ދިވެހި ފިލްމް “އިންސާނާ” ތިލަދެކުނު ސިނަމާއަށް

ދިވެހި ފިލްމް “އިންސާނާ” ތިލަދެކުނު ސިނަމާގައި އެޅުވުމަށް ހަމަޖެހިއްޖެ އެވެ.

މި ނޫހާ ވާހަކަ ދެއްކަމުން ތިލަދެކުނު ސިނަމާގެ ފަރާތުން ބުނީ މި ފިލްމް 26 ސެޕްޓެމްބަރުވާ ހުކުރު ދުވަހުގެ ރޭ ތިލަދެކުނު ސިނަމާގައި އަޅުވަން ހަމަޖެހިފައިވާ ކަމަށާއި ޓިކެޓެއްގެ އަގަކީ 40 ރުފިޔާ ކަމަށެވެ.

މިހާރު ޓިކެޓް ވިއްކަން ފަށާފައިވާއިރު ޓިކެޓް ލިބެން ހުންނާނީ “ޓޫ އެޗް ޓޫ” ފިހާރައިންނެވެ. އަދި އެއް ޝޯވ ފުލުވެއްޖެނަމަ ދެވަނަ ޝޯވ އެއްވެސް އަޅުވާނެ ކަމަށްވެސް ތިލަދެކުނު ސިނަމާގެ ފަރާތުން މައުލޫމާތުދިނެވެ.

މަޝްހޫރު އެކްޓަރ އަލީ ސީޒަން ޑައިރެކްޓްކޮށް، ލީޑް ރޯލް ކުޅެފައިވާ މި ފިލްމުގައި އޭނާގެ އިތުރުން މަޝްހޫރު ބަތަލާ ރިޝްމީ އާއި ފަރީލާ އަދި ކުރު ފިލްމުތަކުން މަޝްހޫރުކަން ހޯދި ސިތޫ އެކްޓްކޮށްފައިވެއެވެ. އަދި ފިލްމުގެ ކުރު ރޯލަކުން ސައީދުވެސް ފެނިގެންދާނެ އެވެ.

ރުޅި ކޮންޓްރޯލް ކުރުމުގައި ދިމާވާ އުނދަގޫތަކެއްގެ ސަބަބުން ފިރިއަކު ގާތިލަކަށް ބަދަލުވެ، އޭނާ ތަޖުރިބާ ކުރާ ކަންތައްތަކެއް ދައްކުވައިދޭ ފިލްމް އޮލިމްޕަހުން ބެލި ފަރާތަށް ހިތްހަމަޖެހިފައި ތިބި ކަމަށް ސީޒަން ބުނެފައިވެ އެވެ.

މި ފިލްމުގެ ޕްރޮމޯޝަނަލް ލަވަ ނެގުމަށް ކާރެއް އެއްކޮށް އަންދާލައިފާވެސްވެ އެވެ.