މުވައްޒަފުން އައިސޮލޭޓް ކުރުމަށް އުސޫލެއް ހަދައިފި

ގިނަ މުއައްޒަފުން ގެންގުޅޭ ކުންފުނި ތަކާއި މުއައްސަސާތަކުން މުއައްޒަފުންގެ އެކޮމަޑޭޝަންގެ އިންތިޒާމް ހަމަޖައްސާނޭ ގޮތުގެ އުސޫލެއް އެޗްޕީއޭ އިން އެކުލަވާލައިފި އެވެ.

އުސޫލުގައި ބުނާގޮތުން، މުއައްޒަފުން ކަރަންޓީނު ކުރާތަނުގައި ރަނގަޅު ހާލަތެއްގައި ބޭތިއްބޭނެ އިންތިޒާމް ހަމަޖެއްސުމަކީ އެ މުއައްޒަފުން ގެންގުޅޭ ފަރާތްތަކުގެ ޒިންމާއެކެވެ. އެކަން ކުރުމަށްޓަކައި ސުޕަވައިޒަރެއް ކަނޑައަޅައި، ދުވަހަކު އެއް ފަހަރު އެ ސުޕަވައިޒަރު މުއައްޒަފުންގެ ހާލަތު ބަލަން ބާނެ ކަމަށް އުސޫލުގައި ބުނެއެވެ.

އަދި އެއްވެސް މުވައްޒަފެއްގެ ފަރާތުން ރޯގާގެ އަލާމާތްތައް ފެނިއްޖެނަމަ އެމީހަކު އެހެން މީހުންނާ ވަކިން ބެހެއްޓުމުގެ އިންތިޒާމް ދިރިއުޅޭ ތަނުގައި ހަމަޖެއްސުމަށް ވެސް އުސޫލުގައި ބުނެއެވެ. އަދި އެކަން ސުޕަވައިޒަރު އެތަނެއްގެ ވެރިއަކަށް އަންގަންވާނެ ކަމަށްވެސް އުސޫލުގައި ބުނެއެވެ.

އެޗްޕީއޭ އިން ބުނީ، މި އުސޫލުގެ ބޭނުމަކީ، އެފަދަ ކުންފުނިތަކާއި މުއައްސަސާތަކުގެ މުއައްޒަފުންގެ މެދުގައި ބަލިފެތުރުން ހުއްޓުވުމަށާއި އެމީހުންގެ މެދުގައި ބަލި ފެންނަ ހާލަތުގައި އެތަންތަނުގައި މީހުން އެކަހެރިކޮށް/ކަރަންޓީނުކުރުމުގައި އެތަންތަނުުގެ އިންތިޒާމް ހުންނަ ޖެހޭ ގޮތް ބަޔާންކުރުން ކަމަށެވެ.

އެގޮތުން އެ އުސޫލުގައި އެފަދަ ތަންތަނުގެ ޒިންމާ ނަގަން ޖެހޭ ފަރާތްތަކާއި މުއައްޒަފުން ގެންގުޅޭ ފަރާތާއި މުވައްޒަފުންގެ ޒިންމާތައް ބަޔާންކޮށްފައިވެއެވެ. އަދި މުވައްޒަފުން ކަރަންޓިން ކުރަން ޖެހިއްޖެ ހާލަތެއްގައި އަތަންތަން ހުންނަން ޖެހޭ ގޮތުގެ އުސޫލު ބަޔާންކޮށްފައިއެވެ.