“ކުއެންޓިކޯ”ގެ ޝޫޓިން ނިންމާލުމަށްފަހު ޕްރިޔަންކާ އަނބުރާ އިންޑިޔާއަށް

ބޮލީވުޑްގެ އެންމެ މޮޅުއެއް އަންހެން ބަތަލާ ކަމަށްވާ ޕްރިޔަންކާ ޗޯޕްރާ އޭބީސީގެ އާ ޓީވީ ސީރީޒް “ކުއަންޓިކޯގެ” ފުރަތަމަ ސީޒަންގެ ޝޫޓިން ނިންމާލުމަށްފަހު އަނބުރާ އިންޑިޔާއަށް ހިނގައްޖެ އެވެ.

މި ސީރީޒްގެ ލީޑް ކެރެކްޓަރއިން ފެނިގެންދާ ޕްރިޔަންކާ އަނބުރާ މުމްބާއީއަށް އައިސްފައިވަނީ 2 މަސްދުވަސް ވަންދެން އޫއެސްއޭގެ މޮންޓްރީއަލްގައި މި ސީރީސްގެ ޝޫޓިން ފުރިހަމަ ކޮށްފައި އެވެ.

ޕްރިޔަންކާ މުމްބާއީއަށް އައުމާއެކު ވަނީ އިންސްޓަގްރާމްގައި ސެލްފީ އެއް ޕޯސްޓްކޮށް އެކަމުގެ އުފާ ހާމަކޮށްފައި އެވެ.

މީގެ އިތުރުން ޕްރިޔަންކާގެ ކުރިޔަށް އޮތް ފިލްމްތައް ކަމަށްވާ ގަންގާޖަލް 2 އަދި ބާޖިރާއޯ މަސްތާނީގެ މަސައްކަތްތައް ވަރަށް އަވަހަށް ކުރިޔަށް ގެންދާނެކަމަށް އިންޑިޔާގެ ނޫސްމަޖައްލާތަކުން ބުނެއެވެ.

މި މަހު 27ގައި ދައްކަން ފެށުމަށް ހަމަޖެހިފައިވާ ކުއަންޓިކޯގައި ޕްރިޔަންކާ އަދާކުރަނީ އެފް.ބީ.އައި އޭޖެންޓެއްގެ ރޯލް އެވެ. އަދި މި ސީރީޒްގައި ޕްރިޔަންކާގެ އިތުރުން ހަރަކާތްތެރިވެފައިވަނީ ޑޯގްރޭ ސްކޮޓް، ޖޭކް މެކްލާފިންގ، އޯޖެނޫ އެލިސް، ޔާސްމީން އަލް މަސާރީ، ޖޮހާނާ ބްރޭޑީ ޓޭޓް އެލިންގޓަން އަދި ގްރަހަމް ރޮޖަރޒްއެވެ.