އިންޑިޔާގެ ނުވަ ސިޓީއެގައި ތިބި 200 ދިވެހިން ގެންނަނީ

އިންޑިއާގެ ނުވަ ސިޓީއެއްގައި ތިބި 200 ދިވެއްސަކު އަންނަ ހަފުތާގައި ރާއްޖެ ގެންނަން ނިންމައިފި އެވެ.

ފޮރިން މިނިސްޓްރީން މިއަދު ބުނީ އެ މީހުން އަންނާނީ އަމިއްލައަށް ޓިކެޓު ގަނެގެންނެވެ. އެމީހުން ގެންނަނީ މޯލްޑިވިއަން ގެ ޗާޓަރ ޕްލައިޓެއްގަ ކަމަށާއި ޓިކެޓިންގެ ކަންކަން ކުރިއަށްގެންދާނީ މޯލްޑިވިއަނުން ކަމަށް ބުންޏެވެ.

އެގޮތުން އިންޑިޔާގެ ޕަންބްޖާބު، ކަލްކަތާ، ގުރްގުއާން، ރިޝިކޭޝް، ދިއްލީ، ވެއްލޫރު، ޗެންނާއި، ޓްރިވެންޑްރަމް އަދި ކޮޗިން އިން ދިވެހިން ގެނައުމަށް ވަނީ ހަމަޖެހިފަ އެވެ.

މީހުން ގެންނަ ބޯޓު އެންމެ ފުރަތަމަ ޖައްސާނީ ދިއްލީއަށެވެ. އެއަށް ފަހު މާލެ އަންނާނީ ޓްރިވެންޑްރަމުން މީހުން ގޮވައިގެންނެވެ.

އިންޑިއާއިން 200 ދިވެހިން ގެނައުމަށްފަހު، ހަމަޖައްސާފައިވާ އުސޫލުގެ ތެރެއިން 14 ދުވަހަށް ކަރަންޓީން ކުރާނެ އެވެ.

އެހެން ސިޓީތަކުގައި ތިބި ދިވެހިން، ފްލައިޓް ޖައްސާ ސިޓީތަކަށް ގެންދިއުމުގައި ރާއްޖޭގެ ހައި ކޮމިޝަނުންނާއި ޓްރިވެންޑްރަމްގައި ހުންނަ ދިވެހިރާއްޖޭގެ ކޮންސިއުލޭޓް ޖެނެރަލުން އެހީތެރިކަން ފޯރުކޮށްދޭނެ ކަމަށް މިނިސްޓްރީގެ ކޮމިއުނިކޭޝަން ޑިރެކްޓަރު މިއުވާން މުހައްމަދު ވިދާޅުވި އެވެ.

އިންޑިއާގައި ތިބި ދިވެހިން ގެންނަން ކުރިއަށް އޮތް ތަނުގައި ވެސް އެފަދަ ފްލައިޓުތައް ބާއްވާނެ ކަމަށް ބުންޏެވެ.