ފްރަންޓްލައިންގައި މަސައްކަތް ކުރާ ސްޓާފުންނަށް ހާއްސަކޮށް 3000 ކޮޓަރި

ކޮވިޑް-19 އިގެ ބަލިމަޑުކަމުގެ ތެރޭ ފްރަންޓްލައިންގައި މަސައްކަތް ކުރާ މީހުންނަށް 3،000 ކޮޓަރި ހާއްސަ ކޮށްފި އެވެ.

މިއަދު އެންއީއޯސީން ބޭއްވި ނޫސްވެރިންގެ ބައްދަލުވުމުގައި ޓޫރިޒަމް މިނިސްޓަރު އަލީ ވަހީދު ވިދާޅުވީ ފްރަންޓްލައިންގައި މަސައްކަތް ކުރާ މީހުންނަށް މާލެ ސަރަހައްދުގައި ހުރި ރިސޯޓްތަކުން 3،000 ކޮޓަރި ހާއްސަ ކޮށްފައިވާ ކަމަށާއި ކޮވިޑްގެ ބަލިމަޑު ކަމުގެ ތެރޭގައި ވަރަށް ގިނަ މުއައްސަސާތަކުގެ މުވައްޒިފުން ފްރަންޓް ލައިންގައި މަސައްކަތް ކުރަމުން ގެންދާއިރު އެ މުވައްޒަފުން މަސައްކަތަށް ފަހު އެނބުރި ގެއަށް ދިއުމަކީ ގޭގައި ތިބި އާއިލާތަކަށް ރައްކާތެރި ކަމަކަށް ނުވާތީ އެހެން ތަންތަނުގައި ނިދޭނެ އިންތިޒާމް ހަމަޖައްސަން ޖެހޭ ކަމަށެވެ.

ކޮޓަރި ހާއްސަ ކޮށްފައިވަނީ ނަމަވެސް އެއީ ކޮންކޮން ރިސޯޓްތަކެއް ކަމެއް އަދި މިހާރު އެ ތަންތަން ބޭނުން ކުރަމުންދާ ކަމެއްވެސް މިނިސްޓަރު ވިދާޅެއް ނުވެ އެވެ.

ކޮވިޑް ޖެހިފައިވާ މީހުންނާއި ކަރަންޓީނަށް ގެންދާ މީހުންނާއި އައިސޮލޭޓް ކުރާ މީހުން ވެސް ބައިތިއްބަނީ ރިސޯޓްތަކުގައި ހަދާފައިވާ ކަރަންޓީން އަދި އައިސޮލޭޝަން ފެސިލިޓީތަކުގަ އެވެ.