކުގެތެރެއިން އެއްދުވަހަކު ޔަސްރިބު ވަޒީރު ބަލާފޮނުވައިގެން ގެންނަވާފައި ވިދާޅުވިއެވެ. އޭ ވަޒީރެވެ. މާތްރަސްކަލާނގެ ދީލަތިވެވޮޑިގަތުމުގެގިތުން އަހަންނަށް ދެއްވާފައިވާ މުދަލުގެމައްޗަށް ކަލޭނިކަން ވިސްނާބަލާށެވެ. އެހެންކަމާއިއެކު މިހާރު އަހަރެން ގަސްދުކުތަނީ ދުނިޔޭގެ އެހެން ރަށްރަށަށް މީހުން ފޮނުވައިގެން ޚަބަރުތައް ނެގުމަށެވެ. އެއީ އަހަރެންނަކީ އެ އެންމެންގެ މައްޗަށް ހުކުމްކުރާ އެންމެބޮޑު ރަސްގެފާނުކަމުގައި ވުމަށްޓަކައެވެ. ދެން ވަޒީރު ދެންނެވިއެވެ. ތިޔަކަމުގައި އޮތީ މަނިއްޕުޅުގެ ހިތްޕުޅެކެވެ. އަޅުގަނޑަށް ކުރެއްވި އަމުރަކަށް އަޅުގަނޑު ކިޔަމަންވާނަމެވެ. އަދި އަޅުގަނޑު މިހާރު ރަމަލުވެރީން ރަމަލުޖައްސަވާ ފެނުނުގޮތެއް މަނިއްޕުޅުގެ އަރިހުގައި ދަންނަވާނަމެވެ. އަދި އަޅުގަނޑު ކިޔެވިފޮތްތަކުން އެނގިފައިވާގޮތުގައި ތަބާބިއާގެ ރަސްރަސްކަލުންގެތެރެއިން ރަސްކަލެއްގެ އަތްޕުޅުމަތީގައި ނޫހުގެފާނު ކުރެއްވި ދުޢާފުޅުގެ އަސަރު ހިނގަމުން ދާނެއެވެ. ފަހަރުގައި އެނަސީބުވެރި ބޭފުޅަކީ ތިޔަ އިއްޒަތްތެރި ސާހިބާކަމުގައި ވުންވެސް އެކަށީގެން ވެއެވެ.

ވަޒީރު މިދެންނެވި ވާހަކަތައް ރަސްގެފާނު އައްސަވައިފިހިނދު އެމަނިކުފާނުގެ މޫނުފުޅުން އުފާވެރިކަމުގެ ކުލަތައް ފެންނާން ފަށައިފިއެވެ. އަދި ހިނިފުޅު ވަޑުވައިލައްވާފައި ވިދާޅުވިއެވެ. ތިޔައީ އަހަރެންގެ ދަޢުލަތުގެ އެންމެއިސް ވަޒީރެވެ. އަދި ސަރުކާރުގެ ހުރިހާކަމެއް ތަދުބީރުކޮށް ހިންގާ މީހާއެވެ. ވީމާ ކަލެއަށް ފެންނަގޮތަކަށް ތިޔަކަން ކޮށްބަލާށެވެ. ދެން މިވަޒީރު ރަމަލު ޖައްސަވައި ބެއްލެވިހިނދު ތަބާބިއާގެ ރަސްރަސްކަލުންކުރެ އެއްވެސް ރަސްކަލެއްގެ އަނބިކަނބަލެއްގެ ބަނޑުފުޅުން އެދަރިކަލުން އަދި ފައިދާވީކަމަކަށް ނުފެނެއެވެ. ނަމަވެސް ޒީޔަޒަން ރަސްގެފާނަށް ލިބިވަޑައިގަންނަވާނޭ ބޭފުޅަކު ހަބުޝްކަރައާއި ސޫދާން ކަރައިގެމައްޗަށް ވެރިކަންކުރައްވާ އަދި ސާމް އިބުން ނޫހު އަލައިހިއްސަލާމް ގެ ބޭފުޅުންނަށް ޚިދުމަތްކުރާ ބަޔަކުކަމުގައި އެބައިމީހުން ލައްވާފާނޭ ކަމުގައި ފެނެއެވެ. ދެން މިރަމަލަށް ފެނުނުގޮތް ވަޒީރު ރަސްގެފާނަށް ދަންނަވައި އަދި މިކަމުގެ މުނާސަބަތުގައި ތަހުނިޔާއާއި މުބާރަކްބާދު ދެންނެވިއެވެ. ދެން ރަސްގެފާނު އެއްކަލަ ޖިޒީ ނެގުމުގެ ކަންތައް ހުއްޓަވާލައްވައި އަދި ޚާލިޤުވަންތަ ރަސްކަލާނގެ އިރާދަފުޅަށް އެމަނިކުފާނަށް ލިބިވަޑައިގަންނަވާނޭ ދަރިކަލެއްގެ ވަސީލަތުން މެދުވެރިވާނޭ އުފާފުޅުތަކަށް އުއްމީދު ކުރައްވަ ކުރައްވާ ހުންނަވައެވެ. އަދި ބޮޑުވަޒީރަށާއި އެހެނިހެން ވަޒީރުން އަމީރުންނަށާއި، ގާތްތިމާގެފުޅު ބޭފުޅުންނަށް މަތިވެރިވެގެންވާ ހަދިޔާއާއި އިނާމްތައް ދެއްވިއެވެ.

މިދުވަސްވަރު ހަބުޝްކަރައާއި ސޫދާން ކަރާގައި ވެރިއަކަށް ހުންނެވީ ސައިފް އަރުއަދު އޭ ކިޔުނު އަނިޔާވެރި ބޯހަރު ހަނގުރާމައިގާ ކުޅަދާނަކަންބޮޑު ބަޠަލެކެވެ. މިރަސްގެފާނު ވާހަކަފުޅު ދައްކަވާ އަޑުއަހައިފިމީހެއްގެ ހިތް ގުޑައިގެން ދާވަރުވެއެވެ. އަދި އޭނާގެ ހަށިގަނޑު ބޮޑުކަމުން ދެކޭމީހުން ބިރުން ފިތްކަނޑައިގެން ދާވަރުވެއެވެ. މިރަސްގެފާނުގެ އަރިއަހުގައި ނޯކަރުންނާއި ޣުލާމުން އަބަދުވެސް ވަރަށްގިނަ އަދަދަކަށް ތިބެއެވެ. މިބައިމީހުންނަކީ އެމަނިކުފާނު ތަނަކަށް ވަޑައިގަންނަވަނީނަމަ، އަބަދު އަރިހުގައި ދާންޖެހޭ މީހުންނެވެ. އަދި ހަނގުރާމަވެރި ގަދަފަދަ ބަޠަލުންވެސް އެރަސްގެފާނުދެކެ ބިރުގަނެއެވެ. މިކަމާއެކު އެމަނިކުފާނަށް ވެދުންކުރުމަކީ މިބައިމީހުން އާދަވެގެން ކުރާކަމެކެވެ. އެރަސްގެފާނުންގެ ރަށުގެނަމަކަށް ކިއިފައިވަނީ މަދީނަތުލް މުނައްވަރެވެ. އެރަށުގެ ދެބައިކުޅަ އެއްބައިވަނީ ކަނޑުގައެވެ. އަނެއްބައިވަނީ އެއްގަމުގައެވެ. މިރަސްގެފާނުގެ ލަސްކަރުގެ އަދަދަކީ 6 ލައްކައެވެ. އަދި އެރަސްގެފާނުގެ އަރިހުގައި ނަން މަޝްހޫރުވެގެންވީ ދެ ހަކީމުން ތިއްބެވެ. އެތަނުން އެކެއްގެ ނަމަކީ ސަޤަރުދޫސް ހަކީމްއެވެ. އަނެކެއްގެ ނަމަކީ ސަޤަރުދީސް ހަކީމްއެވެ. މިރަސްގެފާނުގެ އަރިއަހުގައި ހުންނަ ބޮޑުވަޒީރުގެ ނަމަކީ ބަހުރު ޤަފްޤާނުއްރީފް އެވެ. މިވަޒީރަކީ އިހުޒަމާނުގެ ފޮތްތައް ކިޔަވައިގެން ދުނިޔޭގެ މާޒީގެ ތާރީޚްގެ ތެރެއަށް ވެދެވަޑައިގެން ހުންނެވި ބޭކަލެކެވެ. އަދި އެފޮތްތަކުން މިވަޒީރަށްވަނީ އަދުނާން ވަންހައިން ފަހުޒަމާނަށް ނަބިއްޔަކު ފޮނުއްވޭނޭކަމާއި އެބޭކަލަކު ބަޔާންވެގެންވާ ތެދުމަގު ދައްކަވައި ހައްޤު ފާޅުކުރައްވާނޭކަން އެނގިލައްވާފައެވެ. މިހެންވެ މިވަޒީރު ހުންނެވީ އެބޭކަލަކަށް އީމާންވެ ލައްވައިގެން ނަމަވެސް އެކަން ވަންހަނާ ކުރައްވައިގެންނެވެ. މިދުވަސްވަރަކީ ގަދަ ކީރިތިވަންތަ މާތްރަސްކަލާނގެ ފިޔަވައި އިރުހަނދަށާއި ތަރިތަކަށް ޚާއްސަކޮށް ޒުޚުލަށް އަޅުކަންކުރާ ދުވަސްވަރެވެ.

(ނުނިމޭ)

ނޯޓް: ވާހަކައަކީ ހ.ވައިޖެހޭގޭ އަޙުމަދު ރަޝީދު، ސ.ހިތަދޫ އިބްރާހީމް ޝާކިރު، ގ.ކިޔަވާގޭ އަބްދުއްޝުކޫރު: 18 ޑިސެމްބަރ 1966 ގައި ދިވެހިބަހަށް ތަރުޖަމާކޮށް އަތުލިޔުމުން ލިޔެފައިވާ ވާހަކައެކެވެ.