ހުއްދަ ހޯދުމަށްފަހު ފިހާރަތައް ނުހުޅުވާނަމަ ފިޔަވަޅު އަޅަނީ

ފިހާރަ ހުޅުވާފައި ބެހެއްޓުމަށް ހުއްދަ ހޯދުމަށްފަހު ފިހާރަތައް ބަންދުކޮށްފައި ހުންނަކަން ފާހަގަ ވެފައިވާ ކަމަށާއި މިގޮތަށް އަމަލު ކުރާނަމަ އެކަމުގައި ފިޔަވަޅު އަޅާނެ ކަމަށް ފުލުހުން ބުނެފިއެވެ.

ކޮވިޑް19 އާއި ގުޅިގެން މާލެ ސަރަހައްދު ލޮކްޑައުން ކޮށްފައިވާއިރު، ގޭގެއަށް ބޭނުންވާ އަސާސީ ތަކެތި ގަތުމަށް ކޮންމެ ގޭބީސީ އަކުން އެކަކަށް ފުލުހުން ދަނީ ހުއްދަ ދޫކުރަމުންނެެވެ.

މާލެ އެކި ސަރަހައްދުތަކަށް ބަހާލުމަށްފަހު އެމީހަކު ދިރިއުޅޭ ސަރަހައްދެއްގައި ހުންނަ ފިހާރަތަކުން ވިޔަފާރި ކުރުމުގެ ފުރުސަތު ދޭއިރު، ފިހާރަތައް ބަންދުކޮށްފައި ހުންނަ ޝަކުވާ ދަނީ އިވެމުންނެވެ.

ފުލުހުން ބުނީ ފިހާރަތަކުގައި މަސައްކަތް ކުރުމަށް ހުއްދަ ދީފައިވާ އަދަދަށްވުރެ އިތުރަށްވެސް މީހުން ފިހާރަތަކުގައި ތިބޭކަން ފާހަގަ ކުރެވިފައިވާ ކަމަށެވެ. އެފަދަ ފަރާތްތަކާމެދުވެސް ފިޔަވަޅު އަޅާނެ ކަމަށް ފުލުހުން ވަނީ ބުނެފައެވެ.