ރާއްޖޭން ބޭރުގައި ތިބެގެން ޕާސްޕޯޓަށް އޮންލައިންކޮށް ފައިސާ ދެއްކޭނެ ގޮތް ހަދައިފި

ރާއްޖެއިން ބޭރުގައި ތިބެގެން ޕާސްޕޯޓު އާކުރުމަށް، މިހާރު އޮންލައިންކޮށް ފައިސާ ދެއްކޭނެ އިންތިޒާމް ހަމަޖައްސާފައިވާ ކަމަށް އިމިގްރޭޝަނުން ބުނެފި އެވެ.

އިމިގްރޭޝަނުން ބުނީ ރާއްޖެއިން ބޭރުގައި ތިބެގެން ޕާސްޕޯޓް އާކުރަން ބޭނުންވާ ދިވެހިން ފައިސާ ދެއްކޭނީ އޮންލައިންކޮށް ކަމަށާއި ޕާސްޕޯޓް އާކުރަން އީމެއިލް މެދުވެރިކޮށް ހުށަހެޅޭނެ ކަމަށެވެ. އަދި އީމެއިލް މެދުވެރިިކޮށް ފޯމް ހުށަހެޅުމުން ފައިސާ ދައްކަންޖެހޭ ލިންކް އީމެއިލް މެދުވެރިކޮށް ފޮނުވާނެ ކަމަށް އިމިގްރޭޝަނުން ބުންޏެވެ.

އިމިގްރޭޝަނުން ބުނީ ފައިސާ ދައްކާތާ 24 ގަޑިއިރުގެ ތެރޭގައި ޕާސްޕޯޓު ލިބޭނެ ގޮތުގެ މައުލޫމާތު ހިއްސާކުރެވޭނެ ކަމަށެވެ.

ކޮވިޑް-19 އާ ގުޅިގެން ލޮކްޑައުން ކުރުމުގެ ކުރިން ވިސާ ޖެހުމަށް ހުށަހަޅާފައިވާ ޕާސްޕޯޓުތައް މިހާރު ވަނީ ދޫކުރަން ފަށައިފައެވެ.

ރާއްޖޭން ކޮވިޑް-19 ފެނުމާއި ގުޅިގެން ސަރުކާރުގެ އޮފީސްތައް ބަންދުކުރި ނަމަވެސް ގިނަ އޮފީސްތަކުން އަންނަނީ ކޮންމެހެން ދޭން ޖެހޭ ހިދުމަތްތައް އޮންލައިންކޮށް ދެމުންނެވެ.