ރާއްޖެއިން ޕޮޒިޓިވްވި އެންމެ ދޮށީ އުމުރުގެ މީހާ ރަނގަޅުވެއްޖެ

ރާއްޖެއިން ކޮވިޑް-19 އަށް ޕޮޒިޓިވްވި އެންމެ ދޮށީ އުމުރުގެ މީހާ ބަލިން ރަނގަޅުވެ، ގެއަށް ބަދަލު ކޮށްފި އެވެ.

މިހާތަނަށް ކޮވިޑް-19 އަށް ރާއްޖެއިން ޕޮޒިޓިވްވި އެންމެ ދުވަސްވީ މީހަކަށް މިބަލި ޖެހިފައި ވަނީ 92 އަހަރުގެ ދެ މީހަކަށެވެ. އިއްޔެ ބަލިން ރަނގަޅުވެގެން ދޫކޮށްލާފައިވަނީ ކުރީގެ މަޝްހޫރު ކުރެހުންތެރިއެއް ކަމަށްވާ ސަރުދާރު ދޮންމަނިކެވެ.

އޭނާ ބަޔަށް ޕޮޒިޓިވްވީ މިދިޔަ މަހުގެ 29 ވަނަ ދުވަހު އެވެ. ޓްރީޓޮޕް ހޮސްޕިޓަލުުގެ އައިސީޔޫގައި ފަރުވާ ހޯދުމަށްފަހު، ބަލިން ރަނގަޅުވެ ގެއަށް ބަދަލުކޮށްފައިވަނީ އިއްޔެގެ ވަގުތެއްގައެވެ.

ހައިރިސްކް ކެޓަގަރީގައި އުމުރުން ދުވަސްވީ މީހުން ހިމެނޭތީ އެފަދަ މީހުންނަށް ޚާއްސަ ސަމާލުކަމެއްދީގެން ފަރުވާ ދިނުމުގެ ކަންކަން ކުރިއަށް ގެންދެއެވެ.

ރާއްޖެއިން މިހާތަނަށް 2120 މީހަކު މި ބައްޔަށް ޕޮޒިޓިވްވެފައިވާއިރު އޭގެ ތެރެއިން ފަރުވާހޯދަމުން ދަނީ 433 މީހެކެވެ. 1677 މީހަކު މިހާރު ވަނީ މި ބަލިން މުޅިން ރަނގަޅުވެފަ އެވެ. ބަލި ޖެހުނު މީހުންގެ ތެރެއިން 8 މީހަކު ވަނީ މަރުވެފަ އެވެ.