“ނޭދެން ވަކިވާކަށް” ފިލްމުގެ ޓިކެޓް ވިއްކަން ފަށައިފި

ފިލްމު ނޭދެން ވަކިވާކަން ފިލްމު ކުޅުދުއްފުށީގައި އަޅުވަން ހަމަޖެހިފައިވާއިރު މި ފިލްމުގެ ޓިކެޓް އިއްޔެ ވިއްކަން ފަށައިފި އެވެ.

ޕެންޓަގްރާމް ފިހާރައިން އިއްޔެ ޓިކެޓް ވިއްކަން ފަށާފައިވާއިރު ޓިކެޓެއްގެ އަގަކީ 100 ރުފިޔާ އެވެ. މި ފިލްމު ކުޅުދުއްފުށީގައި އެޅުވުމަށް ހަމަޖެހިފައިވަނީ އޮކްޓޯބަރ 12 އަދި 13 ގަ އެވެ.

ކުޅުދުއްފުށީގައި ފިލްމު އެޅުވުމަށް އިސްކޮށް އުޅޭ ފަރާތުން ކޭއޯ އަށް ވިދާޅުވީ ދެ ޝޯގެ ޓިކެޓްވެސް މިހާރު ވިކެމުންދާ ކަމަށެވެ.

ފިލްމު ނޭދެން ވަކިވާކަށް ޕްރިމިއާ ކޮށްފައިވަނީ މިދިޔަ ސެޕްޓެންބަރު މަހު 27 ގަ އެވެ. އެ ފިލްމަކީ ލޯބީގެ ވާހަކައަކަށް އުފައްދާފައިވާ ފިލްމެކެވެ.

“މި ފިލްމުގައި ފެނިގެންދާނީ ޔޫސުފް ޝަފީއު (ޔޫއްޕެ)، އަހްމަދު ސައީދު، ފާތިމަތު އާޒިފާ، އާރިފާ އިބްރާހިމް، އަދި ޖާދުﷲ އިސްމާއީލެވެ. މިއީ ޖާދުގެ ފުރަތަމަ ފިލްމެވެ. މީގެ އިތުރުން އަހުމަދު އަޒްމީލް (އަޒޭ)، ނާޝިދާ މުހައްމަދު (ނާއްކޮ)، އަލީ ޝާހިދު (ސްޓެޕް އައްޔަ) އަދި އިބްރާހީމް ރިޔާޒް ވެސް ފިލްމުގައި ފެނިގެންދާނެ އެވެ.