އިޓަލީގެ ގިނަ ފަތުރުވެރިން މިއަދު ފުރާނެ

މިހާރު ރާއްޖޭގައި ތިބި އިޓަލީގެ ފަތުރުވެރިންގެ ތެރެއިން 200 އަށް ވުރެ ގިނަ މީހުން މިއަދު ފުރާނެކަމަށް ސަރުކާރުން ބުނެފިއެވެ.

ކޮރޯނާވައިރަހާ ގުޅިގެން ރާއްޖެ އާއި އިޓަލީއާ ދެމެދު ދަތުރުތައް މެދުކަނޑާލާ، އެގައުމުން ރާއްޖެ އަންނަ މީހުން އެތެރެވުން ވަނީ ހުއްޓުވާފަ އެވެ.

ރާއްޖެއިން މިހާތަނަށް 13 މީހަކު ކޮރޯނާއަށް ޕޮޒިޓިވް ވެފައިވާއިރު، އޭގެތެރޭގައި އިޓަލީގެ ނުވަ މީހަކު ހިމެނެއެވެ. މީގެ ތެރެއިން ދެ މީހަކަށް ދަރުމަވަންތަ ހޮސްޕިޓަލުގައި ދަނީ ފަރުވާ ދެމުންނެވެ.

އިޓަލީ ފަތުރުވެރިން ބަލާ އަލިޓާލިއާގެ ފްލައިޓެއް މިއަދު އައިސްފައިވާއިރު އެ ގައުމުގެ ފަތުރުވެރިން ބަލާ މިދިޔަ ހަފްތާގެ އާދިއްތަ ދުވަހުވެސް އެލިޓަލިއާގެ ދެ ފްލައިޓު ރާއްޖެ އައިސްފައިވެއެވެ.

ރާއްޖެއިން ކޮރޯނާ ފެނިފައިވަނީ އިޓަލީގެ ފަތުރުވެރިއަކު ރާއްޖޭގައި ޗުއްޓީ ހޭދަކުރުމަށްފަހު އެނބުރި ގައުމަށް ދިޔަފަހުން އޭނާ ބައްޔަށް ޕޮޒިޓިވްވިކަން އަންގާފައި ވަނިކޮށް، އެ ފަތުރުވެރިޔާ ހުރި، ޅ. ކުރެއްދޫ ރިސޯޓުންނެވެ.

އިޓަލީގެ އިތުރުން ޗައިނާ އާއި ސްޕެއިން އިން ރާއްޖެއަށް މީހުން އައުން ހުއްޓުވާފައިވާއިރު، ޖަރުމަނުގެ ތިން ސަރަހައްދަކާއި ކޮރެއާ އަދި ފްރާންސްގެ ދެ ސަރަހައްދެއްގެ އިތުރުން ބަންގްލަދޭޝް އިންވެސް ރާއްޖެ އެތެރެވުން ވަނީ މަނާކޮށްފައެވެ.

ރާއްޖެއިން ބައްޔަށް ޕޮޒިޓިވްވި މީހުންގެ ތެރޭގައި ދެން ހިމެނެނީ ތުރުކީ، ޖަރުމަނު، ދެކުނު އެފްރިކާ އަދި އިނގިރޭސިވިލާތުން، ކޮންމެ ގައުމަކުން އެކަކެވެ.