ބޮޑު އީދުގެ ފުރަތަމަ ޝޯއަށް ސުނީތާ ކުމުންދޫއަށް

ބޮޑު އީދުގެ ފުރަތަމަ ރޭ ކުމުންދޫގައި ބޭއްވުމަށް ހަމަޖެހިފައިވާ އީދު ޝޯގައި ސުނީތާ ޕާފޯމް ކުރުމަށް ހަމަޖެހިއްޖެ އެވެ.

ކުމުންދޫ ކައުންސިލްގެ ރައީސް އަމީން މުހައްމަދު ކޭއޯއަށް ވިދާޅުވީ އީދު ފުރަތަމަ ރޭ ބޭއްވުމަށް ހަމަޖެހިފައިވާ ޝޯއަށް ސުނީތާ ގެނައުމަށް ހަމަޖެހިފައިވާ ކަމަށާއި މިއީ އެރަށުގެ އަމިއްލަ ކުންފުންޏަކުން ފަންޑުކޮށްގެން ހިންގާ ހަރަކާތެއްކަމަށެވެ.

އޭގެ އިތުރުން މި ޝޯގައި އެރަށުގެ ޑާންސް ގްރޫޕްތައް ވެސް ހަރަކާތްތެރި ވާނެކަމަށާއި ސުނީތާ ޕާފޯމް ކުރަން ހަމަޖެހިފައިވަނީ ފުރަތަމަ އީދު ރޭ ބާއްވާ ޝޯގައި އެކަނިކަމަށް ވެސް އަމީން ވިދާޅުވި އެވެ. އަދި އެހެން ޝޯތަކަށް އިތުރު ފަންނާނުން ގެނައުމުގެ މަސައްކަތް ކުރެވެމުންދާ ކަމަށާއި އީދު ހަރަކާތްތައް ކޯޑިނޭޓް ކުރަމުން ގެންދަނީ ކައުންސިލުންކަމަށް ވެސް އަމީން ވިދާޅުވި އެވެ.

ސުނީތާގެ ފޭސްބުކް ޕޭޖްގައި ކޮށްފައިވާ ޕޯސްްޓެއްގައި ބުނެފައިވަނީ 2017 ވަނަ އަހަރުގެ ފުރަތަމަ އީދު ޝޯ ކުމުންދޫގައި ހަމަޖެހިފައިވާކަމަށާއި، އެ ފުރުސަތު ދިން ކަމަށްޓަކައި ކުމުންދޫގެ ހުރިހާ ރައްޔިތުންނަށް ޝުކުރު ދަންނަވާ ކަމަށެވެ.