“ނޯޓީ 40” އޯގަސްޓް 3 ގައި ތިލަދެކުނު ސިނަމާއަށް

އެންވިޝަން އެންޓަޓެއިންމެންޓާއި ޔޫއްޕެ ޕްރޮޑަކްޝަން ގުޅިގެން އުފައްދާފައިވާ އަހަރުގެ އެންމެ ބޮޑު ފިލްމުގެ ގޮތުގައި ޕްރޮމޯޓްކުރަމުންދާ “ނޯޓީ 40” އަންނަ އޯގަސްޓް 3 ގައި ތިލަދެކުނު ސިނަމާގައި އަޅުވުމަށް ވަނީ ހަމަޖެހިފައި އެވެ.

ދިވެހި ފިލްމީ އިންޑަސްޓްރީގެ މަޝްހޫރު ގިނަ ފަރާތްތަކެއް އެއް ފިލްމަކުން ފެނިގެންދާ ނޯޓީ 40ގެ މެއިން ކެރެކްޓަރތައް އަދާކުރާ ބައެއް ތަރިންގެ ދެ އުމުރެއްގެ ދުވަސްތައް މި ފިލްމުން ފެނިގެންދާނެ އެވެ. މި ވަގުތު ހަމަޖެހިފައިވަނީ 1 ޝޯ އެޅުވުމަށް ކަމަށާއި ތަރުހީބު ލިބޭ ވަރަކުން ދެވަނަ ޝޯ އެއް އަޅުވާނެ ކަމަށް ކޭއޯ އަށް މައުލޫމާތު ދެމުން ކުޅުދުއްފުށީގައި މި ފިލްމު އެޅުވުމުގައި އިސްކޮށް އުޅޭ އޮފިޝަލަކު ބުންޏެވެ.

އަދި ފިލްމުގެ ޓިކެޓް ވިކެމުންދަނީ ފޯސިކްސް ފިހާރައިން ކަމަށާއި ޓިކެޓްގެ އަގަކީ 100 ރުފިޔާ ކަމަށް އެފަރާތުން މައުލޫމާތު ދެއެވެ.

މި ފިލްމުގައި ނިއުމާ މުހައްމަދު، އަހުމަދު ސައީދު، މުހައްމަދު މަނިކު، އަލީ ސީޒަންގެ އިތުރުން ޔޫއްޕެގެ 40 އަހަރުން މަތީގެ އުމުރުގެ މަންޒަރުތަކާއި ހަމަ އެ ތަރިންގެ 22-26 ދޭތޭރޭ މަންޒަރުތައް ފެނިގެންދާނެ އެވެ.