ކޮވިޑް-19 އަށް ޝައްކުކުރެވޭ އަލާމާތްތަކެއް ހުރި ދިވެއްސެގެ ސާމްޕަލް ޓެސްޓުކުރަނީ

ޔޫރަޕާއި މެދުއިރުމައްޗަށް ދަތުރުކޮށްފަ އައި ދިވެއްސެއްގެ ގައިން ކޮވިޑް-19 އަށް ޝައްކުކުރެވޭ އަލާމާތްތަކެއް ހުރެގެން އޭނާގެ ސާމްޕަލް ޓެސްޓްކުރުމުގެ މަސައްކަތް ފަށައިފި އެވެ.

ހެލްތް ޕުރޮޓެކްޝަން އެޖެންސީ (އެޗްޕީއޭ) އިން ބުނީ ރައްކާތެރިކަމުގެ ގޮތުން އަމަލު ކުރަމުންދާ އުސޫލުގެ ދަށުން ކޮވިޑް-19 އަށް ޝައްކުކުރެވޭ އަލާމާތްތައް ހުރެގެން ވިލާތާއި މެދުއިރުމައްޗަށް ދަތުރުކޮށްފައި އައި ދިވެއްސެއްގެ ސާމްޕަލް ނަގާ ޓެސްޓްކުރުމުގެ މަސައްކަތް ކުރިއަށްގެންދާ ކަމަށެވެ.

އެޗްޕީއޭއިން އިން ބުނީ އޭނާ ވެލިދޫ އައިސޮލޭޝަން ފެސިލިޓީއަށް ގެންގޮސް އެކަހެރި ކުރުމުގެ މަސައްކަތް ކުރަމުންދާ ކަމަށެވެ.

މިހާތަނަށް ރައްޖެއިން 13 ބިދޭސީން މި ވައިރަހަށް ޕޮޒިޓިވްވެފައި ވާއިރު އޭގެ ތެރެއިން 3 މީހުން ވަނީ ބަލިން ރަނގަޅުވެފައެވެ. ރައްކާތެރިކަމުގެ ފިޔަވަޅެއްގެ ގޮތުން މިހަފްތާގެ ނިޔަލަށް ސަރުކާރު ބަންދުކޮށްފައިވާއިރު ޑޮކްޓަރުން ތަކުރާރުކޮށް ކުރައްވާ އިލްތިމާސް އަކީ ބޭރަށް ނިކުތުން މަދުކޮށް ގޭގަައި ތިބުމަށް ކުރައްވާ އިލްތިމާސް އެވެ.