ލޮކްޑައުން ނިމުނުހާ އަވަހަށް ކެންސަލްވި ދަތުރުތައް އަލުން ފަށާނަން

ކޮވިޑް-19 އާއި ގުޅިގެން މޯލްޑިވިއަނުން ކެންސަލްވި ދަތުރުތައް ލޮކްޑައުން ގެ ހާލަތު ނިމުނުހާ އަވަހަށް އަލުން ޝެޑިއުލް ކުރާނެކަމަށް މޯލްޑިވިއަނުން ބުނެފި އެވެ.

ކޮވިޑް-19 އާއި ގުޅިގެން މޯލްޑިވިއަނުން ވަނީ އެތެރޭގެ އުދުހުންތައް ވަކި މުއްދަތެއްނެތްގޮތައް ކެންސަލްކޮށްފައެވެ.

މޯލްޑިވިއަނުން ބުނީ ލޮކްޑައުންގެ ހާލަތު ނިމުނުހާ އަވަހަކަށް ކެންސަލްވި ދަތުރުތައް އަލުން ޝެޑިއުލްކޮށް ކަސްޓަމަރުންނަށް އަންގަމުން ގެންދާނެކަމަށެވެ.

އެ ކުންފުނީގެ އެތެރޭގެ އުދުހުންތައް މިމަހުގެ 15 ވަނަ ދުވަހު މާލެއަށް ލޮކްޑައުން އިއުލާންކުރި ހިސާބުން ވަނީ ކެންސަލްކޮށްފައެވެ.

އެތެރޭގެ އުދުހުންތައް މެދުކަނޑާލުމުގެ އިތުރުން މޯލްޑިވިއަނުން ވަނީ އެ ކުންފުނީގެ ކޯލް ސެންޓަރ އަދި ވައިބަރ ޕްލެޓްފޯމްގެ ހިދުމަތްވެސް ވަގުތީގޮތުން މެދުކަނޑާލާފައެވެ.

ކޮވިޑް-19 ފެތުރުން ކޮންޓްރޯލް ކުރުމަށްޓަކައި މާލެސިޓީ ސަރަޙައްދު، ކުރިއަށް އޮތް ދެ ހަފްތާއަށް ފުރަބަންދު ކުރުމަށް މިދިޔަ ހުކުރުދުވަހުވަނީ ނިންމާފައެވެ. އަދި ކި ގޮތެއް އަންގަންދެން ޒަރޫރީ ބޭނުމެއްގައި ނޫނީ މާލެ، ވިލިމާލެ، ހުޅުމާލެ ފިޔަވައި ރާއްޖޭގެ އެއްރަށުން އަނެއް ރަށަށް ދަތުރުކުރުން ހުއްޓައިލުމަށްވެސް ވަނީ އެޗްޕީއޭއިން އަމުރުކުރައްވާފައެވެ.