ގެއްލިގެން ހޯދަމުންދިޔަ އެކަކު އޮތީ ވެންޓިލޭޓަރުގައި

ކޮވިޑް-19 އަށް ޕޮޒިޓިވްވެގެން ހޯދަމުންދިޔަ ހަތް ބިދޭސީންގެ ތެރެއިން ފެނުނު އެކަކު މިހާރު އޮތީ ވެންޓިލޭޓަރުގައި ކަމަށް ނޭޝަނަލް އެމަޖެންސީ އޮޕަރޭޝަން ސެންޓަރުން (އެންއީއޯސީ) އިން ބުނެފި އެވެ.

ރޭ ބޭއްވި މީޑިއާ ބްރީފިންގައި އެ ސެންޓަރުގެ ތަރުޖަމާން މުހައްމަދު މަބްރޫކް އަޒީޒް ވިދާޅުވީ، ވީ ތަނެއް ނޭނގިގެން ހޯދަމުން އައި ހަތް މީހުންގެ ތެރެއިން ހަތަރު މީހަކު މިހާރު ފެނިފައިވާ ކަމަށެވެ. މިހާރު ނުފެންނަނީ ތިން މީހެކެވެ. މި މީހުން ހޯދުމަށް ވަނީ ފުލުހުންގެ އެހީތެރިކަމަށް ވެސް އެދިފަ އެވެ.

ފުލުހުންގެ މަސައްކަތުން އަނެއް ތިން މީހުން ނުފެނިއްޖެ ނަމަ އާއްމު ސިއްހަތު ރައްކާތެރިކުރުމުގެ ގާނޫނުގެ ދަށުން ޑިރެކްޓާ ޖެނަރަލް އޮފް ޕަބްލިކް ހެލްތަށް ލިބިދޭ ބާރުގެ ދަށުން އެ ބައެއްގެ ޒާތީ މައުލޫމާތު ހާމަކުރާނެ ކަމަށެވެ.

ރޭގެ ނޫސްވެރިންގެ ބައްދަލުވުމަށް ފަހު ނޫސްވެރިޔަކު ކުރި ސުވާލަކަށް ޖަވާބުދެއްވަމުން މަބްރޫކް އަޒީޒް ވަނީ ފެނުނު މީހުންގެ ތެރެއިން އެކަކު ވެންޓިލޭޓަރުގައި އޮތްކަން ޔަގީންކޮށްދެއްވައިފަ އެވެ.

ގެއްލުނު މީހުންގެ ތެރެއިން ހަތަރު މީހުންނަކީ ކޮންޓެއިންމެންޓް ސައިޓްތަކުގައި އުޅެމުން ދިޔަ މީހުން ކަމަށާއި އަނެއް ތިން މީހުންނަކީ ތަފާތު ތިން އެޑްރެހެއްގައި އުޅެމުންދާ މީހުން ކަން މަބްރޫކް ފާހަގަކުރެއްވި އެވެ.

ރާއްޖެއިން 955 މީހަކު ކޮވިޑް19 އަށް ޕޮޒިޓިވްވެފައިވާ އިރު، ހަތަރު މީހަކަށް އަންނަނީ ވެންޓިލޭޓަރުގައި ފަރުވާ ދެމުންނެވެ. ބަލިން ރަނގަޅުވި މީހުންގެ އަދަދު 40 އަށް އަރާފައިވާއި ރޭގައި ވަނީ މި ބަލީގައި 4 ވަނަ މީހަކު މަރުވެފަ އެވެ.