“24 ގަޑިއިރު” ތިލަދެކުނު ސިނަމާއަށް

ދިވެހި ފިލްމް “24 ގަޑިއިރު” ތިލަދެކުނު ސިނަމާގައި އެޅުވުމަށް ހަމަޖެހިއްޖެ އެވެ.

މި ނޫހަށް މައުލޫމާތު ދެއްވަމުން ފިލްމް އެސޯސިއޭޝަންގެ ރައީސް ސައީދު ވިދާޅުވީ މި ފިލްމް 6 ސެޕްޓެމްބަރުވާ ހޮނިހިރު ދުވަހުގެ ރޭ ތިލަދެކުނު ސިނަމާގައި އަޅުވަން ހަމަޖެހިފައިވާ ކަމަށާއި ޓިކެޓެއްގެ އަގަކީ 60 ރުފިޔާ ކަމަށެވެ.

މިއަދުން ފެށިގެން ޓިކެޓް ވިއްކަން ފަށާފައިވާއިރު ޓިކެޓް ލިބެން ހުންނާނީ “ޓޫ އެޗް ޓޫ” ފިހާރައިންނެވެ. އަދި އެއް ޝޯވ ފުލުވެއްޖެނަމަ ދެވަނަ ޝޯވ އެއްވެސް އަޅުވާނެ ކަމަށް ތިލަދެކުނު ސިނަމާގެ ފަރާތުން މައުލޫމާތުދިނެވެ.

މަޑުލު މުހައްމަދު ވަހީދުގެ ސްކްރީންޕްލޭއަކަށް ދަރާ މުހައްމަދު ރަޝީދު ޑައިރެކްޓްކޮށްފައިވާ “24 ގަޑިއިރު”ގައި ހަރަކާތްތެރިވަނީ މަޝްހޫރު ބަތަލް ޔޫސުފް ސަފީއު(ޔޫއްޕެ) އާއި އޮސްޓްރިއާގެ ބަތަލާއެއް ކަމަށްވާ ސާރާ އާއި ފާތިމަތު އަޒީފާ(އަޒޫ) އެވެ.

400،000ގެ ބަޖެޓަކުން އުފައްދާފައިވާ މި ފިލްމުގައި އޮސްޓްރިއާގެ ތިއާޓޭ އެކްޓަރެއް ކަމަށްވާ ސާރާ ހާއްސަ ރޯލަކުން ފެނިގެންދާއިރު ފިލްމުގެ ބޮޑު ބައެއްގައި އިނގިރޭސި ޑައިލޮގް ވެސް ހިމެނޭ ކަމަށް މައުލޫމާތު ލިބެ އެވެ.

އަމިއްލަ ރާގުގެ ލަވަތައް ހިމެނޭ މި ފިލްމުގެ ލަވަކިޔުންތެރިންނަކީ ތޭރަވާ، އުނޫޝާ އަދި ރިޒޫ އެވެ.