ކުރުވާހަކަ – ފޮރުވިފައިވާ ހަގީގަތް

އާތިފާ އަހުމަދު

ސައިފް މާލެދާން ފުރަން ދޯޏަށްއެރީ އެއްގޮތަކަށްވެސް މާލެދާން ބޭނުންވެގެންނެއް ނޫނެވެ. ނަމަވެސް މާލެއިން ވަޒީފާ ހަމަޖެހިފައިވުމާއި މަންމަ އެދޭފަދައިން ކިޔަވައިގެން ބޭކާރު ދުވަސްތަކެއް ހޭދަނުކުރަން ވެގެންނެވެ. މަންމަ ދޫކޮށްލާފައި މާލެދާން ޖެހުމުން ދެރަވިއެވެ. އެހެން ނަމަވެސް މާލެ ދެވިއްޖެނަމަ އޭނާ ދެކެމުން އައި ވަރަށް ބޮޑު ހުވަފެނެއްގައި ހަޤީޤީ ކުލަ ޖެއްސުމަށް ފަހިވެގެންދާނެއެވެ. ދޯނި އޭގެ ހަލުވި ދުވެލީގައި މާލެދާން ފުރުމާއެކު، ސައިފަށް އޭނާގެ މަންމަ ޝަރާއާ ދިމާލަށް ބަލައިލެވުނެވެ. މަންމަގެ ދެލޯވަނީ ތެމިފައެވެ. ހަމައެއާއެކު ސައިފްގެ ހަނދާނަށް އައީ މީގެ ދުވަސްކޮޅެއް ކުރީގެ ހަނދާންތަކެވެ.

ލޯބިވާ މަންމައެއްގެ ލޯބިލިބިގެން ބޮޑުވި ކަމުގައިވިޔަސް، ސައިފް ހަނދާން ހުންނަންފެށީއްސުރެ އޭނާގެ ބައްޕައެއް ނުދެކެއެވެ. މަންމަގާތުން ވަރަށް ގިނައިން ބައްޕަގެ ވާހަކަ އަހައެވެ. އަދި ބައްޕަގެ މައުލޫމާތު އޮޅުން ފިލުވަން ވަރަށް މަސައްކަތް ކުރެއެވެ. ނަމަވެސް ގިނަފަހަރަށް މަންމަ އޭނާގެ އެއްވެސް ސުވާލަކަށް ޖަވާބެއް ނުދެއެވެ. މިހެން ދުވަސްތައް ވޭތުކުރަމުންގޮސް އެއްދުވަހަކު މަންމަ، ސައިފަށް ހުރިހާ ވާހަކަތަކެއް ކިޔައިދިނެވެ. ދަރިފުޅުގެ ބައްޕަ މަންމައާ ކައިވެނިކޮށްގެން ދިރިއުޅެން ބޭނުންވީ މާލޭގައެވެ. އެއީ ބައްޕަ ކުރިންވެސް އުޅެމުންދިޔައީ މާލޭގައި ކަމަށްވާތީއެވެ. ނަމަވެސް އެކަމާ މަންމަގެ އާއިލާއިން އެހާ ގަބޫލެއް ނުވިއެވެ. ހާއްސަކޮށް ކާފައެވެ. އެއީ ކާފަގެ ހުރި ހަމައެކަނި ދަރިއަކީ މަންމަ ކަމަށްވުމާއެކު އެމީހުންނާ ދުރަށް މަންމަ ދާން ނޭދޭތީއެވެ. އެހެން ނަމަވެސް ދުވަސްކޮޅަކު ރަށުގައި އުޅުމަށްފަހު މާލެ ބަދަލުވީމެވެ. އޭގެ ދެތިން އަހަރުފަހުން މަންމައަށް ދަރިފުޅުގެ ބައްޕަގެ ސިއްރު ކައިވެނި ހާމަވެގެން ދިއުމާއެކު، ދަރިފުޅު ގޮވައިގެން ރަށަށް ބަދަލުވީ ބައްޕަ ރާއްޖޭން ބޭރުގައި އުޅެނިކޮށެވެ. އޭގެ ދެތިންމަސް ފަހުން މަންމަމެން ހޯދުމަށް ބައްޕަ، ރަށަށް އައެވެ. ނަމަވެސް އޭރު މަންމައާއި މަންމަގެ ކުޑަ އާއިލާ އެހެން ރަށަކަށް ދިރިއުޅުން ބަދަލުކޮށްފިއެވެ. އެއީ ކާފަގެ އެދުމުގެ މަތިން ކާފަގެ ވިޔަފާރި ފުޅާކުރުމަށް ޓަކައެވެ.

މިހުރިހާ ވާހަކަތަކެއް ސިކުނޑިއަށް ވަނުމާއެކު، ސައިފްގެ ހިތުގައި ބައްޕައަށްޓަކައި އުފެދިފައިވާ ނަފްރަތުގެ އަލިފާންގަނޑު އަނދައިގަތެވެ. އަދި ކާފައާއި މަންމަ އޭނާއަށްޓަކައި ކޮށްދިން ކަންތައްތަކަށް ހިތުގެ އަޑިން ޝުކުރުއަދާކުރެވުނެވެ. މި ޚިޔާލުތަކުގައި އޮއްވައި ސައިފަށް ނިދުނީއެވެ. ހޭލެވުނީ ދޯނި މާލޭގެ ބަނދަރަށް ވަނުމާއެކު އެންމެންގެ ހޯބޯލެވުމުގެ އަޑާއެކުއެވެ.

މާލެއައިތާ 3ވަނައަށް ވީދުވަހު ސައިފް ވަޒީފާއަށް ނުކުންނަން ފަށައިފި އެވެ. އޮފީހަށް ނުކުންނަންފެށިތާ ގިނަ ދުވަސްތަކެއް ނުވަނީސް އޭނާއަށް ވަރަށް އެހީވެދޭ، ރަނގަޅު ރައްޓެއްސަކު ލިބުނެވެ. ފައިރަޒް އަކީ މީހުންނާ ވަރަށްގުޅޭ ވަރަށް މަޖާ މިޒާޖެއްގެ މީހެކެވެ. ފައިރަޒްގެ އެހީއާއެކު، ސައިފް އެންމެ ކުރާހިތްވާ އެއްކަންތައް ކަމުގައިވާ ފުޓުބޯޅަ ކުޅުމުގެ ފުރުޟަތެއް ހޯދުމަށް އޭނާ މަސައްކަތް ކުރަމުން ދިޔައެވެ. ސައިފަކީ ކުޅުމަށް މޮޅު ކުއްޖެއްކަމުން އެކަން ވަރަށް ފަސޭހަކަމާއެކު ކާމިޔާބުވެގެން ދިޔައެވެ. މިހާރު ސައިފަކީ ރާއްޖޭގެ މަޝްހޫރު ކުލަބެއްގެ ކުޅުންތެރިއެކެވެ. ސައިފްގެ މަންމަ މިކަމާ ހިތްހަމަ ނުޖެހުނު ނަމަވެސް، ސައިފްގެ ކޮންމެ އެދުމެއް ފުރިހަމަކޮށްދިނުމަކީ އޭނާގެ މަންމައަށް ލިބޭ ވަރަށް ބޮޑު އުފަލެކެވެ.

ދުވަސްތައް ފާއިތުވަމުންދެއެވެ. ކޮންމެ ދުވަހަކުވެސް އޮފީސް ނިންމާލުމަށްފަހު ސައިފް ކުޅެންދެއެވެ. މިހެން އުޅުމުގެ ތެރޭގައި ސައިފަށް، އެކުލަބުގެ ވެރިމީހާގެ ދަރިފުޅު، ފުވާދާއި ބައްދަލުވެވުނެވެ. ފުވާދު ކުޅެން އަންނަނީ ވަރަށް މަދުންނެވެ. އެހެންކަމުން ފުވާދު ކުޅެން ނާންނަ ސަބަބެއް އޮޅުން ފިލުވަން ސައިފް ބޭނުންވިއެވެ. ފުވާދު ކުޅުމަށް ޝައުގުވެރިކަން ނުހުންނަކަން އޭނާގެ ވާހަކައިން އެނގުނެވެ. ޝައުގުވެރިކަން ނުހުންނައިރު ކުޅެން އަންނަނީ ކޮން ބޭނުމެއްގައިތޯ ސައިފް ސުވާލުކޮށްލިއެވެ. ފުވާދުގެ ބައްޕައަކީ ކުރީގައި މޮޅު ފުޓުބޯޅަ ކުޅުންތެރިއެއް ކަމަށާއި އޭނާގެ ބައްޕަ ބޭނުންވަނީ ބައްޕަ ފަދައިން މޮޅު ކުޅުންތެރިއަކަށް ފުވާދުވުމަށްކަމަށް ފުވާދު ބުންޏެވެ. ފުވާދު ކިހާ ނަސީބުގަދަ ހެއްޔެވެ؟ އޭނާއަށް އެހީވެދޭން އޭނާގެ ބައްޕަ އެހުރީ ތައްޔާރަށެވެ. އެހެން ނަމަވެސް އަހަންނަށް އެހީވެދޭނެ މީހަކު ނެތެވެ. ސައިފްގެ ހިތަށް އެރިއެވެ. އަދި ސައިފަށްވެސް އެކަހަލަ ބައްޕައަކު ލިބުމަށްއެދި ހިތާހިތުން ދުޢާކޮށްލެވުނެވެ. ސައިފަށް އެފަދަ ބައްޕައެއް ލިބިފައި ނުވިކަމުގައި ވިޔަސް މިހާރު އޭނާއަކީ މުޅި ކުލަބުގައި ނަންވިދާ ކުޅަދާނަ ކުޅުންތެރިއެކެވެ.

ސައިފް މާލެއައިތާ 6 މަސްވީތަނާ ވަރަށް ކުއްލިގޮތަކަށް ކާފަ ނިޔާވެއްޖެއެވެ. އެދުވަހު ރަށަށްދާން ސައިފް ބޭނުންވިއެވެ. ލޯބިވާ ކާފަގެ މޫނު ދެކިލުމަށާއި ކާފަގެ ކަށުކަމާ ކެމީގެ ކަންތައްތަކުގައި ބައިވެރިވުމަށެވެ. އަދި މަންމަގެ ހިތާމަތައް ކުޑަކޮށްދިނުމަށްޓަކައެވެ. އެދުވަސްކޮޅަކީ، ރާއްޖޭން ބޭރުގައި ބާއްވާ ވަރަށް މުހިއްމު މުބާރާތަކަށްދިޔުމަށްޓަކައި ކުލަބު ތައްޔާރުވަމުންދިޔަ ދުވަސްކޮޅެވެ. އެހެންކަމުން ސައިފް، ފުވާދުގެ ބައްޕަ ފިރާޝްއާ ބައްދަލުކުރުމަށްޓަކާ އެގެއަށް ދިޔައެވެ. ފުވާދުގެ ބައްޕައަށް ހުރިހާ ވާހަކަތަކެއް ކިޔާދިނުމުން، ސައިފް ރަށަށް ފޮނުވުމަށްޓަކައި ހުރިހާ ހަރަދެއް ހަމަޖައްސާ ހެދީ އޭނާގެ އަމިއްލަ ދަރިއެއްކަމަށް ދެކިގެންނެވެ. ފިރާޝް ބޭނުންވާފަދަ ހިތްހަމަޖެހޭ ކުޅުމެއް ސައިފްގެ ފަރާތުން ފެންނަމުން ދާތީވެ، އޭނާގެ ދަރިއެއްކަމަށް ދެކެނީ ކަންނޭނގެއެވެ. ރަށަށް ދިއުމަށް ހުރިހާކަމެއް ހަމަޖެއްސުމަށްފަހު، މަންމަ ގޮވައިގެން ވީހާވެސް އަވަހަކަށް މާލެ އައުމަށް ފިރާޝް އެދުނެވެ. އަދި ސައިފްގެ ހިތާމައިގާ ކުލަބުގެ އެންމެން ބައިވެރިވާ ކަމަށް ބުންޏެވެ.

ރަށުގައި މަހެއްހާ ދުވަސް ހޭދަކޮށްލުމަށްފަހު މާލެދާން ސައިފް ފުރިއެވެ. މަންމަ މާލެދާން ބޭނުން ނުވިކަމުގައި ވިޔަސް، މަންމަ އެކަނި ރަށުގައި ބަހައްޓަން ބޭނުން ނުވާތީއެވެ. މާލެ އައިދުވަހުގެ އަނެއްދުވަހު، ކުލަބު ބޭރަށް ފުރުމުގެ ކުރިން ކުޅޭ އެންމެ ފަހު މެޗް އޮވެއެވެ. ސައިފަށް އެދުވަސްކޮޅު މާބޮޑު ޕްރެކްޓިސްއެއް ލިބިފައި ނުވިކަމުގައިވިޔަސް އެމެޗަށް ސައިފް އަރުވަން ފިރާޝްވެސް އަދި ކުލަބުގެ އެހެން ކުޅުންތެރިންވެސް ބޭނުންވެއެވެ. އެހެންކަމުން މެޗް ބެލުމަށްޓަކައި މަންމަ ގޮވައިގެންދާން މަންމަ އެދުމުން، ސައިފް އޭނާގެ މަންމައާއެކު ދަނޑަށްދާން ނުކުތެވެ.

ދަނޑަށް ވަރަށް ގިނަ އަދަދެއްގެ މީހުންވަނީ ވަދެފައެވެ. އިރުކޮޅެއް ފަހުން މެޗް ފަށައިފިއެވެ. ސައިފަކީ މުޅި ކުލަބުގައިވެސް ފާހަގަކޮށްލެވޭ ކުޅުންތެރިއަކަށް ވީނަމަވެސް ފުރަތަމަ ހާފް ނިމިގެން ދިޔައިރުވެސް އެއްވެސް ބޯޅައެއް ގޯލަށް ފޮނުވާލެވޭ ގޮތެއް ނުވިއެވެ. ފުރަތަމަ ހާފްނިމި ދެވަނަ ހާފަށް ފެށިއިރު ކޮންމެ ކުޅުންތެރިއަކުވެސް މަސައްކަތްކުރަމުން އައީ ބޯޅަ ގޯލަށް ފޮނުވާލެވޭތޯއެވެ. ނަމަވެސް އެކަން ކާމިޔާބުވާގޮތެއް ނުވިއެވެ. މެޗް ނިމެން ވަރަށް ކައިރިވެފައިވަނިކޮށް ސައިފް ފޮނުވާލި ފޮނުވައިލި ބޯޅަގޮސް ގޯލުގެ ދާގަނޑުގައި ޖެހުމާއެކު މުޅި ދަނޑު ގުގުމާލީ ސަޕޯޓަރުންގެ ހަޅޭކުގެ އަޑުންނެވެ. ހަމައެއާއެކު މެޗްގެ ކުޅުން ނިންމާލައިފިއެވެ. ފިރާޝްއާއި ހުރިހާ ކުޅުންތެރިން ސައިފަށް ތައުރީފް ކުރިއެވެ. އަދި ފިރާޝް އައިސް ސައިފްގެ ގައިގައި ބައްދާލިއެވެ. މިމަންޒަރު ބަލަން ހުރި ޝަރާއަށް ކޮޅަށް ތެދުވެވުނެވެ. ފެނުނު މަންޒަރަކުން ޤަބޫލުކުރަން ދަތިވެގެންނެވެ. ނަމަވެސް އޭނާއަށް އެފެނުނީ ހަމަ ފިރާޝްއެވެ. ކުއްލިއަކަށް ސައިފް އޭނާއާއި ދިމާލަށް އިނގިލި ދިއްކޮށްލިތަން ފެނުނެވެ. ފިރާޝް އަށްވެސް ލިބުނީ ހައިރާން ކަމެކެވެ. އޭނާގެ ދަރިފުޅު އޭނާއާއި އެހާގާތުގައި އުޅުނުއިރު އެއީ އޭނާގެ ދަރިއެއްކަންވެސް ނޭނގެއެވެ. ސައިފް، ފިރާޝްއާއެކު މަަންމަގާތަށް ދިޔުމަށް ހިނގައިގަތެވެ. އޭރުވެސް ފިރާޝް ހުރީ ހައިރާން ކަމެއްގެ ތެރޭގައެވެ. ސައިފަށް މަންމަގެ މޫނު ފެނުމާއެކު ހައިރާންކަމާއެކު ބަލައިލެވުނެވެ. އަދި ހަމައެވަގުތު ފިރާޝްގެ މޫނުމަތިން ފެންނަމުންދިޔަ ހައިރާންކަން ފެނުމާއެކު އަނެއްކާ ސައިފްގެ ހައިރާންކަން އިތުރުވެގެން ދިޔައެވެ. އަދި ފިރާޝް ދަރިފުޅާއޭ ކިޔާ ސައިފްގެ ގައިގައި ބައްދާލިއެވެ. ސައިފް ގުޑިނުލާ ހުރިއިރު އޭނާގެ ހިތުގައި ބައްޕައަށްޓަކައި އުފެދިފައިވާ ނަފްރަތުގެ ހުޅުގަނޑު ނިވިފައިވާ ކަހަލައެވެ.

އިރުކޮޅަކުން ފުވާދު ބައްޕާއޭކިޔާ ގޮވާލިއެވެ. މީގެ ކުރިން ފިރާޝްވަނީ ހުރިހާ ވާހަކަތަކެއް އޭނާގެ ދަރިފުޅު ފުވާދަށް ކިޔާދީފައެވެ. ފިރާޝް ދަރިފުޅާއޭ ކިޔާފައި ސައިފް ގައިގައި ބައްދާލިއިރު ފުވާދު ހުރީ އެތާ ކައިރީގައެވެ. އިރުކޮޅަކުން ޝަރާ، ފިރާޝް އާއި ދިމާއަށް އެނބުރިފައި ރުޅިވެރިކަމާއެކު ސައިފްގެ އަތުގައި ހިފާ ހިނގައިގަތެވެ. އެވަގުތު ފުވާދު ގޮވާލުމުން އެމީހުން ހުއްޓުނެވެ. އަދި ފުވާދު ހުރިހާ ވާހަކަތަކެއް ކިޔައިދޭން މަސައްކަތް ކުރިއެވެ. ނަމަވެސް ޝަރާގެ އަޑުގައިވާ ރުޅިވެރިކަމާއެކު އެވާހަކަތައް ހުއްޓުވިއެވެ. އެހެން ނަމަވެސް ސައިފްގެ އެދުމުގެ މަތިން މަންމަ އެވާހަކަތައް އަޑުއަހަން ބޭނުންވިއެވެ. ފުވާދު ވާހަކަފެއްޓިއެވެ. ބައްޕަ އަހަރެންގެ މަންމައާއި ކައިވެނިކުރީ ކާފަގެ އެދުމުގެ މަތިންނެވެ. އެވާހަކަތައް ކިޔައިދޭން ބައްޕަ މަސައްކަތް ކުރިނަމަވެސް ސައިފްގެ މަންމަ އެވާހަކަތައް އަޑުނާހައި ރަށަށް ދިޔައީއެވެ.

މިހުރިހާ ވާހަކަތަކެއް ކިޔައި ނިމުމާއެކު ޝަރާގެ މޫނުމަތީގައިވާ ހިތްހަމަ ނުޖެހުން ފިލައިގެން ދިޔައެވެ. އަދި މިހާރު ފުވާދުގެ މަންމަ ދުނިޔޭގައި ނެތްކަމަށާއި އެގޭގައި ސައިފް އާއި އޭނާގެ މަންމަ އުޅުމަށް ފުވާދު އެދުނެވެ. އަދި ފިރާޝްވެސް މިކަމާ އެއްބަސްވިއެވެ. މިހާދުވަސް ވަންދެން ސައިފްގެ ހިތުގައި ބައްޕައާމެދު އުފެދިފައިވާ ހުޅުގަނޑުވަނީ ނިވިފައެވެ. އަދި މިހާރު ބައްޕަގެ ފޮރުވިފައިވާ ހަޤީޤަތް ސައިފަށް ހާމަވެއްޖެއެވެ.

ނޯޓު: މިއީ ކުޅުދުއްފުށި އޮންލައިން އާއި ޖަލާލުއްދީން ސްކޫލް ގުޅިގެން ބޭއްވި 3 ވަނަ ކުރުވާހަކަ ލިޔުމުގެ މުބާރާތުގައި އާތިފާ އަހުމަދު، ގްރޭޑް 12 އޭ، ލިޔެފައިވާ، އަދި މުބާރާތުގެ އެންމެ މޮޅު 15 ވާހަކައިގެ ތެރޭގައި ހިމެނޭ ވާހަކައެކެވެ. މި މުބާރާތުގެ ނަތީޖާ ފާޅުކުރުން އޮންނާނީ ރަމަޟާން މަސް ނިމުމުން ނެވެ.