އިމްތިހާނަށް ތައްޔާރުވުމުގެ ގޮތުން ކުރެވިދާނެ ބައެއް ކަންތައްތައް

އެކި ކުދިން ފިލާވަޅު ދަސްކުރަނީ އެކި ގޮތަށެވެ. ބައެއް ކުދިންނަކީ ފިލާވަޅު ކިޔަވައިދޭ ގަޑީގައި އަޑުއަހައިން ދަސްކުރާކުދިންނެވެ. އަނެއް ކުދިންނަކީ ކިޔައިދޭ އެއްޗެއް އެއްފަހަރުން ނަގައިގަންނަށް އުނދަގޫ ކުދިންނެވެ. މިހެން ކަންތައް ހުރި ކަމުގައި ވިޔަސް އެކުދިންނަށް ދެވޭ ނާސްތާއެއްގެ ސަބަބުން ރަނގަޅު ބަދަލެއް ފެނިގެންދެ އެވެ.

އެގޮތުން ސްކޫލަށް އިމްތިހާނަކަށް ދާއިރު ދެވޭ ނާސްތާއަކީ ފައިދާހުރި ކާނާއަށް ހެދުންމިއީ ކުއްޖާއަށް ވަރަށް މުހިއްމު ކަމެކެވެ. އެގޮތުން އާދައިގެ ޔޯގަޓް، އާފަލު، ކޯންފުލެކްސް (އޮރިޖިނަލް)، ދޮންކެޔޮ، ބިސް އަދި ކިރުތަށި ފަދަ ކާނާ އަކީ ހެނދުނުގެ ނާސްތާއަށް ދެވިދާނެ އެއްޗެއްސެވެ. ޕޮރޮޓީން ގިނައިން ލިބިދޭ ކާނާ ހެނދުނު ކެއުމަކީ ހަށިގަނޑު ވަރުބަލިވުމުން ދުރުކޮށްދޭ ކަމެކެވެ. އަދި މެންދުރުގެ ކެއުމެއްގެ ގޮތުގައި ހަކުރު މަދުން ހުންނަ ކާނާއެއް މިސާލަކަށް ތަރުކާރީ ރިހައެއް ނުވަތަ ތަރުކާރީ މަޑުކޮށްލާފައި އަދި އެއާއިއެކު ފައިދާ ހުރި ޖޫހެއް ދޭށެވެ. އަދި އެހެންމެ ރޭގަނޑުގެ ކެއުން އަވަސްކޮށް ރޭގަނޑު މަސްދަޅާއި ބަތް އެއާއި އެކު ތަރުކާރީ ކޮޅެއް ނުވަތަ ތަރުކާރީ ގިނަ ޕާސްތާ ކަހަލަ ލުއި ކާނާއެއްވެސް ދިނުން ރަނގަޅު ވާނެއެވެ. އަދި ނިދުމުގެ ކުރިން ކިރުތައްޓެއް ބޯލާށެވެ.

އިމްތިހާނު ދުވަސްވަރު އެކަށީގެންވާ ވަރަށް ނިދުމަކީ ވަރަށް މުހިއްމު ކަމެކެވެ. އެހެންކަމުން 8 ގަޑިއިރުގެ ނިދި ވަރަށް މުހިއްމެވެ. ނިދިމަދުވުމުގެ ސަބަބުން ބޮލުގައި ރިހުން ފަދަ ކަންކަން ދިމާވެ، ކަންކަމަށް ސަމާލުކަން ދިނުމަށް ދަތިވެއެވެ. އިމްތިހާނުގެ ހާސްކަމުގައި ފޮތް ކިޔަން ލަސްވާންދެން އިންނަ ތަން ފެނެއެވެ. އޭނގެ ބަދަލުގައި އަވަހަށް ނިދާފައި ފަތިހު ހޭލަން އާދަ ކުރާށެވެ. ފަތިހު ފަތިސް ނަމާދަށްފަހު ފޮތް ކިޔުމުން ދަސްވުމަށް ފަސޭހަ ވެއެވެ.

ފެނަކީ ހަށިގަނޑުގެ ގިނަ ކެމިކަލް ތަކެއް އެއް ވަރެއްގައި ހިފަހައްޓައި ދިނުމަށާއި ސިކުޑީގެ މަސައްކަތްތައް ކުރިއަށް ގެންދިއުމަށް އެހީވެދޭ އެއްޗެކެވެ. އިމްތިހާނަށް ތައްޔާވާއިރު ފެނަކީ ވަރަށް މުހިއްމު ރޯލެއް އަދާކުރާ އެއްޗެކެވެ. އެކޮތުން ހަށިގަނޑަށް އެކަށީގެންވާ ވަރަށް ފެން ނުލިބޭނަމަ ބޯ އެބުރުން ނުވަތަ ގައިގަ ރިއްސުންފަދަ ކަންތައް ދިމާވެއެވެ. އެހެންކަމުން ކޮންމެ ދުވަހަކު ހާއްސަކޮށް އިމްތިހާނުގެ ދުވަސްވަރު ހަށިގަނޑަށް ބޭނުންވާ ވަރަށް ފެންބުއިމަށް އާދަކުރާށެވެ.