މަރުވި ދެވަނަ މީހާގެ ކޮންޓްރެކްޓް ޓްރޭސިން ފާހަގަވި 66 މީހަކު އެކަހެރިކޮށްފި

ކޮވިޑްގައި ރާއްޖެއިން މަރުވި ދެވަނަ މީހާގެ ކޮންޓެކްޓް ޓްރޭސިންގެ ތެރެއިން 66 މީހަކު ފާހަގަ ކުރެވި އެމީހުން އެކަހެރި ކުރެވިފައިވާ ކަމަށް އެންއީއޯސީން ބުނެފި އެވެ.

މިރޭ ބޭއްވި ނޫސްވެރިންގެ ބައްދަލްވުމުގައި ޑރ. އިބްރާހިމް އަފްޒަލް ވިދާޅުވީ މިއަދު މަރުވި ބިދޭސީ މީހާގެ ކޮންޓެކްޓް ޓްރޭސިންގެ ތެރެއިން 66 މީހަކު ފާހަގަ ކުރެވިފައިވާ ކަމަށެވެ.

ކޮވިޑްގައި ރާއްޖެއިން މަރުވި ދެވަނަ މީހަކީ އެމްއެންޑީއެފްގައި މަސައްކަތް ކުރަމުންދާ މީހެކެވެ. މިއަދު މަރުވި އެ މީހާއަކީ އެމްއެންޑީއެފްގެ ކަޅުތުއްކަލާ ކޮށީގައި މަސައްކަތް ކުރަމުންދާ މީހެކެވެ. އޭނާއަކީ އެ ތަނުގެ ގުދަނުގައި މަސައްކަތު މީހެއްގެ ވަޒީފާގައި ހުރި މީހެކެވެ.

މަރުވެފައިވަނީ ބަންގްލަދޭޝްއަށް ނިސްބަތްވާ 33 އަހަރުގެ ޒުވާނެކެވެ. އޭނާ މަރުވިއިރު ކޮވިޑަށް ޕޮޒިޓިވްވެފައިވީ ނަމަވެސް މަރުވީ ސިއްހީ އެހެން މައްސަލަތަކެއް ކުރިމަތި ވެގެންނެވެ.

ސިފައިންގޭގެ ގުދަނެއްގައި މަސައްކަތްކުރާ ބިދޭސީއަކު ކޮވިޑަށް ޕޮޒިޓިވްވެ މަރުވެފައިވާއިރު ރާއްޖެއިން ބަލި ޖެހުނު މީހުންގެ ތެރޭގައި ސިފައިންގެ މީހުން ވެސް ހިމެނެ އެވެ.