ފެނާއި ނަރުދަމާގެ ނިޒާމު ގާއިމް ނުކުރެވި ހުރި ރަށްރަށުގައި ހިދުމަތް ގާއިމް ކުރުމަށް އެއްބަސްވުމުގައި ސޮއިކޮށްފި

ރާއްޖޭގެ މީހުން ދިރިއުޅޭ ރަށްރަށުގެ ތެރެއިން ފެނާއި ނަރުދަމާގެ ނިޒާމު ގާއިމް ނުކުރެވި ހުރި ހުރިހާ ރަށެއްގައި، އެ ހިދުމަތް ގާއިމް ކުރުމުގެ އެއްބަސްވުމުގައި މިއަދު ސޮއިކޮށްފިއެވެ.

ރާއްޖޭގެ މީހުން ދިރިއުޅޭ ހުރިހާ ރަށެއްގައި ފެނާއި ނަރުދަމާގެ ހިދުމަތް ގާއިމް ކުރުމަކީ ރައީސް އިބްރާހިމް މުހައްމަދު ސޯލިހުގެ ވައުދުފުޅެކެވެ.

އެގޮތުން މިއަދު ބޭއްވި ހާއްސަ ރަސްމިއްޔާތެއްގައި އެއްބަސްވުންތަކުގައި ސޮއިކޮށްފައިވަނީ 16 ރަށެއްގެ ނަރުދަމާއާއި 23 ރަށެއްގެ ފެނުގެ ނިޒާމުގެއެވެ. މި އެއްބަސްވުންތަކުގެ މަސައްކަތް ނިމިގެންދާއިރު، ރާއްޖޭގެ ހުރިހާ ރަށެއްގައި ފެނާއި ނަރުދަމާގެ ހިދުމަތް ގާއިމްވެގެން ދާނެއެވެ.

މިއަދު ބޭއްވި ރަސްމިއްޔާތުގައި، ފެނާއި ނަރުދަމާގެ މަސައްކަތް ކުރުމަށް ފަސް ކުންފުންޏަކާ ވަނީ ހަވާލުކޮށްފައެވެ. އެއީ ފެނަކަ ކޯޕަރޭޝަނަށް 16 ރަށުގެ ފެނާއި ފަސް ރަށެއްގެ ނަރުދަމާ، ސްޓެލްކޯއަށް އެއް ރަށުގެ ނަރުދަމާ، ޑުޕްލެކްސް ޕްރައިވެޓް ލިމިޓެޑަށް ދެ ރަށެއްގެ ފެނާއި ނަރުދަމާގެ އިތުރުން މާކިޓެކް މޯލްޑިވްސްއަށް ތިން ރަށެއްގެ ފެނުގެ ނިޒާމާއި ދެ ރަށެއްގެ ނަރުދަމާއެވެ. އަދި އެއް ރަށުގެ ފެނާއި ނަރުދަމާގެ މަސައްކަތް ވަނީ ސާސް-އީ ކޮންސްޓްރަކްޝަންއާ ހަވާލުކޮށްފައެވެ.