7 ރަށެއްގެ ފެނާއި 8 ރަށެއްގެ ނަރުދަމާ އަދި 5 ރަށެއްގެ ބަނދަރުގެ މަޝްރޫއު ފަށަނީ

މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗާއިން އޮފިޑް ފަންޑުގެ އެހީގައި ހިންގުމަށް ހަމަޖެހިފައިވާ މަޝްރޫއުތައް ހާމަކޮށްފި އެވެ.

އެ މިނިސްޓްރީ ނެރުނު ބަޔާނެއްގައި ބުނެފައިވަނީ ޖުމްލަ 14.52 މިލިއަން ޑޮލަރުގެ މަޝްރޫއެއްގެ ދަށުން 7 ރަށެއްގެ ފެނުގެ ނިޒާމް، 8 ރަށެއްގެ ނަރުދަމާ ނިޒާމް، 5 ރަށެއްގެ ބަނދަރުގެ މަޝްރޫއު ފެށުމަށް ނިންމާފައިވާ ކަމަށެވެެ.

އެގޮތުން ފެނުގެ ނިޒާމް، ނަރުދަމާ ނިޒާމް ގާއިމް ކުރުމަށް ހަމަޖެހިފައިވަ ރަށްތައް:

- ހދ މަކުނުދޫ

- ހދ ނެއްލައިދޫ

- ހދ ނޭކުރެންދޫ

- ށ ފޭދޫ

- ބ ކެންދޫ

މި ރަށްތަކުގައި މި ދެ މަޝްރޫއުވެސް ކުރިއަށް ގެންދިއުމަށް ވަނީ ނިންމާފަ އެވެ. މި ރަށްތަކުގެ އިތުރުން ގދ ވާދޫގައި ނަރުދަމާގެ ނިޒާމް ގެ މަޝްރޫއު ކުރިއަށް ގެންދިއުމަށް ވަނީ ހަމަޖެހިފައެވެ.

ބަނދަރު ހެދުމަށް ހަމަޖެހިފައިވާ ރަށްތަށް:

- ބ ދޮންފަނު

- ބ ކިހާދޫ

- ބ ކުޑަރިކިލި

- ގއ ކޮލަމާފުށި

- ގއ ހޯޑެއްދޫ

މި ރަށްތަކުގައި މި މަސައްކަތް ފެށުމަށްޓަކައި ބިޑްކުރުމުގެ މަރުހަލާ މި އަހަރުގެ މެދުތެރޭގައި ފެށުމަށް ހަމަޖެހިފައިވާ ކަމަށްވެސް އެބަޔާނުގައި ބުނެފައިވެއެވެ. މި މަޝްރޫއުތަކުގެ އެޕްރެއިސަލް މިޝަން މިދިޔަ ޖެނުއަރީ މަހު ވަނީ ނިންމާފަ އެެވެ.