ދަސްކުރާ އެއްޗެހި ހަނދާނުގައި ބަހައްޓާނީ ކިހިނެއް؟

ފިލާވަޅު ދަސްކުރަން އިންނަ އިރު ތަފާތު އެތައް ހިޔާލުތަކެއް އައިސް ބޮލު ތެރޭ އެނބުރެން ފަށާ ހެއްޔެވެ؟ ފޮތަށް ސަމާލުކަންނުދެވި އެތައް ވަގުތެއް ބޭކާރުވޭ ހެއްޔެވެ؟ ފޫހިވެ، ނިދިއައިސްގެން އެންމެ ފަހުން ނިދިގެން ވެއްޓޭ ހެއްޔެވެ؟

އިމްތިހާނަކަށް ނުވަތަ އެނޫންވެސް ކަމަކަށް އެއްޗެއް ދަސްކުރަން ވެއްޖެނަމަ މިއީ ގިނަ ފަހަރަށް އަޅުގަނޑުމެންގެ ހާލަތެވެ. ބައެއްފަހަރު ދަސްކޮށް ނިމޭއިރުވެސް ދަސްކުރި އެއްޗެއް ހަނދާނުގައެއް ނުހުރެ އެވެ. ކަން މިހެން ވަނީ ކަމަށް ދޭންޖެހޭ ސަމާލުކަން ދޭންވާ ވަރަށް ނުދެވޭތީ އެވެ. މިލިޔުމުގައި މި ހިމަނާލަނީ ފިލާވަޅު ނުވަތަ އެނޫންވެސް އެއްޗެއް ދަސްކުރާއިރު ސަމާލުކަން ދިނުމަށާއި ދަސްކުރި އެއްޗެހި ހަނދާނުގައި ހަރުލައްވާނެ ބައެއް ގޮތްތަކެވެ.

ފިލާވަޅު ދަސްކުރާނެ ރަނގަޅު މާހައުލެއް ހޯދުން

ފިލާވަޅު ދަސްކުރަން އިންނަ ތަނަކީ މީހާގެ ސަމާލުކަން ހިފެހެއްޓުމާއި އެދަސްކުރާ އެއްޗެއް ހަނދާން ބެހެއްޓުމުގައި ވަރަށް މުހިންމު ރޯލެއް އަދާ ކުރާ ކަމެކެވެ. މިސާލަކަށް އެނދުގައި ނުވަތަ ސޯފާގައި އޮށޯވެ އޮވެ އެއްޗެއް ދަސްކުރަން ފަށައިފިނަމަ ނިދި އަންނަގޮތް ވާނެ އެވެ. އަޑު ގަދަ ތަނެއްނަމަ ބޮލަށް އުނދަގޫވެ ދަސްކުރާހިތް ނުވާނެ އެވެ. އެހެންކަމުން ފިލާވަޅު ދަސްކުރަން އިންނަ ތަނަކީ އެކަމަށް އެކަށީގެންވާ ތަނަކަށް ވާން ޖެހޭނެ އެވެ.

ތަނުގައި ގޮނޑިއަކާއި މޭޒެއް އަދި ފޮތް ބަހައްޓާނެ ތަނެއް ހުރުމުން ކިޔެވުމާއި އެއްޗެހި ދަސްކުރުމުގެ ރޫހު އެތަނެއްގައި ހަރުލާނެ އެވެ. މީގެ އިތުރުން ތަނުގައި ފޮތް ކިޔަން ފަސޭހަވާނެ މިންވަރަކަށް އަލިކަން ހުންނަން ވާނެ އެވެ. އަދި ޓީވީ އާއި ފޯނު ފަދަ ތަކެތި އެތަނުން ބޭރުގައި ނުވަތަ ނިއްވާލާފައި ހުރުމުން ތިމާގެ ޝައުގުވެރިކަން އެހެން ދިމާލަކަށް ދިއުމުން ދުރުކޮށްދޭނެ އެވެ. ލަވައަށް ނުވަތަ މިއުޒިކަށް ލޯބިކުރާ ފަރާތެއްނަމަ އުނދަގޫ ނުވާ ވަރަކަށް ލަވަ ޖަހާފައި ބެހެއްޓިދާނެ އެވެ.

ވަގުތު ބަހާލައި އެގޮތަށް އަމަލުކުރުން

ގިނަ ފަހަރަށް ފިލާވަޅު ދަސްކުރަން ފެށެނީ އިމްތިހާނު ބޯމަތިވެ ފޫކޮޅުގައި “ރޯވުމުން”ނެވެ. ނަމަވެސް ދަސްކުރާ އެއްޗެއް ހަނދާނުގައި ބަހައްޓަން ބޭނުންނަމަ މިއީ އެންމެ އެދެވޭ ގޮތެއް ނޫނެވެ. ކުރިން ފެށިގެން ވަގުތުތައް ރާވާލައި ފިލާވަޅު ދަސްކުރާނެ ގަޑިއެއް ކަނޑައެޅުމުން ސިކުނޑި އެކަމަށް ތައްޔާރުވެ އެވެ. އަދި ވަގުތު އައިސް ޖެހުމުން ޝައުގުވެރިކަމާއެކު ކަންކުރަން ފަސޭހަވެ އެވެ. އޭގެ މާނައަކީ ފިލާވަޅު ދަސްކުރުން މާދަމާގެ ވަކި ވަގުތަކަށް ފަސްކުރުމެއް ނޫނެވެ. މިއަދު ކުރަން ހުރި ކަންކަން މާދަމާއަށް ފަސްނުކުރާށެވެ. އެންމެ ފަހުން ދަސްކުރަން ހުރި އެއްޗެހި ގިނަވެ ފަހު ވަގުތު ބޯހާސްވާ ގޮތްވާނެ އެވެ. ދަސްކުރަން ޖެހޭ އެއްޗެހި ގިނަވުން މިއީ ގިނަ ބަޔަކަށް ދަސްކުރާ އެއްޗެހި ހަނދާނުގައި ނުބެހެއްޓޭ އެއް ސަބަބެވެ.

ހިސާބުތަކުން ދައްކާ ގޮތުގައި އިންސާނާގެ ސަމާލުކަން ހިފެހެއްޓޭނީ އެންމެ ގިނަވެގެން 40 މިނެޓެވެ. ވީމާ ފިލާވަޅު ދަސްކުރަން ޝެޑިއުލްއެއް ހަދާއިރު ކޮންމެ 30 އަދި 35 މިނެޓަކުން ހުސްވަގުތުކޮޅެއް ނަގާށެވެ. 15 ވަރަކަށް މިނެޓުގެ ބްރޭކެއް ނެގުމުން ދަސްކުރި އެއްޗެހި ސިކުނޑީގައި ރައްކާކުރުމަށް ފަސޭހަވާނެ އެވެ. އެވަގުތުކޮޅު ތިމާ ކުރާހިތްވާ ކަހަލަ ކަމެއް ކުރާށެވެ. އަދި އަލުން ދަސްކުރަން ފެށުމުގެ ކުރިން، ކުރިން ދަސްކުރި އެއްޗެހި ހަނދާނުގައި ހުރިތޯ ޗެކުކޮށްލާށެވެ. އެގޮތުން ފިލާވަޅުގެ ބައެއް ދަސްވިކަމުގެ ޔަގީންކަން ލިބި ހިތްހަމަޖެހުން ލިބޭނެ އެވެ.

ސަމާލުކަން

ރަނގަޅު މާހައުލެއްގައި ކިޔެވުމަށް ވަގުތު ހުސްކޮށްގެން އިށީން ކަމުގައި ވިޔަސް ތިމާގެ ސަމާލުކަން ގެއްލޭ އެތައް ކަމެއް ދިމާވެދާނެ އެވެ. މިސާލަކަށް ކަރުހިއްކައިގަތުން ނޫނީ ބަނޑުހައިވުމުން ތިމާގެ ސަމާލުކަން ވަގުތުން އެހެން ކަމަކަށް އެނބުރިގެން ދާނެ އެވެ. އެހެންކަމުން ކިޔަވަން އިށީންނައިރު ބޭނުންވާ މިންވަރަށް ފެނާއި ލުއި ކާނާއެއް ކައިރީގައި ބެހެއްޓިދާނެ އެވެ. ނަމަވެސް އަބަދު ކެއުމުން ދުރުވާށެވެ. އެއީ އޭރުން ކުރަން އުޅުނު ކަންތަކުގެ މަގުސަދު ގެއްލި ކެއުމަށް ސަމާލުކަން ހުއްޓޭނެތީ އެވެ. ކިޔަވަން ފެށުމުގެ ކުރިން އެވަގުތު ކޮޅުގެ ތެރޭގައި ދަސްކުރާނެ އަމާޒެއް ކަނޑައަޅާށެވެ. ފޮތުގެ ފުރަތަމަ ބައި ދަސްކުރަން ކަނޑައެޅިނަމަ އެހިސާބަށް ވަގުތުގެ ތެރޭގައި ދަސްކޮށް ނިންމާށެވެ. އޭރުން ފިލާވަޅު ދަސްކުރަން ބޭނުންވާ ވަރަށް ވަގުތު ނުލިބެއޭ ބުނާނެ ޖާގައެއް ނޯންނާނެ އެވެ.

“ތަފާތު” ކުރުން

އަބަދު އެއްކަމެއް އެއްގޮތަކަށް ކުރުމުން ކޮންމެ މީހަކުވެސް ފޫހިވާނެ އެވެ. އެއީ އިންސާނީ ތަބީއަތުގައި އެކަން ލައްވާފައިވާ ގޮތެވެ. ވީމާ ކުރާ ކޮންމެ ކަމެއްގައިވެސް ޝައުގުވެރިކަން ހިފަހައްޓަން ބޭނުންނަމަ ތަފާތު ގޮތްގޮތަށް އެކަންތައް ކުރުމަކީ މުހިންމު ކަމެކެވެ. ނޫނީ ދޭތެރެއަކުން އެހެން ކަމެއްކޮށްލުމުން ފޫހިކަން ފިލާ ތާޒާ ވެގެން ދާނެ އެވެ. އެގޮތުން ކިޔެވުމުގެ މެދުތެރެއިން ނަގާ ‘ބްރޭކު’ގައި ގޭތެރޭގެ ކަންކަން ކޮށްލާ، ކުޅެލާ، ހިނގާލާ ހެދިދާނެ އެވެ. ސިކުނޑިއަށް ކަސްރަތު ލިބޭ ބީދައިން ހަށިގަނޑަށް ކަސްރަތުދީ ހުރިހާ ކަމެއް އެއް ހަމައެއްގައި ބެހެއްޓުމަކީ މުހިންމު ކަމެކެވެ. ގިނަ ބަޔަކަށް ހީވެފައިއޮންނަނީ އިމްތިހާނު ދުވަސްވަރު އަބަދު އިންނަން ޖެހޭނީ ފޮތް ހިފައިގެން ކިޔަވަން ކަމަށެވެ. ގިނަ ބެލެނިވެރިން އެދުވަސްވަރު ކުދިން ޓީވީ ބެލުމާއި ކުޅެންދިޔުން ހުއްޓުވަ އެވެ. ނަމަވެސް އެހެން ހެދުމުން ކުއްޖާ ކިޔެވުމުގެ މަތިން ފޫހިވެ، ހާސްވާގޮތްވާނެ އެވެ.

ދަސްކުރާ އެއްޗެހި ހަނދާނުގައި ގިނަ ދުވަހު ބެހެއްޓުމަށް އެކި މީހުން ތަފާތު އުކުޅުތައް ބޭނުންކުރެ އެވެ. މިއީ އޭގެ ތެރެއިން ވަރަށް މަދު ކަމެކެވެ. ކޮންމެ މީހަކީވެސް ތަފާތު މީހަކަށް ވުމާއެކު ހުރިހާ ގޮތްތަކަކީ ކޮންމެ މީހަކަށް ބޭނުންހުރި ގޮތަކަށް ނުވެދާނެ އެވެ. އެމީހަކަށް އެންމެ ފަސޭހަ ގޮތެއް ހޯދާ އެގޮތަކަށް އަމަލުކުރުމުން ގެންދާށެވެ.