މެލޭޝިޔާގައި އުޅޭ ދިވެހިންނަށް "މެރަނަ" ސްކީމުން ބޭސް ކުރެވޭނެ ފަސޭހަގޮތެއް

ރާއްޖޭން ބޭރުގައި ދިރިއުޅޭ ދިވެހިން ބޭސް ފަރުވާގެ ހިދުމަތް ހޯދުމުގައި ލުއި ފަސޭހަ ގޮތެއް ފަހި ކޮށްދޭން ގާއިމު ކޮށްފައިވާ "މެރަނަ" ސްކީމުން މެލޭޝިޔާގައި ދިރިއުޅޭ ދިވެހިން ބޭސް ފަރުވާ ކުރެވޭނެ ފަސޭހަ ގޮތެއް ހަމަޖައްސައިފި އެވެ.

އެގޮތުން އާސަންދަ ކުންފުނިން ބުނީ މެރަނަ ސްކީމްގެ ދަށުން ބޭސް ފަރުވާ ކުރަން ކަނޑައަޅާފައިވާ ހޮސްޕިޓަލްތަކާއި ސިއްހީ ހިދުމަތް ދޭ ތަންތަނަށް ދިއުމުގައި މިވަގުތު ދަތިތަކެއް ދިމާވެފައިވާ ކަމަށާއި އެހެން ކަމުން ދިރިއުޅޭ ސަރަހައްދާ 10 ކިލޯމީޓަރު ކައިރީގައި ސްކީމްގައި ހިމެނޭ ސިއްހީ ހިދުމަތް ދޭ ސެންޓަރެއް ނެތްނަމަ ބޭނުންވާ ހިދުމަތް ރަނގަޅު އަގެއްގައި ލިބެންހުރި ސިއްހީ ހިދުމަތްދޭ ތަނަކުން ހިދުމަތް ހޯދުމަށް ފަހު ހަރަދުވީ ތަފްސީލް އެނގޭނެ ބިލްތައް ހުށައެޅުމުގެ ފުރުސަތު ހުޅުވާލާފައިވާ ކަމަށެވެ.

މެރަނަ ސްކީމްގެ ހިދުމަތް ފަށާފައި ވަނީ އޮކްޓޫބަރު 15، 2019 ގައެވެ. އެ ސްކީމްގެ ބައިވެރިއަކަށް ކަވަރޭޖް ގޮތުގައި އަހަރަކު 150،000 ރުފިޔާ ހަމަޖެހެ އެވެ. އެޑްމިޓް ނުކޮށް ހޯދާ ހިދުމަތްތަކުގެ މިންވަރަކީ ކަވަރޭޖްގެ ތެރެއިން އަހަރު 10،000 ރުފިޔާ އެވެ. އެޑްމިޓް ކޮށްގެން ދޭ ހިދުމަތުގެ މިންވަރަކީ އެޑްމިޓް ނުކޮށް ހޯދާ ކޮންމެ ހިދުމަތްތަކުގެ ކަވަރޭޖް ހިމަނައިގެން 150،000 ރުފިޔާ އެވެ.

މި ސްކީމްގެ ހިދުމަތް ސްރީލަންކާ އިންޑިއާ އަދި މެލޭޝިއާގައި ދިރިއުޅޭ ދިވެހިންނަށް ލިބެއެވެ.