ކޮވިޑާ އެކު ނަފްސާނީ މައްސަލަތައް އިތުރުވެއްޖެ

މިދިޔަ އަހަރުގެ މިމުއްދަތާއި އަޅާބަލާއިރު ވޭތުވެދިޔަ ތިން މަހު ނަފްސާނީ މައްސަލަތަކަށް ފަރުވާ ހޯދުމަށް އެދުނު މީހުންގެ އަދަދު ތިން ގުނައަށް އިތުރުވެފައިވާ ކަމަށް އައިޖީއެމްއެޗުން ރޭ ބުނެފި އެވެ.

ނެޝަނަލް އިމަޖެންސީ އޮޕަރޭޝަން ސެންޓަރުގައި ރޭ ބޭއްވި ނޫސްވެރިންގެ ބައްދަލުވުމުގައި އައިޖީއެމްއެޗުގެ ސެންޓަ ފޯ މެންޓަލް ހެލްތުގެ ޕްރިންސިޕަލް ކްލިނިކަލް ސައިކޮލޮޖިސްޓް ޑރ. އާފިޔާ އަލީ ވިދާޅުވީ މި އަހަރުގެ މާޗް އިން ފެށިގެން މެއި މަހުގެ ނިޔަލަށް 999 މީހުން ނަފްސާނީ ފަރުވާ ހޯދަން އެދުނު ކަމަށާއި މިދިޔަ އަހަރުގެ މި މުއްދަތުގައި ފަރުވާ ހޯދީ 330 މީހުން ކަމަށެވެ.

ޑރ. އާފިޔާ ވިދާޅުވީ ފަރުވާ ހޯދި އަދަދު އިތުރުވި ނަމަވެސް ނަފްސާނީ މައްސަލަތައް އިތުރުވެފައިވާ މިންވަރާއި މައްސަލަތަކުގެ ބާވަތް ދެނެގަންނަން އަދި ދިރާސާއެއް ކުރެވިފައެއް ނުވާ ކަމަށެވެ. އޭނާ ވިދާޅުވީ ކޮވިޑާ ގުޅިގެން އެންމެ ބޮޑަށް ކުރިމަތިވާ މައްސަލައެއްގެ ގޮތުގައި އެހެން ގައުމުތަކުން ފެނިފައި ވަނީ ޕޯސްޓް ޓްރައުމެޓިމް ޑިސްއޯޑާ އެވެ.

އަދި ކޮވިޑާ އެކު ނަފްސާނީ ގޮތުން ވެސް ޕެންޑެމިކެއް ކުރިމަތިވާނެ ކަމުގެ ކަންބޮޑުވުން ދުނިޔޭގެ ސިއްހަތު ޖަމިއްޔާގެ މާހިރުން ވެސް ފާޅުކުރައްވަމުން ގެންދަވާ ކަމަށް އޭނާ ވިދާޅުވި އެވެ.

ޑޮކްޓަރު ވިދާޅުވީ ލޮކްޑަައުން ކުރުމާއި ލޮކްޑައުން ލުއިކުރުމާ މެދުގައި ވެސް ކަންބޮޑުވާ ކަންތައްތަކެއް ހުންނާނެ ކަން ބަލައިގަންނަން ޖެހޭ ކަމަށާއި އެ ފިޔަވަޅުތައް އެގޮތަށް ބަދަލުވަމުން ދަނީ ކޮވިޑާ އެކު ހާލަތަށް އަންނަ ބަދަލުތަކުގެ ސަބަބުން ކަން ގަބޫލުކުރަން ޖެހޭ ކަމަށެވެ. މި ކަންކަމުން ލިބޭ ހާސްކަން ކުޑަކުރުމަށް ކުރެވޭނެ އެންމެ ރަނގަޅު ކަމަކީ އަމިއްލަ ބާރު ހިނގާ ކަންތައްތަކަށް ސަމާލުކަންދިނުން ކަމަށް ވިދާޅުވި އެވެ.

ބަލި ޖެހިދާނެތީ އޮންނަ ހާސްކަން ކުޑަކުރުމަށް ޓަކައި އިޖުތިމާއީ ގައިދުރުކަން އިސްކޮށް ސާފުތާހިރުކަމަށް ސަމާލުކަން ދިނުމަކީ އެންމެ ރަނގަޅު އެއް ކަންތަކަމުގައެވެ.

ސަމާލުކަންދޭންވީ އެހެން ކަންތަައްތަކަކީ އޭނާ ވިދާޅުވި ގޮތުގައި ވެވުނު މިންވަރަކުން ހަރަކާތްތެރިވެ އުޅުމާއި ސިއްހަތަަށް ފައިދާހުރި ކާނާ ބޭނުން ކުރުމެވެ. ގޭތެރޭގައި ބޮޑު ޖާގަ ނެތްނަމަވެސް އިށީނދެ ތިބުމުގައި ބަދަލުގައި ތެދުވެގެން ކޮންމެވެސް ކަމެއް ކޮށްލުމަކީ ކުރެވިދާނެ ކަމެއް ކަމަށް އޭނާ ވިދާޅުވި އެވެ.

އެކަކު އަނެކަކުގެ ހާލުބަލައި ހިތްވަރުދިނުމަކީ ވެސް ކުރެވިދާނެ މުހިއްމު ކަމެއް ކަން އޭނާ ފާހަގަކުރެއްވި އެވެ.

މީގެ އިތުރުން ނަފްސާނީ ގޮތުން އެންމެ އާދައިގެ ކަންބޮޑުވުންތަކަށް އެހީއެއް ބޭނުން ކަމުގައި ވާނަމަ ޕީއެސްއެސް ހޮޓްލައިން 1425 ށް ގުޅުމަށް ޑރ. އާފިޔާ އެދިވަޑައިގެންނެވި އެވެ. އަދި ޚާއްސަ ފަރުވާ ބޭނުންވާ ނަމަ އަދި މިހާރުވެސް ބޭނުންކުރަމުންދާ ސިޓީ އައު ކުރުމަށް ބޭނުންވާނަމަ އަދި އެއްވެސް މައުލޫމާތެއް ސާފުކުރުމަށް ބޭނުންނަމަ އައިޖީއެމްއެޗްގެ ސެންޓަރ ފޮރ މެންޓަލް ހެލްތު 7942403 ށް މެސެޖް ކުރުމުން އެޕޮއިންޓްމަންޓް ލިބިގެންދާނެ ކަމަށް ޑރ. އާފިޔާ ވިދާޅުވި އެވެ.