ގިނައިރު ފޯނު ފަދަ އެއްޗެއްސާ ކުޅޭ ކުދިންގެ ނިދި މަދުވޭ

ގިނައިރު ފޯނު، ޓެބުލެޓް ފަދަ އެއްޗެއްސާ ކުޅޭ ކުދިން ނިދަނީ މަދުން ކަމަށް ތަޖުރިބާ ކާރުން ބުނެފި އެވެ.

ބީބީސީން އާންމު ކޮށްފައިވާ އާޓިކަލްގައި ބުނެފައިވާ ގޮތުގައި 1 އަހަރާއި 3 އަހަރާއި ދެމެދުގެ ކުދިން ފޯނު ފަދަ ތަކެއްޗާއި ކުޅޭ ކޮންމެ ގަޑިއިރަކުން ރޭގަނޑުުގެ ނިދިން 15 މިނެޓް އެކުދިންނަށް މަދުވެ، ދުވާލު ގިނަ ވަގުތު ނިދާނެ ކަމަށެވެ.

އޭގެ އިތުރުން ފޯނު ފަދަ ތަކެތި ކުޅުމުން އެކުދިންގެ ބައެއް ކަންކަމަށް ރަނގަޅުވާ ފަދައި އަނެއްބައި ކަންކަމުން ހެދިބޮޑުވުމުން ދުރުކޮށްދޭ ކަމަށެވެ. އެގޮތުން އަބަދު ފޯނު ފަދަ ތަކެއްޗާއި ކުޅުމުން އެކުދިންނަށް ފޯނުން ގިނަ ކަންކަން ދަސްވެ އަތްފައިގެ މަސައްކަތް އިތުރުވެ އެވެ. ނަމަވެސް ފޯނުފަދަ ތަކެއްޗާއި ކުޅުމުން ލޮލުގައި ރިއްސާއި އެހެނިހެން ސިއްހީ މައްސަލަތައް އިތުރުވެ ނިދުމާ ދުރުކޮށްދެ އެވެ.

އަދި މި އުމުރަކީ އެކުދިން ރަނގަޅަށް ހެދި ބޮޑުވަމުން އަންނަ ދުވަސްވަރު ކަމުން ނިންޖަކީ ވަރަށް މުހިއްމު އެއްޗެއް ކަމަށާއި ކޮންމެ މިނެޓްއަކީ ވެސް އެހާ ބޭނުންތެރި އެއްޗެއް ކަމަށް މި އާޓިކަލްގައި ބުނެފައި ވެއެވެ.

ލަންޑްންގެ ޔުނިވާސިޓީއެއް ކަމަށްވާ ބާރކްބެކްއިން ވަނީ 3 އަހަރުން ދަށުގެ ކުދިންގެ 715 ބެލެނިވެރިން ބައިވެރިިކޮށްގެން ސާވޭއެއް ހަދާފަ އެވެ. އެ ސާވޭއިން އެގިގެން ދިޔަގޮތުގައި 3 އަހަރުން ދަށުގެ 75% ކުދިން ފޯނު ފަދަ ތަކެއްޗާއި އާދައިގެ މަތިން ކުޅޭ ކަމަށެވެ. އަދި 6 މަހާއި 11 މަހާއި ދޭތެރޭގެ %51 ކުދިން ހިމެނޭއިރު 2 އަހަރާއި 3 އަހަރާއި ދޭތެރޭގެ %92 ކުދިން ޓަޗް ސްރީން ހިމެނޭ އެއްޗެހި ބޭނުން ކުރެއެވެ.

މީގެ އިތުރުން އެ ނޫހަށް މައުލޫމާތު ދެމުން ޑރ ޓިމް ސްމިތް ބުނިގޮތުގައި ކުޑަކުދިން ދުވާލާއި ރޭގަނޑު މުޅިއެކު 10 އަކާއި 12 ގަޑިއިރާއި ދެމެދުގެ ވަގުތެއްގައި ނިދަން ޖެހޭނެ ކަމަށެވެ.

އަދި ފޯނުފަދަ ތަކެތި ދިނުމުގެ ބަަދަލުގައި ވަކި ވަގުތަކަށް ޓީވީ ދެއްކުން ރަނގަޅު ކަމަށާއި ނިދަން ކައިރިވާ ވަގުތު އެފަދަ ތަކެތި ނުދެއްކުމަށް ޑރ ޓިމް ވަނީ ބުނެފައި އެވެ.