ރިސޯޓުން މުވައްޒަފުން ފޭބުމުގެ ހުއްދަ ދިނުމުގައި ބަދަލުތަކެއް

ކޮވިޑް-19 ރާއްޖެއިންވެސް ފެނިފައިވާތީ އެ ވައިރަސް ކޮންޓްރޯލުކުރަން އަޅާފިޔަވަޅުތަކެއްގެ ގޮތުން ރިސޯޓްތަކުން މުވައްޒަފުން ފޭބުމާއި ރަށްރަށަށް ދަތުރު ކުރުމުގެ ހުއްދަ ދިނުމުގައި ލުއިތަކެއް ލިބޭ ގޮތަށް، ކުރީގެ އެންގުމަށް ބަދަލު ގެނެސްފި އެވެ.

މިވައިރަހާ ގުޅިގެން އިއުލާން ކޮށްފައިވާ ސިއްހީ ކުއްލި ނުރައްކަލުގެ ހާލަތުގައި ޓޫރިސްޓުން ރަށްރަށަށް އެރުވުމާއި ރިސޯޓްތަކާއި ރަށްރަށާ ދެމެދު ދަތުރު ކުރުމަކީ މަނާ ކަމެކެވެ. އަދި މުވައްޒަފުންނަށް ރިސޯޓްތަކުން އެހެން ރަށްރަށަށް ދެވޭނީ އެންމެ ފަހު ޓޫރިސްޓު ފުރާތާ 14 ދުވަސް ހަމަވުމުންނެވެ.

ހެލްތް ޕްރޮޓެކްޝަން އޭޖެންސީން ރޭ އާންމުކުރި އެންގުމުގައިވާ ގޮތުން ޓޫރިސްޓުން ރިސޯޓުގައި ތިއްބަސް ރިސޯޓުން ކަނޑައަޅާ ތަނެއްގައި 14 ދުވަސް ވަންދެން ކަރަންޓީންގައި ހޭދަކުރުމަށް ފަހު މުވައްޒަފުންނަށް އެހެން ރަށަކަށް ދެވިދާނެ ކަމަށެވެ. ނަމަވެސް އެ ހާލަތުގައި ރިސޯޓުން ފޭބުމުގެ ހުއްދަ ދެވޭނީ ކޮވިޑް-19 އަށް ޓެސްޓް ކުރުމަށް ފަހު ނަތީޖާ ލިބުމުން ކަމަށް އެ އެންގުމުގައިވެ އެވެ.

މީގެ އިތުރުން އެންމެ ފަހު ޓޫރިސްޓު ރިސޯޓަށް ދިޔަތާ 14 ދުވަސް ހަމަވުމަށް ފަހު އެ މުއްދަތުގައި އެ ބައްޔަށް ޕޮޒިޓިވްވި މީހެއް ނުވަތަ ޝައްކު ކުރެވޭ މީހަކު ރިސޯޓުގައި ނެތް ނަމަ މުވައްޒަފުންނަށް އެހެން ރަށްރަށަށް ދަތުރު ކުރެވިދާނެ ކަމަށް އެ އެންގުމުގައިވެ އެވެ. އަދި ފަހު ޓޫރިސްޓް ރިސޯޓުން ފޭބިތާ 14 ދުވަސް ހަމަވުމުން ވެސް އެހެން ތަންތަނަށް ދަތުރު ކުރުމުގެ ހުއްދަ މުވަައްޒަފުންނަށް އޮންނާނެ ކަމަށް އެ އެންގުމުގައިވެ އެވެ.

ނަމަވެސް އެންގުމުގައިވާ ގޮތުން، މުވައްޒަފުންނަށް ރިސޯޓުން ފޭބުމުގެ ހުއްދަ ދެވޭނީ އެޗްޕީއޭ އަށް އެކަން ހުށަހަޅައި ހުއްދަ ދިނުމުންނެވެ.

ކޮވިޑް-19 އަށް 18 މީހަކު ރާއްޖެއިން ވަނީ ޕޮޒިޓިވްވެފަ އެވެ. އޭގެ ތެރެއިން 13 މީހަކު މިހާރު ވަނީ ރަނގަޅުވެފަ އެވެ. މީގެ ތެރޭގައި 3 ދިވެހިން ހިމެނެ އެވެ.