ދުވަސްވީ މީހުންގެ ރޭންޑަމް ސާމްޕަލް ނަގަން މަޖުބޫރެއް ނުކުރާނަން

ކޮވިޑްގެ ނުރައްކާ އޮތް މިންވަރު ބެލުމަށް ނަގަމުންދާ ރެންޑަމް ސާމްޕަލްގެ ތެރެއިން އުމުރުން ދުވަސްވީ މީހުންގެ ސާމްޕަލް މަޖުބޫރުކޮށްގެން ނެގުމުގެ ވިސްނުމެއް ނެތް ކަމަށް ނެޝަނަލް އެމަޖެންސީ އޮޕަރޭޝަން ސެންޓަރު (އެންއީއޯސީ) އިން ބުނެފި އެވެ.

ޑރ. އިބްރާހިމް އަފްޒަލް ވިދާޅުވީ މިއީ އެއްވެސް ޝައްކެއް ކުރެވިގެން ނަގާ ސާމްޕަލްތަކެއް ނޫން ކަމަށާއި މިއީ ބަލި ނެތްކަން ނުވަތަ ވައިރަސް ނެތްކަން ޔަގީންކުރުމުގެ ގޮތުން ނަގާ ސާމްޕަލްއެއް ކަމަށެވެ.

އުމުރުން ދުވަސްވީ މީހުންގެ ތެރޭގައި ކޮވިޑްގެ ނުރައްކާ އޮތް މިންވަރު ބެލުމަށް ނަގަމުންދާ ރެންޑަމް ސާމްޕަލްތަކުގެ ތެރެއިން ސާމްޕަލެއް މީގެ ކުރިން ވަނީ ޕޮޒިޓިވްވެފައެވެ.

ސާމްޕަލް ދިނުމަށް ދެކޮޅު ހަދާ މީހުންގެ މައްސަލަ ކޯޓަށް ހުށައަޅާ ކޯޓް އަމުރުގެ ދަށުންވެސް ބައެއް މީހުންގެ ސާމްޕަލް ވަނީ ނަގާފައެވެ. ދުވަސްވީ މީހުންގެ ތެރެއިން ސާމްޕަލް ދިނުމަށް ދެކޮޅު ހަދާ މީހުންގެ މައްސަލައާއި ގުޅޭގޮތުން ވާހަކަދައްކަވަމުން ޑރ. އަފްޒަލް ވިދާޅުވީ އެ އުމުރުގެ އެއްވެސް މީހަކަށް "ފޯސް"ކޮށްގެން ސާމްޕަލް ނެގުމުގެ ވިސްނުން ނެތް ކަމަށެވެ.

ދުވަސްވީ މީހުންގެ ސާމްޕަލް ނެގުމަށް ފަށާފައިވާ މަސައްކަތަށް އާންމުންގެ އެއްބާރުލުން ލިބެމުންނުދާ ކަމަށް އެންއީއޯސީން ވަނީ ބުނެފައެވެ. އަދި އާންމުންގެ އެއްބާރުލުމަށް އެ ސެންޓަރުން ވަނީ އެދިފައެވެ.

ދުވަސްވީ މީހުންގެ ސާމްޕަލް ނެގުމަށް މަޖުބޫރު ނުުކުރިނަމަވެސް ބަލި ނެތްކަން ޔަގީންވުމަކީ އާއިލާއަށްވެސް ލިބޭނެ ހިތްހަމަޖެހުމަށްވާތީ އެކަމަށް އެއްބާރުލުން ދިނުމަށް އެންއީއޯސީން ވަނީ އެދިފައެވެ.