އޮގަސްޓު މަހު ލަންކާ ބޯޑަރު ހުޅުވުމަށް ލަފާދީފި

އޮގަސްޓް މަހުގެ އެއްވަނަ ދުވަހުން ފެށިގެން ސްރީލަންކާގެ ބޯޑަރު ހުޅުވާލުމަށް އެގައުމުގެ ކޮވިޑް ޓާސްކްފޯހުން ލަފާ ދީފި އެވެ.

ލަންކާގެ ކޮވިޑް19 ޓާސްކްފޯހުން އެގައުމުގެ ރައީސް ގޮޓަބަޔަ ރާޖްޕަކްސަ އަށް ލަފާދީފައި ވަނީ އޮގަސްޓު އެކަކުން ފެށިގެން ލަންކާގެ ބޯޑަރު ޓޫރިސްޓުންނަށް ހުޅުވާލެވިދާނެ ކަމަށެވެ.

ކޮވިޑާ ގުޅިގެން ލަންކާގެ ބޮޑަރު ޓޫރިސްޓުންނަށް ބަންދު ކުރީ މާޗު 18 ވަނަ ދުވަހު އެވެ. ލަންކާގެ އިގްތިސޯދަކީ ޓޫރިޒަމަށް ވަރަށް ބޮޑަށް ބަރޯސާވާ އިގްތިސޯދެކެވެ.

ލަންކާގައި ކޮވިޑް19 ފެތުރޭ މިންވަރު ކޮންޓްރޯލުވެ އެގައުމުގައި އަޅާފައިވާ ލޮކްޑައުންގެ ފިޔަވަޅަށް މިހާރު ވަނީ ލުއިދީފަ އެވެ.

ލަންކާގައި އަޅާފައިވާ ލޮކްޑައުންގެ ފިޔަވަޅުތަކަށް ލުއިދީ، އެގައުމުގެ ފިހާރަތައް ހުޅުވާލާފައިވާއިރު ސަލާމަތީ ފިޔަވަޅުތަކާއެކު ރެސްޓޯރެންޓުތަކާއި ކެފޭތަކުގައި ޑައިން އިންގެ ހިދުމަތް ވެސް މިހާރު ދެވޭނެ އެވެ.

ރައީސް ގޮޓަބަޔާގެ އޮފީހުން ނެރުނު ބަޔާނެއްގައި ބުނީ ޓާސްކްފޯހުގެ މި ލަފަޔަށް އަމަލު ކުރަން ފަށާއިރު ބައިނަލްއަގުވާމީ ސިއްހީ މާހިރުންނާއި އެގައުމުގެ ސިއްހީ މާހިރުންގެ ލަފާ އިތުރަށް ހޯއްދަވާނެ ކަމަށެވެ.