ފެން ނުވަންނަ ގޮތަށް ތައްޔާރުކުރާ ފުރަތަމަ ހެޑްސެޓް އޭޕްރީލް މަހު ބާޒާރަށް ނެރެނީ

ލަވަ އަޑު އެހުމަކީ ދިވެހިންގެ ތެރެއިން ގިނަ ބަޔަކު ކުރަމުން އަންނަ ކަމެކެވެ. ޒަމާނަށް އައި ބަދަލާއެކު ދިވެހިންގެ މިއާދަ ވެސް ވަނީ ކުރި އަރާފަ އެވެ. އެގޮތުން ލަވަ، މަދަހަ ނޫނީ ރޭޑިއޯ އަޑުއަހާލުމަށް ވެސް ހެޑްސެޓެއް ނުގެންގުޅޭ މީހަކު ވަރަށް މަދުވާނެ އެވެ. އެއީ މިހާރަކަށް އައިސް ގަންނަ ކޮންމެ ފޯނަކާ އެކުހެން ވެސް ހެޑްސެޓެއް ލިބޭތީ އެވެ.

އެހެންނަމަވެސް ތަރައްގީއާއެކު ކޮންމެ މީހަކުވެސް ބޭނުންވަނީ އަނެއްކަކަށް ވުރެ މޮޅު، ބޭނުންކުރަން ފަސޭހަ ހެޑްސެޓެކެވެ. ޖާމަނީގެ ކުންފުންޏެއް ކަމަށްވާ ބްރަގީ އިން އުފައްދާފައިވާ ‘ބްރަގީ ޑޭޝް އިއަރ ބަޑްސް’ އަކީ އެފަދަ ހެޑްސެޓްތަކުގެ ‘ބައްޕަ’ ކަމުގައި ބެލެވޭ ވަރުގެ އުފެއްދުމެކެވެ.

ދުނިޔޭގެ ފުރަތަމަ ވަޔަރލެސް ސްމާރޓް ހެޑްސެޓަށް ވުމުގެ އިތުރުން މިހެޑްސެޓަކަށް ފެނެއް ނުވަންނާނެ އެވެ. ފެނު އަޑީގެ 1 މީޓަރުގެ ތެރޭގައި ބޭނުން ކުރެވޭ މިހެޑްސެޓު އާދައިގެ ހެޑްސެޓުތަކާ ތަފާތު އެތައް ގޮތަކަށް ބޭނުން ކުރެވެ އެވެ. އެގޮތުން ފޯނު ނެގުމަށާއި ލަވަ ރައްކާކުރުމުގެ އިތުރުން މިހެޑްސެޓަކީ ސިއްހަތަށް ފައިދާހުރި އާލާތެކޭ ބުނެވިދާނެ އެވެ. އެއީ ހިތުގެ ތެޅުން ހުރި މިންވަރާއި ކެލޮރީ ވިރުވުނު މިންވަރު ވެސް މިހެޑްސެޓުން އަންގައިދޭތީ އެވެ.

އެހެން ހެޑްސެޓްތަކާ ހިލާފަށް މި ހެޑްސެޓް ބޭނުން ކުރުމަށް ފޯނު ބޭނުމެއް ނުވެ އެވެ. އެއީ މި ހެޑްސެޓްގައި 4ޖީބީގެ ލަވަ ފަދަ އޯޑިއޯ ފައިލުތައް ރައްކާކުރެވޭތީ އެވެ. އެހެންކަމުން ދުނިޔަވީ ހިޔާލުތަކުން ދުރުވެ އަމިއްލަ ނަފްސާއެކު ވަގުތުކޮޅެއް ހޭދަކޮށްލާއިރު މިއީ ބޭނުންކުރަން އެންމެ އެކަށީގެންވާ އެއް އާލާތެވެ.

މީގެ އިތުރުން އާދައިގެ ހެޑްސެޓްތަކުގައި ޖެހޭ ގިނަ މައްސަލަތައް މި ހެޑްސެޓުގައި ނުޖެހުމަކީ މީގެ އެންމެ ބޮޑު އެއް ކުރިއެރުމެވެ. އެގޮތުން މިޒަމާނުގައި ގިނަ ބަޔަކަށް އެންމެ ބޮލަށް އުނދަގޫވާ އެއް ކަމަކީ އާލާތްތަކުގެ ވާތައް އޮޅުމެވެ. ކިތަންމެ ރީތިކޮށް އޮޅާފައި ޖީބަށް ނުވަތަ ދަބަހަށް ލިޔަސް ވާތައް ގިނަފަހަރަށް އޮންނާނީ އޮޅިފަ އެވެ. ޑޭޝް ހެޑްސެޓަކީ ބްލޫޓޫތް މެދުވެރިކޮށް ބޭނުންކުރެވޭ އާލާތަކަށް ވީއިރު މިމައްސަލަ އެއްގޮތަކަށް ވެސް ދިމައެއް ނުވާނެ އެވެ.

މަގުމަތީގައްޔާއި އަޑުގަދަ ތަންތާގައި އުޅޭއިރު އެއަޑުތަކުން އުނދަގޫވޭ ހެއްޔެވެ؟ އަޑުއަހަން ބޭނުންވާ އެއްޗެއް ޝައުގުވެރިކަމާއެކު އަދު އެހުމަށް ދަތިތަކާ ކުރިމަތިލާން ޖެހޭ ހެއްޔެވެ؟ ބްރަގީ ޑޭޝް އިއަރ ބަޑްސް އިން މިފަދަ މައްސަލަތަކަށް ހައްލެއް ގެނެސްދެ އެވެ. ޓްރެފިކް ފަދަ ނޭދެވޭ އަޑުތައް ނީއްވުމަށް ‘ނޮއިސް ކެންސަލޭޝަން’ ފީޗާ މި ހެޑްސެޓުގައި އިނދެ އެވެ.

މިއަހަރުގެ އޭޕްރިލް މަހު މާކެޓަށް ނުކުންނަ މިހެޑްސެޓްގެ އަގަކީ 299 ޑޮލަރެވެ.