ބިގް ބޮސް 9 ގެ ބައިވެރިންނަށް ހަފްތާޔަކު 5 ލައްކަ ރުފިޔާ ލިބޭ

ބިގް ބޮސްގެ ސީޒަން 9 ގެ ބައިވެރިންނަށް ކޮންމެ ހަފްތާޔަކު 5 ލައްކައެއްހާ ރުފިޔާ ލިބޭކަމަށް އިންޑިޔާގެ މީޑިޔާތަކުގައި ހަބަރު ފެތުރިއްޖެ އެވެ.

މީގެ ކުރިން ސިއްރުވެފައިވާ މިކަން ހާމަވެފައިވަނީ ބިގް ބޮސްގެ ކޮންޓްރެކްޓްގެ ކޮޕީއެއް މީޑިޔާގައި ލީކުވެގެން ދިއުމުންނެވެ.

ބިގް ބޮސް ކޮންޓްރެކްޓްގައި ވާގޮތުން ކޮންމެ ބައިވެރިޔަކަށް އެ ސެލެބްރިޓީގެ ޕޮޕިއުލާރިޓީގެ މިންގަނޑަށް ބަލައި 3-5 ލައްކަޔާ ދެމެދުގެ އަދަދަކަށް ރުފިޔާ ލިބޭނެއެވެ. އެގޮތުން ޝޯގައި ޕޮޕިއުލާރިޓީގެ ގޮތުން ދަށް ބައިވެރިޔަކަށްވެސް މަދުވެގެން 3 ލައްކަ ރުފިޔާ ލިބެއެވެ.

އެހެންކަމުން މި ޝޯވގެ ބައިވެރިން ތިބެނީ ޝޯވ ކާމިޔާބު ނުކުރިޔަސް ޕްރޮފިޓުގައި އެވެ. އަދި އެގޮތުން ބަލާނަމަ މި އަދަދަކީ ޝޯގެ ބައިވެރިންނަށް އެހެން ޝޯތަކުން ލިބޭ އަމްދަނީއަށް ވުރެ ބޮޑު އަދަދެކެވެ.

ކޮންޓްރެކްޓްގެ އުސޫލުން ކޮންމެ ހަފްތާޔަކު ލިބޭ ވަރުގެ އިތުރުން ބިގް ބޮސް މޮޅުވާ ފަރާތަށް އިތުރު 5 މިލިއަން ރުފިޔާ ލިބޭނެއެވެ.

ބިގް ބޮސްއަކީ އިންޑިއާގައި އެންމެ މަގުބޫލު އެއް ރިއަލިޓީ ޝޯވ އެވެ. އަދި ކޮންމެ އަހަރަކުވެސް ބިގް ބޮސްގޭގައި ބައިވެރިން ތިބޭ 3 މަސް ދުވަހު ތެރޭގައި ބެލުންތެރިން ސިއްސުވަލާފަދަ އެތަކެއް ހާދިސާތަކެއް ހިނގަ އެވެ.

އެގޮތުން ބިގް ބޮސްގެ 9 ވަނަ ސީޒަން ފެށިފަހުން 10 ދުވަސް ވެފައިވާއިރު އެ މުއްދަތުގައިވެސް ބައިވެރިންގެ ތެރޭގައި ޝައުގުވެރިވާފަދަ އެތަކެއް ހާދިސާއެއް ހިނގާ ސޯވގެ މަގުބޫލުކަން ބެލުންތެރިންގެ މެދުގައި މި އަހަރުވެސް ދަނީ ބޮޑުވަމުންނެވެ.