ބާޒާރުން މަދުވަމުންދާ މުދަލުގެ ޝިޕްމެންޓެއް ގެނެސްފި

ކޮވިޑް-19 އާ ގުޅިގެން ރާއްޖެއަށް ޝެޑިއުލް ފްލައިޓް ހުއްޓާލާފައިވާތީ، ރާއްޖެއިން މަދުވަމުންދާ ގިނަ އަދަދެއްގެ މުދާ މިމަހު 27 އަދި 28 ވަނަ ދުވަހު އެތެރެކޮށްފި އެވެ.

މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބުނީ ރާއްޖެ ގެނެސްފައި ވަނީ 5250 ކޭސް ބިސް، 6000 ބަސްތާ ފިޔާ އަދި 1580 ބަސްތާ އަލުވީގެ އިތުރުން ހިމެނެނީ 684 ކޭސް ޓޮމާޓޯ، 840 ބަސްތާ ކެބެޖް، 1246 ގަނޑު ދޮންކެޔޮގެ އިތުރުން 444 ކޭސް އަލަނާސި އެވެ.

އިންޑިޔާ މަގުން ރާއްޖެއަށް މި މުދާ ގެނެސްފައި ވަނީ ރާއްޖެއާ އިންޑިއާއާ ދެމެދު ދަތުރުކުރާ "ނިއުމަތު 2" އާއި "އެމްސެސްވީ ރާޖު" ބޯޓުގަ އެވެ.

ރާއްޖެ އިން މުދާ ހުސްވިޔަ ނުދިނުމަށްޓަކައި ސަރުކާރުން ވަނީ ގިނަ ފިޔަވަޅު ތަކެއް އަޅަން ފަށާފަ އެވެ. މިގޮތުން ގައުމީ އެއާލައިން މޯލްޑިވިއަންގެ ޗާޓަރު ފްލައިޓެއްގައި 10 ޓަނުގެ މުދާ ރޭ ވަނީ ގެނެސްފަ އެވެ.

ކޮވިޑް ރޯގާގެ ސަބަބުން ރާއްޖެއަށް އާއްމުކޮށް މުދާ އެތެރެކުރާ އިންޑިއާއިން ވަނީ އެ ގައުމު ލޮކްޑައުން ކޮށްފަ އެވެ. މި ލޮކްޑައުން ކުރުމާއެކު ރާއްޖޭގެ ބާޒާރުގައި ބައެއް ތަކެތި ވަނީ ހުސްވެފަ އެވެ. އަދި ބައެއް ތަކެތީގެ އަގުތައް ވަނީ ބޮޑުކޮށްފަ އެވެ. އަގު ބޮޑުވި ބާވަތްތަކުގެ ތެރޭގައި ފިޔާ، އަލުވި އަދި ބިސް ވެސް ހިމެނެ އެވެ.

މީގެ އިތުރުން ސްރީލަންކަން އެއާލައިންސްގެ ފްލައިޓެއް މާދަމާ މުދާ ބަލާ ފުރުމަށް ވަނީ ހަމަޖެހިފަ އެވެ.