އަދަބިއްޔާތު – ބޭނުމެއް ނެތޭ

އާދަމް އިބްރާހީމް ދުރުމީ، ކުޅުދުއްފުށި

ރާގު: ހިޔަލަށް އެ ޤުލްޝަނުގެ އަދިވެސް ދާހިތޭ ވަނީ..

ތިޔަ ނަން އަލުން މި ހިތުގަ ލިޔަން ބޭނުމެއް ނެތޭ

ތިޔަ ރީތި ސޫރަ ހޯދާކަށް ބޭނުމެއް ނެތޭ

*****************

ހިތަށާ މެޔަށް ކަލާހެރި ތީރުގެ ތަދާއި ވޭން

ފިލުވާލަދޭށެ ބުނެ ރޯކަށް ބޭނުމެއް ނެތޭ

ފިސް ފިސްވެގެން ހިނގައްޖެ ހިތާ ނަފުސުވެސް މަގޭ

ޢިޝްޤުން އެދިން ޢަޒާބު އަލުން ބޭނުމެއް ނެތޭ

ނިންޖެއް ލޮލަށް ނަޔަސް ތިޔަ ހަނދުމައިގަ ދެން މިރޭ

އޮއްސެން އެދާ ހަނދުގެ އަލިކަން ބޭނުމެއްނެތޭ

މަސްތުން ދެހިތްވި ރޭގެ ހަނދާނާ އަސަރު އަލުން

އަޞްލެއް ނުވާ އުފާ އެގޮތުން ބޭނުމެއްނެތޭ

ޤުލްޝަން ތެރޭ ބަހާރުގެ މާތަށް ފަރިވެ ފޮޅޭ

ބުލް ބުލްގެ ފޮނި އަޑުން ރާގެއް ބޭނުމެއްނެތޭ