ޖެނެޓް ޖެކްސަން އިސްލާމް ވެއްޖެ

މައިކަލް ޖެކްސަންގެ ކޮއްކޮ އަދި މަޝްހޫރު ލަވަކިއުންތެރިޔާ ޖެނެޓް ޖެކްސަން އިސްލާމްދީން ގަބޫލްކޮށްފި އެވެ.

49 އަހަރުގެ ޖެނެޓް އިސްލާމްދީން ގަބޫލް ކުރިކަން އިނގިރޭސި ވިލާތުގެ “ދަ ސަން” ނޫހުން ވަނީ ރިޕޯޓު ކޮށްފަ އެވެ. އޭގެ އިތުރުން ޖެނެޓް ދަނީ އިސްލާމް ދީނާއި ބޭހޭގޮތުން ގިނަ މައުލޫމާތު ހޯދަމުން ކަމަށާއި ޖެނެޓްގެ މި ނިންމުމަށް އޭނާގެ އާއިލާއިން އިހްތިރާމް ކުރާކަމަށް ރިފޯޓް ތަކުން ބުނެއެވެ.

ޖެނެޓް 2012 ވަނަ އަހަރު ކައިވެނީގެ ގޮތުން ގުޅިފައިވަނީ ގަތަރުގެ މުސްލިމް ވިޔަފާރިވެރިއެއްކަމަށް ވާ ވިސާމް އަލް މަންޢާ އެވެ. މިއީ ގަލްފު ސަރަހައްދުގައި އޮޕަރޭޓްކުރާ “އަލް މަންޢާ” ނަމަކަށް ކިޔާ ބޮޑު ކުންފުންޏެއްގެ ވެރިޔާއެވެ.

ޖެނެޓް އިސްލާމްވެފައިވާ އިރު އޭނާގެ ބޭބެ ޖާމައިން ޖެކްސަން ވަނީ 1989 ވަނަ އަހަރު އިސްލާމްދީން ގަބޫލްކޮށް އިސްލާމްވެފަ އެވެ.

ޖެނެޓް އަކީ ކުރީގެ މަޝްހޫރު ޕޮޕް ބޭންޑް “ދަ ޖެކްސަން ފައިވް”ގެ މެމްބަރު ތެރެއިން އެއް މެމްބަރެވެ.