އަދަބިއްޔާތު – މިޤައުމުގެ ޙާލަތާ މެދުގައި

އާދަމް އިބްރާހީމް ދުރުމީ، ހދ. ކުޅުދުއްފުށި

ރޮވޭ ގޮތްވޭ ލޮލުން، ވިސްނައިލުމުން އަދު ޙާލަތާ މެދުގައި

ފޮޅޭ މާތައް މިލައި އެދަނީ، ފިތުނަވެރި ހޫނު ރޯޅީގައި

ނެތޭ ޤަދަރެއް، ނެތޭ އަބުރެއް، ނެތޭ އަދު ޢިއްޒަތެއް ޝަރަފެއް

ނެތޭ އިންސާނަކަށް ލިބިދޭ ކަރާމާތެއް މި ފަސްގަނޑުގައި

މައިން ބަފައިންގެ ލޯތްބާ އަދި ދަރިންނާ އޮތް އެ މާތްގުޅުމާ

މުޅިން ދާތަން ފިލައިގެން އަދު ބަލަން ހުރެވޭހެ މާދުރުގައި

މިތާނގައި ކާބަފައިން އެކުގައި އުޅުނު ދޮންވެލި އެ ކުދި ރަށްތައް

ފަވާލެވިގެން ހިނގައިދާނޭ އިނގޭތޯ! ލޭގެ ކޯރެއްގައި

ހަސަދަޔާ ނަފްރަތާ ރުޅިޔާ އުފައްދަން މީސްތަކުންގެ ތެރޭ

ހަސަދަވެރި ބަސްތަކުން ހުޅު ރޯކުރަން ނޫޅޭށެ މިވަޠަންގައި

ނުދޭނަން ޖާގައެއް އަދި ފުރުޞަތެއްވެސް ދެން މި ފަސްގަނޑަކުން

ކުޅޭކަށް މާތްވިދީނާ ވަހުދަތާ، ތިބެގެން މި ފަސްގަނޑުގައި