ލޮކްޑައުން އަށް އިތުރަށްދޭ ލުއިތައް މިރޭ ހާމަކުރަނީ

ކޮވިޑް-19 އާ ގުޅިގެން މާލެ ސަރަހައްދަށް އިއުލާނު ކޮށްފައިވާ ލޮކްޑައުންގެ މުއްދަތުގެ ދެވަނަ ފިޔަވަހީގައި ދޭނެ ލުއިތައް މިރޭ އިއުލާނު ކުރާނެ ކަމަށް ސަރުކާރުން ބުނެފި އެވެ.

މިދިޔަ މަހު 29 ވަނަ ދުވަހު ލޮކްޑައުން އަށް ދީފައިވާ ލުއިތައްކުގެ ފުރަތަމަ ފިޔަވަހީގެ ދެވަނަ ހަފުތާ މާދަމާއަށް ހަމަވާނެ އެވެ.

ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ގެ ތަރުޖަމާން މަބުރޫކް އަޒީޒް ވިދާޅުވީ ލޮކްޑައުންއަށް ލުއި ދިނުމުގެ ދެވަނަ ފިޔަވަހީގައި ދޭނެ ލުއިތަކުގެ މައުލޫމާތުތައް މިރޭ ހެލްތް މިނިސްޓްރީން ހާމަ ކުރާނެ ކަމަށެވެ.

މާލެ ސަރަހައްދު ލޮކްޑައުން ކޮށްފައިވަނީ އޭޕްރީލް މަހުގެ 15 ވަނަ ދުވަހު މާލެއިން ކޮވިޑް ޕޮޒިޓިވް މީހެއް ފެނުމާއި ގުޅިގެން އެ ދުވަހުން ފެށިގެންނެއެވެ. އެ ދުވަހުން ފެށިގެން މެއި މަހުގެ 28 ވަނަ ދުވަހުގެ ނިޔަލަށް ހަރުކަށި ފިޔަވަޅުތަކާއެކު ލޮކްޑައުންގެ މުއްދަތު އިތުރު ކުރި ނަމަވެސް މެއި މަހުގެ 29 ވަނަ ދުވަހުން ފެށިގެން ލޮކްޑައުންއަށް ލުއިތަކެއް ވަނީ ދީފަ އެވެ.

ލޮކްޑައުން އަށް ލުއިތަކެއް ދިން ނަމަވެސް، ފުރަތަމަ ފިޔަވަހީގައި ރަށްރަށަށް ދަތުރު ކުރުމާއި، 'ހައިރިސްކް' މީހުންނާއި ކުޑަކުދިން ބޭރަށް ނުކުތުން ވަނީ މަނާކޮށްފަ އެވެ.

އަދި ގިނަ ވިޔަފާރިތައް ހުޅުުވުމަށް ހުއްދަދީ ބައެއް ވިޔަފާރިތައް އޮންލައިންކޮށް ކުރިއަށް ގެންގޮސް، ޑެލިވަރީގެ ހިދުމަތް ދިނުމުގެ މަގު ވަނީ ތަނަވަސްކޮށް ދީފަ އެވެ. މީގެ އިތުުރުން މަސް މާރުކޭޓް ހުޅުވާ، ބޭންކްތަކުން ހިދުމަތްދޭ ވަގުތުތައް ވެސް ވަނީ އިތުރު ކޮށްފައެވެ. ނަމަވެސް މިސްކިތްތަކުގައި ޖަމާއަތުގައި ނަމާދުކުރުމާއި ސުކޫލްތަކާއި އޮފީސްތައް ހުޅުވުމުގެ ހުއްދަ އަދި ދީފައިނުވެ އެވެ.

މިހާތަނަށް ރާއްޖެއިން 1942 މީހުން ޕޮޒިޓިވްވި ނަމަވެސް ބަލިން ޖެހިފަ ތިބި މީހުންނަށް ވުރެން ބަލިން ރަނގަޅުވި މީހުންވަނީ އިތުރުވެފަ އެވެ. އެގޮތުން މިހާރު ބަލިޖެހިފަ ތިބި މީހުންގެ ގޮތުގައި 922 މީހުން ތިބިއިރު 1010 މީހުން ވަނީ ބަލިން ރަނގަޅުވެފަ އެވެ. އަދި 8 މީހަކު ވަނީ ބަލިން ރަނގަޅުވެފަ އެވެ.