ދިއްދޫގައި ޖޫނިއަރ ކޮލެޖެއް ހެދުމަށް ބަޖެޓްގައި ހިމަނައިފި

އަންނަ އަހަރު ހއ ދިއްދޫގައި ޖޫނިއަރ ކޮލެޖެއް ގާއިމުކުރުމަށް ބަޖެޓްގައި ހިމަނައިފި އެވެ. އެގޮތުން ޖޫނިއަރ ކޮލެޖް ހެދުމަށް 1.6 މިލިއަން ރުފިޔާ ވަނީ ހިމަނާފަ އެވެ.

އަންނަ 2020 ވަނަ އަހަރު ދިއްދޫގައި އަލަށް ފެށުމަށް ހަމަޖެހިފައިވާ މަޝްރޫއުތަކަށް ބަލާއިރު ހއ އަތޮޅު ތައުލީމީ މަރުކަޒުގެ އޮފީސް އިމާރާތާއެކު 12 ކުލާސް ރޫމް ހެދުމަށް 5.8 މިލިއަން ރުފިޔާ ވަނީ ހިމަނާފަ އެވެ. އަދި ދިއްދޫގައި ހުންނަ އަތޮޅު ހޮސްޕިޓަލުގައި އެކްސްޓެންޝަނަށް 8 މިލިއަން ބަޖެޓްކޮށްފައިވެ އެވެ.

19 މިލިއަން ރުފިޔާ ދިއްދޫ ބަނދަރު ހެދުމަށް ބަޖެޓްގައި ހިމަނާފައިވާއިރު ދިއްދޫގައި ފެން ހިންދާ ނިޒާމު ގާއިމުކުރުމަށް 2.7 މިލިއަން ރުފިޔާ ވަނީ ހިމަނާފަ އެވެ.

އަލަށް ފަށަން ހަމަޖެހިފައިވާ ބައެއް އެހެން މަޝްރޫއުތަކަށް ބަލާއިރު އެރަށުގެ ބިން ހިއްކުމަށް ބޭނުންވާ ސާރވޭ އާއި ޑިޒައިން ކުރުމަށް ހިމަނާފައިވާއިރު ދިއްދޫގައި މިސްކިތެއް އިމާރާތްކުރުމަށް 2.8 މިލިއަން ރުފިޔާ ބަޖެޓްކޮށްފައިވެ އެވެ.