ހުއްދަނުހޯދާ ބިލެތްފައްސަށް އެރި ތިން މީހުން ހައްޔަރުކޮށްފި

ކޮވިޑް-19 އާ ގުޅިގެން ށ. ބިލެތްފަހި މޮނިޓަރިންގެ ހާލަތުގައި ވަނިކޮށް ހުއްދަނެތި އެ ރަށަށް އެރި ތިން މީހަކު ހައްޔަރުކޮށްފި އެވެ.

ފުލުހުން ބުނީ އެ ތިން މީހުން ބިލެތްފައްސަށް ދިޔައީ ށ. ފޭދޫން ފުރައިގެން ކުޑަ ޑިންގީއެއްގަ ކަމަށާއި ހުއްދަ ނުހޯދައި މި މީހުން ދަތުރުކުރިއިރު، ބިލެތްފައްސަށް އަރައި ފޭބުން އޮތީ މަނާކޮށްފަ އެވެ.

މީހުން ހައްޔަރުކުރީ ބިލެތްފައްސަށް ދިއުމަށް ފަހު އެނބުރި ފޭދު އަށް ދިޔަ މަގުމަތީގަ އެވެ. މި މައްސަލަ ފުލުހުން އަންނަނީ ތަހުގީގު ކުރަމުންނެވެ.

ބިލެތްފަހި މޮނިޓަރިންގެ ހާލަތަށް ލީ މާލެ އިން ފުރައިގެން ދިޔަ ށ. ނަރުދޫ އަމާޒު ބޯޓުގެ ކެޕްޓަން އާއި އެހެން ބައެއް މީހުން ބައްޔަށް ޕޮޒިޓިވްވުމުންނެވެ. ކެޕްޓަން ޕޮޒިޓިވްވުމާ ގުޅިގެން ގިނަ ރަށްތަކަކަށް ބަލި ފެތުރިދާނެ ކަމުގެ ބިރު ވަނީ ބޮޑުވެފަ އެވެ.

ރާއްޖެއިން މިހާތަނަށް ކޮވިޑް-19 އަށް ވަނީ 250 މީހުން ޕޮޒިޓިވްވެފަ އެވެ. އޭގެ ތެރެއިން 17 މީހަކު ރަނގަޅުވެ، މިހާރު ފަރުވާ ދެމުން އަންނަނީ 233 މީހުންނަށެވެ.