ހިތުގެ ޑޮކްޓަރު ހަމަޖެހިފައި ހުންނަތާ 20 ދުވަސްވެގެންދިޔައިރުވެސް ހިދުމަތް ލިބޭވަރެއް ނުވި

ކުޅުދުއްފުށީ ރީޖަނަލް ހޮސްޕިޓަލަށް ހިތުގެ ޑޮކްޓަރެއް ހަމަޖެހިފައިވާކަމަށާއި ވަރަށް އަވަހަށް އެ ޑޮކްޓަރު ހޮސްޕިޓަލަށް ފޮނުވޭނެކަމަށް ހެލްތު މިނިސްޓްރީން މީގެ ކުރިން ވަނީ ބުނެފައެވެ. ޑޮކްޓަރު ހަމަޖެހިފައި ހުންނަތާ ވިހިދުވަސްވެގެން ދިޔައިރު އަދިވެސް އެހިދުމަތް ފެށިފައިނުވާތީ މިއީ އެ ހިދުމަތް ހޯއްދަވަމުން ގެންދަވާ ފަރާތްތަކުން ޝަކުވާއެކެވެ.

މިދިޔަ އަހަރު އޮކްޓޯބަރުމަހު 11 ވަނަ ދުވަހު ކުޅުދުއްފުށީގައި ބޭއްވި ރަސްމިއްޔާތެއްގައި ސީޓީގެ ހިދުމަތާއި ކާޑިއެކްގެ ހިދުމަތްތައް ފައްޓަވައި ދެއްވުމަށްފަހު ހެލްތު މިނިސްޓަރު އަބުދުﷲ އަމީން ވިދާޅުވެފައިވަނީ މި ސެންޓަރާއެކު މި ސަރަހައްދުގެ ރައްޔިތުންނަށް ލުއި ފަސޭހަތަކެއް ލިބި މާލެ ގޮސް ހިތުގެ ބައްޔަށް ހަދަންޖެހޭ ޓެސްޓްތައް ހެދުމަށް ކުރަންޖެހޭ ހަރަދު ބޮޑުތަނުން ކުޑަވެގެންދާނެކަމަށާއި އެހިދުމަތް މެދު ނުކެނޑި ރައްޔިތުންނަށް ދިނުމަށް މަސައްކަތް ކުރައްވާނެކަމަށެވެ.

އެހެންނަމަވެސް މިއަދާއި ހަމައަށްވެސް ކުޅުދުއްފުށީ ރީޖަނަލް ހޮސްޕިޓަލުގައި ހިތުގެ ބައްޔަށް ފަރުވާ ދިނުމަށް ހުޅުވިގެން ދިޔަ ކާޑިއެކް ސެންޓަރުގައި ޑޮކްޓަރަކު ނެތިގެން އެސެންޓަރުގެ ހިދުމަތް ލިބިގެންނުދާތީ ގިނަބަޔަކު ދަނީ ހެލްތު މިނިސްޓްރީއަށް ފާޑުކިޔަމުންނެވެ.

ކޭއޯއިން ދެންނެވި ސުވާލަކަށް ޖަވާބު ދެއްވަމުން ހެލްތު މިނިސްޓްރީގެ މީޑިއާ އޮފިޝަލް މީގެކުރީން ވިދާޅުވީ ކުޅުދުއްފުށީ ރީޖަނަލް ހޮސްޕިޓަލަށް ހިތުގެ ޑޮކްޓަރެއް މިހާރު ހަމަޖެހި ވަރަށް އަވަހަށް ހޮސްޕިޓަލަށް ފޮނުވާނެކަމަށެވެ.

"ކޭއާރުއެޗަށް ފޮނުވާ ހިތުގެ ޑޮކްޓަރު ހުރީ މިހާރު ހަމަޖެހިފައި. ވަރަށް އަވަހަށް ޑޮކްޓަރު ފޮނުވާލެވޭނެ. އެޕްރޮސިޖާގެ ލާސްޓް ސްޓޭޖުގައި މިކޮޅުގައި އެމަސައްކަތް ތައް ހުރީ. އަޅުގަނޑަކަށް ވަކި ޑޮކްޓަރު ތިކޮޅަށް ދާނެ ޑޭޓެއް އަދި ދަންނަވަން ނޭނގޭ ވަރަށް އަވަހަށް ކުޅުދުއްފުއްޓަށް ޑޮކްޓަރުދާނެ" މިދިޔަ ޖެނުއަރީ މަހި 28 ވަނަދުވަހު ކޭއޯ އިން ދެންނެވި ސުވާލަކަށް ޖަވާބު ދެއްވަމުން ހެލްތު މިނިސްޓްރީގެ މީޑިއާ އޮފިޝަލް ވިދާޅުވިއެވެ.

ކުޅުދުއްފުށީ ރީޖަނަލް ހޮސްޕިޓަލަށް ފޮނުވުމަށް ނިންމާފައިވަނީ އައިޖީއެމްއެޗުން ކާޑިއޯ ޑޮކްޓަރެއް ކަމަށާއި ޑޮކްޓަރު ދިއުމާއެކު ހިދުމަތް ދާއިމީ ގޮތެއްގައި ހޮސްޕިޓަލުން ލިބިގެންދާނެކަމަށް މީގެ ކުރިން މީޑިއާ އޮފިޝަލް ވަނީ ވިދާޅުވެފައެވެ.

ކޭއާރުއެޗުން އެހިދުމަތް ހޯއްދަމުންގެންދާ ބަލި މީހަކު ބުނީ އަނެއްކާވެސް މިޖެހުނީ އެ ޓެސްޓްތައް ހަދަން މާލެދާންކަމަށާއި މިއީ ވަރަށް ބޮޑު ހަރަދެއްކަމަށެވެ.

"ހެލްތު މިނިސްޓްރީން މީޑިއާގައި ބުނަމުންމިގެންދަނީ އައިޖީއެމް އެޗްގެ ކާޑިއޯ ސެންޓަރުގައި މަސައްކަތް ކުރާ ޑޮކްޓަރަކު ކުޅުދުއްފުއްޓަށް ވަރަށް އަވަހަށް ދާނެކަމަށް. ހިތުގެ ޑޮކްޓަރު ހުރީ ހަމަޖެހިފައިކަމަށް. އަދިވެސް އެބުނާ ޑޮކްޓަރެއް ނާދޭ ހިދުމަތެއް ނުލިބޭ ސެންޓަރުހުންނަނީ ތަޅުލެވިފައި" އެމީހާ ހިތްހަމަނުޖެހި ހުރެ ބުންޏެވެ.

އިތުރަށް އެމީހާ ބުނީ ހަމަޖެހިފައި މާލޭގައި ހުރި ޑޮކްޓަރު ކުޅުދުއްފުއްޓާ ހަމައަށް ގެންނަން ދެމަސް ނޫނީ ތިންމަސް ނަގަންޖެހޭނެ ކަމަށް ގަބޫލުނުކުރެވޭ ކަމަށާއި މުޅިންވެސް މިސަރުކާރުން މިގެންދަނީ ރައްޔިތުން ގުންބޯހައްދަމުންކަމަށެވެ.

އެހިދުމަތް ހޯއްދަވަމުންގެންދަވާ ފަރާތްތަކުގެ މިޝަކުވާތަކާއި ގުޅިގެން ކޭއޯގެ ފަރާތުން އަނެއްކާވެސް ހެލްތު މިނިސްޓްރީ ބަހެއް ލިބޭތޯ ކުރި މަސައްކަތް އަދި ވަނީ ކާމިޔާބުނުވެފައެވެ.

ކުޅުދުއްފުށީ ރީޖަނަލް ހޮސްޕިޓަލަކީ ހއ. ހދ . ށ މިތިން އަތޮޅުގެ ރައްޔިތުން ހިދުމަތް ހޯދަމުންދާ ހޮސްޕިޓަލެކެވެ. ދުވާލެއްގެ މައްޗަށް 300 އަށްވުރެ ގިނަ މީހުން އަދި ރަށުން ބޭރު އެންމެ ގިނަ މީހުން ކުޅުދުއްފުއްޓަށް އަންނަ ހޮނިހިރު ދުވަހު 600 އަށްވުރެން ގިނަ މީހުން ދަނީ ހޮސްޕިޓަލުން ހިދުމަތް ހޯދަމުންނެވެ.