ރާއްޖޭން ކޮރޯނާއަށް ޝައްކުކުރެވޭ އިތުރު ކޭހެއް ފެނިފައެއްނެތް

ކޮރޯނާ ވައިރަސްއާ ގުޅިގެން ޝައްކު ކުރެވޭ އިތުރު ކޭހެއް ފެނިފައިނުވާ ކަމަށާއި ނަމަވެސް ޗައިނާއިން އައި އިތުރު ދެ ދިވެއްސަކު ޓެސްޓު ހެދުމަށް އެކަހެރިކޮށްފައިވާ ކަމަށް ހެލްތް މިނިސްޓަރު އަބްދުﷲ ވިދާޅުވެއްޖެ އެވެ.

މިނިސްޓަރު މިހެން ވިދާޅުވީ ކޮރޯނާ ވައިރަސްއާ ގުޅިގެން އަޅަމުންދާ ފިޔަވަޅުތަކާއި ހާލަތު ސާފުކޮށް ދިނުމަށް ރޭ ބޭއްވި ނޫސްވެރިންގެ ބައްދަލްވުމެއްގައެވެ.

އެކަހެރިކުރި ދެ ދިވެހިން ކަރަންޓީން ކޮށްފައިވަނީ ބަލީގެ ކްރައިޓީރިއާއަށް ފެތިގެން ނޫން ކަމަށް މިނިސްޓަރު ވިދާޅުވިއެވެ.

ކޮރޯނާ ވައިރަހަށް މިހާތަނަށް ޝައްކު ކުރެވިފައިވަނީ ދިވެހި ފިރިހެނެކެވެ. އުމުރުން 20 އަހަރުގެ އެ ޒުވާނާއަކީ ޗައިނާގެ ޒިއާބިން ސިޓީގައި ބޭއްވި ފެއާއެއްގައި ބައިވެރިވުމަށް ބުދަ ދުވަހުގެރޭ މާލެ އައި މީހެކެވެ.

މިނިސްޓަރު ވިދާޅުވީ އޭނާގެ ސާމްޕަލްތައް ނެގުމަށްފަހު ޓެސްޓް ކުރުމަށް ފޮނުވާފައިވާ ކަމަށެވެ. ނަމަވެސް އެ ނަތީޖާތައް ލިބޭނީ އާދިއްތަ ދުވަހުއެވެ. އަމީން ވިދާޅުވީ ޒުވާނާގެ ހާލު ރަނގަޅު ކަމަށެވެ.