އަދަބިއްޔާތު – ޙަޔާތުގެ ޚުލާޞާ…

އާދަމް އިބްރާހީމް ދުރުމީ. ހދ.ކުޅުދުއްފުށި

ޙަޔާތުގެ ޞަފްޙާ ތަކަށް ފުން ނަޒަރެއް މަށަށް ދެވިއްޖޭ

ޙަޔާތުގެ ކުރު ޚުލާޞާއެއް ކޮށްލަން މިއަދު ޖެހިއްޖޭ

**********************

ހާދަހާ ދަރުސެއް މަގޭ މި ޙަޔާތުގައި ލިބިއްޖޭ

ހާދަހާ ޢިބްރަތްތަކެއް ފެނި ހާމަވެ ހިނގައްޖޭ

ހާދަހާ ހިތްދަތި ކަމެއް ލިބިގެން ހިތަށް ހިނގައްޖޭ

ހާދަހާ ކަންތައް ތަކެއް ހިތި ތަޖުރިބާ ވެވިއްޖޭ

ފެންނަން އެދުނު ދުވަސްތައް މާޒީ ވެގެން ހިނގައްޖޭ

ފެންނަން ޅައިރު މަށަށް ތިބި ހަމަ އެކަކުވެސް ނެތިއްޖޭ

ފެންނާނެ މަށުގެ ހާލަތު އަދު ދެން ލޮލެއް ނެތިއްޖޭ

ފެންނަން މިއަދު މިތިބަ ބަޔަކަށް ވެސް ގޮތެއް ނެތިއްޖޭ

އުންމީދުތައް ހިތުގެ ކުރި ފޮނިވާނެޔޭ ހިތިއްޖޭ

އުންމީދު ކުރި އެތައްކަމެއް ގޮސް އޮޔާ ހިނގައްޖޭ

އުންމީދު ދެން އަލުން ކުރެވޭނޭ ގޮތެއް ނެތިއްޖޭ

އުންމީދަކުން ކުރާނޭ އެއްވެސް ކަމެއް ނެތިއްޖޭ

ދެން ދާން ޖެހޭ ތަނާމެދު ވިސްނަން މަށަށް ޖެހިއްޖޭ

ދެން ވާނެ އެއް ގޮތެއްވެސް ނޭނގޭ ވަރަށް އޮޅިއްޖޭ

ދެންދާނޭ މަގެއް ޙަޔާތުގެ ފެންނާކަށެއް ނެތިއްޖޭ

ދެންވެސް މަށަށް އެތައްގިނަ ފިކުރެއް ކުރަންޖެހިއްޖޭ

އަންނާނެބާ ޙަޔާތުގެ ދުވަހެއް މިނޫން ހިތިއްޖޭ

އަންނާނެ ދުވަހަކަށް ފޮނި ހުވަފެން ދެކެން ފެށިއްޖޭ

އަންނާނެކަން ޔަޤީންވާ ދުވަހެއް މަށަށް އެނގިއްޖޭ

އަންނާނެކަން ޔަޤީން މަރު އައުމަށް އެދެން ފެށިއްޖޭ